ବାରଣାସୀ,୩୧।୧: ବହୁଚର୍ଚ୍ଚିତ ଜ୍ଞାନବ୍ୟାପୀ ମାମଲାରେ ଆସିଛି ବଡ଼ ରାୟ । ହିନ୍ଦୁ ପକ୍ଷଙ୍କୁ ମିଳିଲା ପୂଜା କରିବାର ଅନୁମତି। ଉତ୍ତରପ୍ରଦେଶର ବାରଣାସୀ କୋର୍ଟ ଦେଇଛନ୍ତି ରାୟ। କୋର୍ଟ କହିଛନ୍ତି ବ୍ୟାସ ତହଖାନାରେ ହିନ୍ଦୁମାନେ ପୁଜା କରିପାରିବେ । ଏହି ତହଖାନା ମସଜିଦର ବେସମେଣ୍ଟରେ ରହିଛି। ୭ ଦିନ ମଧ୍ୟରେ ବ୍ୟବସ୍ଥା କରିବାକୁ ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି କୋର୍ଟ। ପୂର୍ବରୁ ଏଏସ୍ଆଇ ସର୍ଭେ ବେଳେ ଉକ୍ତ ବେସମେଣ୍ଟଟି ସିଲ୍ ହୋଇ ରହିଥିଲା। ଏବେ ହିନ୍ଦୁ ପକ୍ଷ ସିଲ୍ ହୋଇଥିବା ବ୍ୟାସ ତହଖାନାରେ ପୂଜା କରିପାରିବେ।
ବୁଧବାର ଶୁଣାଣି ବେଳେ କୋର୍ଟ କହିଛନ୍ତି, ଜିଲ୍ଲା ପ୍ରଶାସନ ଶ୍ରଦ୍ଧାଳୁଙ୍କ ପୂଜା ପାଇଁ ଆବଶ୍ୟକ ବ୍ୟବସ୍ଥା କରିବେ। ୭ ଦିନ ମଧ୍ୟରେ ବ୍ୟାରିକେଡ ହଟାଇ ପୂଜା ପାଇଁ ବ୍ୟବସ୍ଥା ହେବ। ଏଥିସହ କୋର୍ଟ ଶ୍ରୀ କାଶୀ ବିଶ୍ୱନାଥ ମନ୍ଦିର ଟ୍ରଷ୍ଟକୁ ବେସମେଣ୍ଟରେ ପୂଜାର୍ଚ୍ଚନା କରିବା ପାଇଁ ଜଣେ ପୂଜାରୀଙ୍କୁ ମନୋନୀତ କରିବାକୁ ମଧ୍ୟ କହିଛନ୍ତି। କୋର୍ଟଙ୍କ ରାୟରେ ବର୍ତ୍ତମାନ ଏଠାରେ ନିୟମିତ ପୂଜା କରାଯିବ। କୋର୍ଟଙ୍କ ରାୟ ପରେ ହିନ୍ଦୁ ପକ୍ଷ ଏହାକୁ ଏକ ବଡ଼ ବିଜୟ ବୋଲି କହିଛନ୍ତି। ୩୦ ବର୍ଷ ପରେ ନ୍ୟାୟ ପାଇଛନ୍ତି ବୋଲି କହିଛନ୍ତି । ନଭେମ୍ବର ୧୯୯୩ ପର୍ଯ୍ୟନ୍ତ ଏଠାରେ ପୂଜା କରାଯାଉଥିଲା। ପୂର୍ବରୁ ଏଏସ୍ଆଇ ସର୍ଭେ ବେଳେ ଉକ୍ତ ବେସମେଣ୍ଟଟି ସିଲ୍ ହୋଇ ରହିଥିଲା। ଏବେ ହିନ୍ଦୁ ପକ୍ଷ ସିଲ୍ ହୋଇଥିବା ବ୍ୟାସ ତହଖାନାରେ ପୂଜା କରିପାରିବେ।
ଉଲ୍ଲେଖନୀୟ ଯେ, ବାରାଣାସୀର ଜ୍ଞାନବ୍ୟାପୀ ମସଜିଦ ପରିସରରେ ଅବସ୍ଥିତ ବ୍ୟାସ ତହଖାନାରେ ପୂଜାପାଠ କରିବାର ଅଧିକାର ବହୁ ଦିନ ହେବ ଦାବି ହେଉଥିଲା। ଶୈଳେନ୍ଦ୍ର କୁମାର ପାଠକଙ୍କ ଆବେଦନ ଉପରେ ଗତକାଲିର ଶୁଣାଣି ପରେ ଜିଲ୍ଲା ଜଜ୍ ଏହି ରାୟ ସଂରକ୍ଷିତ ରଖିଥିଲେ। ଯାହା ଉପରେ ବୁଧବାର ଏହି ରାୟ ଆସିଛି। ମୁସଲିମ୍ ପକ୍ଷଙ୍କ ଓକିଲ ଅଖଲାକ ଅହମଦ କହିଛନ୍ତି,ଏହି ନିଷ୍ପତ୍ତି ଭୁଲ୍। ଏହା ବିରୁଦ୍ଧରେ ସେ ହାଇକୋର୍ଟ ଯିବେ। ତେବେ ଏନେଇ ହିନ୍ଦୁ ପକ୍ଷଙ୍କ ଓକିଲ ବିଷ୍ଣୁ ଶଙ୍କର ଜୈନ କହିଛନ୍ତି କି ପୂଜା ୭ ଦିନ ଭିତରେ ଆରମ୍ଭ ହେବ । ସମସ୍ତଙ୍କର ପୂଜା କରିବାର ଅଧିକାର ରହିଛି ।