କଟକ,୨୮/୦୩: ସମ୍ବଲପୁର ଜିଲ୍ଲା ହୀରାକୁଦ ଅଞ୍ଚଳରେ କିଛି ଦିନ ହେବ ଝାଡ଼ାବାନ୍ତି ବ୍ୟାପିବାରେ ଲାଗିଛି । ଏଥିରେ ଦୁଇ ଜଣଙ୍କ ମୃତ୍ୟୁ ହୋଇଥିବାବେଳେ ଶତାଧିକ ଆକ୍ରାନ୍ତ ହୋଇ ଚିକିତ୍ସାଧୀନ ଅଛନ୍ତି । ଦୂଷିତ ପାନୀୟ ଜଳ କାରଣରୁ ଏହି ରୋଗ ବ୍ୟାପୁଥିବା ଡାକ୍ତରୀ ଦଳ ଜାଣିବାକୁ ପାଇଛନ୍ତି । ସରକାରଙ୍କ ଡ୍ରିଙ୍କ ଫ୍ରମ୍ ଟ୍ୟାପ୍ ଯୋଜନା ଏଠାରେ ବିଫଳ ହୋଇଥିବା ଅଭିଯୋଗ କରି ଆଇନଜୀବୀ ତଥା ସମାଜସେବୀ ଶିବଶଙ୍କର ମହାନ୍ତି ରାଜ୍ୟ ମାନବାଧିକାର କମିସନ୍ରେ (ଓଏଚ୍ଆରସି) ମାମଲା ରୁଜୁ କରିଛନ୍ତି ।
ଶ୍ରୀ ମହାନ୍ତି ପିଟିସନ୍ରେ ଉଲ୍ଲେଖ କରିଛନ୍ତି ଯେ, ଜନସ୍ୱାସ୍ଥ୍ୟ ବିଭାଗ(ପିଏଚ୍ଡି) ପକ୍ଷରୁ ପାନୀୟ ଜଳ ଯୋଗାଣ କରାଯାଉଛି । ବିଭିନ୍ନ ସ୍ଥାନରେ ଖନନ କରାଯିବା ଦ୍ୱାରା ପାଇପ୍ ଫାଟି ଏଥିରେ ଦୂଷିତ ଜଳ ଓ ବର୍ଜ୍ୟବସ୍ତୁ ମିଶୁଛି । ଏପରି କି ବର୍ଷ ବର୍ଷ ଧରି ପାଇପ୍ଗୁଡିକ ବଦଳା ନଯିବା ଫଳରେ ପାନୀୟ ଜଳ ଦୂଷିତ ହେବାରେ ଲଗିଛି । ଏଥିପାଇଁ ଉକ୍ତ ଅଞ୍ଚଳରେ ଝାଡାବାନ୍ତି ବ୍ୟାପିବାରେ ଲାଗିଛି ।
ଇତିମଧ୍ୟରେ ଏହାର ପ୍ରଭାବରେ ହୀରାକୁଦ ଅଞ୍ଚଳର ଦୁଇଜଣ ବ୍ୟକ୍ତିଙ୍କ ମୃତ୍ୟୁ ଘଟିଛି । ସେହିପରି ଶତାଧିକ ଲୋକେ ହୀରାକୁଦ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଏବଂ ଭିମ୍ସାରରେ ଚିକିତ୍ସାଧୀନ ରହିଛନ୍ତି । ଏପରିସ୍ଥଳେ ସ୍ୱଚ୍ଛ ପାନୀୟ ନିମନ୍ତେ ଜନସ୍ୱାସ୍ଥ୍ୟ ବିଭାଗ ଗୁରୁତ୍ୱ ଦେଉନଥିବା ଶ୍ରୀ ମହାନ୍ତି ଅଭିଯୋଗ ଆଣିଛନ୍ତି । ଏହି ମାମଲାରେ ଜଳସମ୍ପଦ ବିଭାଗ ପ୍ରମୁଖ ସଚିବ, ପଞ୍ଚାୟତିରାଜ ଓ ପାନୀୟ ଜଳ ବିଭାଗ ପ୍ରମୁଖ ସଚିବ, ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ, ସମ୍ବଲପୁର ଜିଲ୍ଲାପାଳ, ସମ୍ବଲପୁର ମହାନଗର ନିଗମ, ଜନସ୍ୱାସ୍ଥ୍ୟ ବିଭାଗ ଅଧିକାରୀଙ୍କୁ ପକ୍ଷଭୁକ୍ତ କରାଯାଇଛି ।
