ଡାଲାସ,୦୭/୦୬: ଟି-ଟ୍ୱେଣ୍ଟି ବିଶ୍ୱକପ୍ର ପ୍ରାଥମିକ ରାଉଣ୍ଡ୍ରୁ ବିପର୍ଯ୍ୟୟ ଆରମ୍ଭ ହୋଇଯାଇଛି । ଉପମହାଦେଶର ଅନ୍ୟତମ ଶକ୍ତିଶାଳୀ ଦଳ ପାକିସ୍ତାନ ପ୍ରଥମ ମ୍ୟାଚ୍ରେ ଦୁର୍ବଳ ଅନଭିଜ୍ଞ ୟୁଏସଏ ଠାରୁ ପରାଜିତ ହୋଇଛି । ଗୁରୁବାର ଅନୁଷ୍ଠିତ ଏକ ରୋମାଞ୍ଚକର ମୁକାବିଲାରେ ୟୁଏସଏ ସୁପର ଓଭରରେ ବିଜୟୀ ହୋଇ ଗ୍ରୁପ୍-ଏ’ ପଏଣ୍ଟ ତାଲିକାର ଶୀର୍ଷ ସ୍ଥାନ ଦଖଲ କରିଛି । ଏହି ମ୍ୟାଚ୍ରେ ପ୍ରଥମେ ବ୍ୟାଟିଂ କରି ପାକିସ୍ତାନ ୭ ୱିକେଟ୍ ହରାଇ ୧୫୯ ରନ୍ ସଂଗ୍ରହ କରିଥିଲା । ଜବାବରେ ୟୁଏସଏ ମଧ୍ୟ ୩ ୱିକେଟ୍ ହରାଇ ୧୫୯ ରନ କରିବାକୁ ସକ୍ଷମ ହୋଇଥିଲା ।
ସୁପର ଓଭରରେ ପ୍ରଥମେ ବ୍ୟାଟିଂ କରି ୟୁଏସଏ ୧୮ ରନ୍ ସଂଗ୍ରହ କରିଥିଲା । ମହମ୍ମଦ ଅମୀର ଏହି ଓଭର ବୋଲିଂ କରି ଅତିରିକ୍ତ ଭାବେ ୭ ରନ୍ ପ୍ରଦାନ କରିଥିଲେ । ଯାହା ପାକିସ୍ତାନ ପରାଜୟର ମୁଖ୍ୟ କାରଣ ସାଜିଥିଲା । ଜବାବରେ ପାକିସ୍ତାନ ୧ୱିକେଟ୍ ହରାଇ ୧୩ ରନ୍ କରିବାକୁ ସକ୍ଷମ ହୋଇଥିଲା । ଅର୍ଦ୍ଧଶତକୀୟ ଇନିଂସ୍ ଖେଳି ମ୍ୟାଚ୍ ‘ଟାଇ’ କରିବାରେ ମୁଖ୍ୟ ଭୂମିକା ଗ୍ରହଣ କରିଥିବା ମୋନାଙ୍କ ପଟେଲ ପ୍ଲେୟାର ଅଫ୍ ଦ ମ୍ୟାଚ୍ ବିବେଚିତ ହୋଇଥିଲେ ।
ପାକିସ୍ତାନର ଅଭିଜ୍ଞ ତଥା ଘାତକ ପେସ ବାହିନୀ ବିପକ୍ଷରେ ୧୬୦ ରନ୍ର ଲକ୍ଷ୍ୟ ହାସଲ କରିବା କଷ୍ଟକର ମନେ ହେଉଥିଲା । ମାତ୍ର ୟୁଏସଏର ଦମ୍ଦାର ବ୍ୟାଟିଂ ଆଗରେ ପାକ୍ ବୋଲରଙ୍କ ସବୁ କୌଶଳ ଫିକା ପଡ଼ି ଯାଇଥିଲା । ଷ୍ଟିଭେନ ଟେଲର(୧୨) ସହଳ ଆଉଟ୍ ହୋଇଥିଲେ ହେଁ ଅନ୍ୟ ଓପନର ମୋନାଙ୍କ ପଟେଲ ଦୃଢ ବ୍ୟାଟିଂ କରି ଅର୍ଦ୍ଧଶତକ ଅର୍ଜନ କରିଥିଲେ ଓ ଆନ୍ଦ୍ରିୟସ ଗସଙ୍କ ସହ ମିଶି ୬୮ ରନ୍ର ଭାଗିଦାରୀ ଗଢିବା ଫଳରେ ବିଜୟ ଆଶା ଉଜ୍ଜ୍ୱଳ ହୋଇଥିଲା । ଦଳୀୟ ସ୍କୋର ୧୦୪ ବେଳେ ଗସ ବ୍ୟକ୍ତିଗତ ୩୫ (୫ଚୌକା, ୧ଛକା) ରନ୍ କରି ଆଉଟ୍ ହୋଇଥିଲେ । ପରବର୍ତ୍ତୀ ଓଭରରେ ମୋନାଙ୍କଙ୍କୁ ଆଉଟ୍ କରିଥିଲେ ମହମ୍ମଦ ଅମୀର । ସେ ୩୮ଟି ବଲ୍ରୁ ୭ ଚୌକା ଓ ୧ଛକା ବଳରେ ୫୦ରନ୍ କରିଥିଲେ ।
ପାକିସ୍ତାନ ଏଥର ବାଜି ପଲଟାଇବା ଆଶା କରାଯାଉଥିଲା । ୟୁଏସଏ ମଧ୍ୟ ଜୋରଦାର ଲଢେଇ କରିଥିଲା । ୧୮ଓଭର ଖେଳ ଶେଷ ସୁଦ୍ଧା ୟୁଏସଏ ୩ୱିକେଟ୍ ହରାଇ ୧୩୯ ରନ୍ ସଂଗ୍ରହ କରିନେଇଥିଲା । ଶେଷ ୨ ଓଭରରେ ବିଜୟ ପାଇଁ ଆବଶ୍ୟକ ହେଉଥିଲା ୨୧ରନ୍। ଅମୀର ୧୯ତମ ଓଭରରେ ମାତ୍ର ୬ ରନ୍ ପ୍ରଦାନ କରିଥିଲେ । ଶେଷ ଓଭରରେ ବାକି ରହିଥିଲା ୧୫ ରନ୍ । ହ୍ୟାରିସ ରୌଫ ୟୁଏସଏକୁ ଅଟକାଇବାରେ ବିଫଳ ହୋଇଥିଲେ । ଦୁଇ ଅପରାଜିତ ବ୍ୟାଟର ଆରନ ଜୋନ୍ସ ଓ ନିତିଶ କୁମାର ଏହି ଓଭରରେ ୧୪ ରନ୍ ସଂଗ୍ରହ କରି ମ୍ୟାଚ ‘ଟାଇ’ କରିଥିଲେ ।
ଟସ ଜିତି ଫିଲ୍ଡିଂ ନିଷ୍ପତ୍ତି ନେବା ୟୁଏସ୍ଏ ପାଇଁ ବେଶ୍ ଫଳପ୍ରଦ ରହିଥିଲା । ପାକିସ୍ତାନ ପ୍ରାରମ୍ଭିକ ବିପର୍ଯ୍ୟୟର ସମ୍ମୁଖୀନ ହୋଇଥିଲେ ହେଁ ଅଧିନାୟକ ବାବର ଆଜମ ଓ ମଧ୍ୟକ୍ରମ ବ୍ୟାଟର ଶଦାବ ଖାନଙ୍କ ଲଢୁଆ ବ୍ୟାଟିଂ ବଳରେ ୭ ୱିକେଟ୍ ହରାଇ ୧୫୯ ରନ୍ କରିଥିଲା । ବାବର ୩ଚୌକା ଓ ୨ଛକା ବଳରେ ୪୪ ରନ୍ କରିଥିଲେ । ସେହିପରି ଶଦାବ ୨୫ଟି ବଲ୍ରୁ ୪୦ (୧ଚୌକା, ୩ଛକା) ରନ୍ର ଇନିଂସ ଖେଳିଥିଲେ । ଅନ୍ୟମାନଙ୍କ ମଧ୍ୟରେ ଇଫତିଖର ୧୮ ଓ ସହିନ ଆଫ୍ରିଦି ଅପରାଜିତ ୨୩ ରନ୍କରିଥିଲେ । ୟୁଏସଏ ପକ୍ଷରୁ ନୋସ୍ତୁସ କେଞ୍ଜିଗେ ୩ଟି ଓ ସୌରଭ ନେତ୍ରାଭଲକର ୨ଟି ୱିକେଟ୍ ନେଇଥିଲେ ।
