ଗାଜା ସିଟି,୩୦/୦୯: ଲେବାନନ୍ରେ ମୃତ୍ୟୁ ତାଣ୍ଡବ ରଚୁଥିବା ଇସ୍ରାଏଲ୍ ସେନା ଗାଜାରେ ଏକ ବଡ଼ ସୁଡ଼ଙ୍ଗ ଠାବ କରିଛି । ୧ କିଲୋମିଟରର ଏହି ସୁଡ଼ଙ୍ଗରେ ଅନେକ କୋଠରି ରହିଛି । କେତେକ କୋଠରିରେ ବିପୁଳ ଯୁଦ୍ଧ ଉପକରଣ ମହଜୁଦ ଅଛି । ଏ ନେଇ ଇସ୍ରାଏଲ୍ ଏକ ଭିଡିଓ ଜାରି କରିଛି ।
ଇସ୍ରାଏଲ୍ ଡିଫେନ୍ସ ଫୋର୍ସେସ୍ (ଆଇଡିଏଫ୍) କହିଛି ଯେ ହମାସ୍କୁ ଦୁର୍ବଳ କରିବା ଏବଂ ସେମାନଙ୍କ କବଳରୁ ବନ୍ଧକଙ୍କୁ ମୁକୁଳାଇବା ପାଇଁ ଅଭିଯାନ ଜାରି ରହିଛି । ଏଥିଲାଗି ବ୍ୟାପକ ଚଢ଼ଉ କରାଯାଉଛି । ଚଢ଼ଉ ବେଳେ ଏକ ଜନଗହଳିପୂର୍ଣ୍ଣ ଅଞ୍ଚଳରେ ସୁଡ଼ଙ୍ଗ ଠାବ କରାଯାଇଛି । ଏହାପରେ ତୁରନ୍ତ ଏହାକୁ ଧ୍ୱଂସ କରି ଦିଆଯାଇଛି । ଆବାସିକ ଅଟ୍ଟାଳିକା ନିକଟରେ ସୁଡ଼ଙ୍ଗକୁ ନିର୍ମାଣ କରାଯାଇଥିଲା ।
ଉଲ୍ଲେଖଯୋଗ୍ୟ, ୨୦୨୩ ଅକ୍ଟୋବର ୭ରୁ ଇସ୍ରାଏଲ୍ ଓ ହମାସ୍ ମଧ୍ୟରେ ଯୁଦ୍ଧ ଲାଗିରହିଛି । ଏହି ଯୁଦ୍ଧ ଏବେ ଲେବାନନ୍କୁ ମାଡ଼ିଛି । ଲେବାନନ୍ରେ ଇସ୍ରାଏଲ୍ ଘନଘନ ଏୟାର ଷ୍ଟ୍ରାଇକ୍ ଜାରି ରଖିଛି । ଆଜି ଏହାର ଆକ୍ରମଣରେ ୬୯ ଲୋକ ପ୍ରାଣ ହରାଇଛନ୍ତି
