ନୂଆଦିଲ୍ଲୀ,୪।୫: ପ୍ରବଳ ଗରମ ଭିତରେ ଭାରତୀୟ ପାଣିପାଗ ବିଭାଗ(ଆଇଏମଡି)ର ଆଶ୍ବସ୍ତିଜନକ ଖବର। ୬ ମଇରୁ ବଙ୍ଗୋପସାଗର ଓ ଉତ୍ତର ପୂର୍ବ ଭାରତରେ ବର୍ଷା ଓ ପବନ ବୋହିବାର ସମ୍ଭାବନା ରହିଛି। ପାଣିପାଗ ବିଭାଗର ପୂର୍ବାନୁମାନ ଅନୁସାରେ, ଆଗକୁ ଓଡିଶା, ବିହାର, ଝାଡଖଣ୍ଡ, ପଶ୍ଚିମବଙ୍ଗ, ଉତ୍ତର ପ୍ରଦେଶ, ଦିଲ୍ଲୀ-ଏନ୍ସିଆର ବ୍ୟତୀତ ଆସାମ, ସିକ୍କିମ, ମଣିପୁର ସହିତ ବହୁ ରାଜ୍ୟର ଲୋକ ଗରମରୁ ଆଶ୍ବସ୍ତି ପାଇବେ।
ଆଇଏମ୍ଡି କହିଛି, ଆଗାମୀ ୫ ଦିନରେ ଅରୁଣାଚଳ ପ୍ରଦେଶ, ଆସାମ, ମେଘାଳୟ, ସିକ୍କମ, ନାଗାଲାଣ୍ଡ, ମଣିପୁର, ମିଜୋରାମ ଓ ତ୍ରିପୁରାରେ ହାଲକାରୁ ମଧ୍ୟମ ଧରଣର ବର୍ଷା ସହିତ ଜୋରରେ ପବନ ବୋହିବ। ଏହି ସମୟରେ ପବନର ଗତି ୪୦-୫୦ କିଲୋମିଟର ପ୍ରତି ଘଣ୍ଟା ରହିପାରେ।
ଏହାଛଡା ଜମ୍ମୁ-କଶ୍ମୀର, ଲଦାଖ, ମୁଜଫରାବାଦ, ଉତ୍ତରାଖଣ୍ହ ଓ ହିମାଚଳ ପ୍ରଦେଶରେ ଘଡଘଡି ସହ ହାଲକା ବର୍ଷା ହେବାର ସମ୍ଭାବନା ରହିଛି। ଶନିବାର ହରିୟାଣା, ଚଣ୍ଡୀଗଡ ଓ ପଞ୍ଜାବରେ ମଧ୍ୟ ଅଲଗା ଅଲଗା ସ୍ଥାନରେ ହାଲକା ବର୍ଷା ହେବାର ସମ୍ଭାବନା ରହିଛି। ଏହି ସମୟରେ ପବନର ଗତି ୩୦-୪୦ କିଲୋମିଟର ପ୍ରତିଘଣ୍ଟା ରହିପାରେ।
