ନୂଆଦିଲ୍ଲୀ: ଚଳିତ ବର୍ଷ ରେକର୍ଡ ସଂଖ୍ୟକ କରଦାତା ଆୟକର ରିଟର୍ଣ୍ଣ ଫାଇଲ୍ କରିଛନ୍ତି । ଜୁଲାଇ ୩୧ ସୁଦ୍ଧା ପ୍ରାୟ ୭.୨୮ କୋଟିରୁ ଅଧିକ ଲୋକ ଆୟକର ରିଟର୍ଣ୍ଣ (ଆଇଟିଆର) ଫାଇଲ୍ କରିଥିବା ନେଇ ଆୟକର ବିଭାଗ ଅଗଷ୍ଟ ୨ରେ ସୂଚନା ଦେଇଛି । ସବୁଠୁ ବଡ଼ କଥା ହେଉଛି ୨୦୨୪ରେ ତିନି ଚତୁର୍ଥାଂଶ ବା ପ୍ରାୟ ୫ କୋଟିରୁ ଅଧିକ କରଦାତା ନୂଆ କର ବ୍ୟବସ୍ଥାକୁ ବାଛିଛନ୍ତି । ୨୦୨୪ କେନ୍ଦ୍ରୀୟ ବଜେଟ୍ରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ଟ୍ୟାକ୍ସକୁ ନେଇ କରିଥିବା ଘୋଷଣାରେ ଯଦିଓ କରଦାତାଙ୍କୁ ନିରାଶା ମିଳିଛି କିନ୍ତୁ ଆୟକର ରିଟର୍ଣ୍ଣରେ ଆଶାତୀତ ବୃଦ୍ଧି ଘଟିଛି । ୨୦୨୩-୨୪ରେ ଜୁଲାଇ ୩୧ ସୁଦ୍ଧା ୭ କୋଟି ୨୮ ଲକ୍ଷରୁ ଅଧିକ ଲୋକ ଆଇଟିଆର ଫାଇଲ୍ କରି ଏକ ବଡ଼ ରେକର୍ଡ ସୃଷ୍ଟି କରିଛନ୍ତି ।
ସେପଟେ ଆୟକର ଦାଖଲ ହେଉଥିବା ଓ୍ବେବସାଇଟ୍ରେ ତ୍ରୁଟି ଥିବା ନେଇ ଅଭିଯୋଗ କରିବା ସହ ଆଇଟିଆର ଫାଇଲର ଡେଡଲାଇନ୍ ଘୁଞ୍ଚାଇବାକୁ ମଧ୍ୟ ଦାବି ହୋଇଛି । କିନ୍ତୁ ଗତବର୍ଷ ଭଳି ଏଥର ମଧ୍ୟ ସରକାର ଅଧିକ ସମୟ ଦେଇ ନାହାନ୍ତି । ୨୦୨୩ରେ ଏହି ସମୟ ଅବଧି ମଧ୍ୟରେ ୬.୭୭ କୋଟିରୁ ଅଧିକ ଲୋକ ଆଇଟିଆର ଭରିଥିଲେ । ୨୦୨୪ରେ ଏହି ସଂଖ୍ୟାରେ ଆଶାତୀତ ବୃଦ୍ଧି ହୋଇଥିବା ବେଳେ ନୂଆ କର ବ୍ୟବସ୍ଥାକୁ ସର୍ବାଧିକ ଲୋକ ବାଛିଛନ୍ତି । ସେହିଭଳି ପୁରୁଣା କର ବ୍ୟବସ୍ଥା ଅନୁସାରେ ୨.୦୧ କୋଟି ଲୋକ ଆୟକର ରିଟର୍ଣ୍ଣ ଭରିଛନ୍ତି ।
ଚଳିତ ବର୍ଷ ନୂଆ କରଦାତାଙ୍କ ସଂଖ୍ୟାରେ ମଧ୍ୟ ବୃଦ୍ଧି ଘଟିଛି । ୫୮.୫୭ ଲକ୍ଷ ଲୋକ ପ୍ରଥମ ଥର ଲାଗି ଆଇଟିଆର ଫାଇଲ କରିଥିବା ନେଇ ଜଣାପଡ଼ିଛି । ଆୟକର ବିଭାଗ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ସୂଚନା ଦେଇଛି ଯେ, ଆୟକର ରିଟର୍ଣ୍ଣ ଫାଇଲ କରିବାର ଶେଷ ଦିନିରେ ଅର୍ଥାତ ଜୁଲାଇ ୩୧ ସଂଧ୍ୟା ସୁଦ୍ଧା ୫୦ ଲକ୍ଷରୁ ଅଧିକ ଆଇଟିଆର ଦାଖଲ ହୋଇଛି । ଏତେ ସଂଖ୍ୟାରେ ଆଇଟିଆର ଫାଇଲ କରିଥିବାରୁ ଦେଶବାସୀଙ୍କୁ ଧନ୍ୟବାଦ ଜଣାଇଛି ଆୟକର ବିଭାଗ ।
