ଭୁବନେଶ୍ୱର,୧୧/୦୮: ସ୍ୱାଧୀନତା ଦିବସ  ପାଇଁ ଆରମ୍ଭ ହୋଇଗଲାଣି ପ୍ରସ୍ତୁତି ପର୍ବ । କିଏ  ଜାତୀୟ ପତାକା କିଣୁଛି ତ ଆଉ କିଏ ତ୍ରିରଙ୍ଗା ରଙ୍ଗ  ଥିବା ବିଭିନ୍ନ ଅଳଙ୍କାର । କିଏ ଘର ସଜେଇବା ପାଇଁ  ବେଲୁନ କିଣୁଛି ତ ଆଉ କିଏ ଗାଡ଼ି ସଜେଇବା  ପାଇଁ ପତାକା । ସ୍ୱାଧୀନତାର ଏହି ପର୍ବକୁ ପାଳିବା  ପାଇଁ ସମସ୍ତଙ୍କ ମନରେ ଭରିଗଲାଣି ଉତ୍କଣ୍ଠା ।  ବିଶେଷକରି ପ୍ରଧାନମନ୍ତ୍ରୀଙ୍କ ‘ହର ଘର ତ୍ରିରଙ୍ଗା’  କ୍ୟାମ୍ପେନ୍‌ ପାଇଁ ଆଗୁଆ ପତାକା କିଣିବା ଆରମ୍ଭ  ହୋଇଗଲାଣି । ସେଥପାଇଁ ରାଜଧାନୀ ପୂରା  ତ୍ରିରଙ୍ଗାରେ ରଙ୍ଗାୟିତ ।  

ସ୍ୱାଧୀନତା ଦିବସ ପାଖେଇ ଆସୁଥିବାରୁ  ଛୋଟପିଲାଙ୍କଠୁ ଆରମ୍ଭ କରି ବୟସ୍କ ପର୍ଯ୍ୟନ୍ତ  ସମସ୍ତେ ବଜାର ମୁହାଁ ହେଲେଣି । ଯୁବପିଢ଼ି ବଡ଼ ପତାକା କିଣୁଥିବା ବେଳେ ଛୋଟ ପିଲାମାନେ ଛୋଟ  ପତାକା, ବେଲୁନ, ହାତ ବ୍ୟାଣ୍ଡ୍‌ ଭଳି ବିଭିନ୍ନ ସାମଗ୍ରୀ  କିଣୁଛନ୍ତି । ଛୋଟ ପତାକା ଗୁଡ଼ିକର ମୂଲ୍ୟ ୧୦  ଟଙ୍କାରୁ ଆରମ୍ଭ କରି ୫୦ ଟଙ୍କା ପର୍ଯ୍ୟନ୍ତ ରହିଥିବା  ବେଳେ ବଡ଼ ପତାକାଗୁଡ଼ିକ ଶହେ ଟଙ୍କାରୁ ଆରମ୍ଭ  କରି ୫ଶହ ଟଙ୍କା ପର୍ଯ୍ୟନ୍ତ ରହିଛି । ଏହା ବ୍ୟତୀତ  ଟୋପି, ଝିଅମାନଙ୍କର ହେୟାର କ୍ଲିପ୍‌, ରିବନ ଫିତା,  ପତାକା ଷ୍ଟାଣ୍ଡ, ବ୍ୟାଜ୍‌, ହାତ ବ୍ୟାଣ୍ଡ୍‌, ବେଲୁନ ଭଳି  ବିଭିନ୍ନ ସାମଗ୍ରୀ ୧୦ ଟଙ୍କାରୁ ଆରମ୍ଭ ହୋଇ ୧୫୦  ଟଙ୍କା ପର୍ଯ୍ୟନ୍ତ ରହୁଛି । ଏକ ନମ୍ବର ହାଟରେ ପତାକା  ଦୋକାନୀ ଅରୁଣ ବାରିକ କୁହନ୍ତି, ସ୍କୁଲପିଲାମାନେ  ନିଜ ଅଭିଭାବକଙ୍କ ସହିକ ଏହିସବୁ ସାମଗ୍ରୀ  କିଣିବାକୁ ଅଧିକ ଆସୁଛନ୍ତି । ଏଗୁଡ଼ିକ ମୁଖ୍ୟତଃ  ଏକ ନମ୍ବର ହାଟ, ଖଣ୍ଡଗିରି, ପଟିଆ, ରସୁଲଗଡ଼  ଭଳି ବିଭିନ୍ନ ଛକରେ ବିକ୍ରି ହେଉଛି ।  

ସ୍ୱାଧୀନତା ଦିବସରେ ମହିଳାମାନଙ୍କ ପାଇଁ ମଧ୍ୟ  ବିଭିନ୍ନ ଦୋକାନ ତଥା କେତେକ ଘରୋଇ ସଂସ୍ଥା  ବିଭିନ୍ନ ସାଜସଜ୍ଜା ସାମଗ୍ରୀ ସଜେଇ ସାରିଲେଣି ।  ବିଶେଷକରି ତ୍ରିରଙ୍ଗା ଅଳଙ୍କାର ମହିଳାଙ୍କର ପ୍ରଥମ  ପସନ୍ଦ ପାଲଟିଛି । ଯାହାର ମୂଲ୍ୟ ୫୦ ଟଙ୍କାରୁ ଆରମ୍ଭ  ହୋଇ ୩ଶହ ଟଙ୍କା ପର୍ଯ୍ୟନ୍ତ ରହିଛି । ଏଥିରେ  କାନଫୁଲଠୁ ଆରମ୍ଭ କରି ମୁଦି,ହାର ଚୁଡ଼ି ପର୍ଯ୍ୟନ୍ତ  ରହୁଛି । ଏଥିସହିତ ତ୍ରିରଙ୍ଗା ଶାଢ଼ି, କୁର୍ତ୍ତା, ଓଢ଼ଣିର  ମୂଲ୍ୟ ୨ଶହ ଟଙ୍କାରୁ ଆରମ୍ଭ ହୋଇ ହଜାରେ ଟଙ୍କା  ପର୍ଯ୍ୟନ୍ତ ରହୁଛି । ପ୍ରତିବର୍ଷ ସ୍ୱାଧୀନତା ଦିବସରେ  ତ୍ରିରଙ୍ଗା ଅଳଙ୍କାର ବିକ୍ରି କରୁଥିବା ଡ. ପ୍ରିୟଙ୍କା ମିଶ୍ର  କହନ୍ତି, ସ୍ୱାଧୀନତା ଦିବସ ଏବଂ ଗଣତନ୍ତ୍ର ଦିବସର  ମାସେ ପୂର୍ବରୁ ମୋତେ ବହୁତ ଅଳଙ୍କାର ପାଇଁ  ବରାଦି ଆସିଥିଏ । ଚଳିତ ବର୍ଷ ମଧ୍ୟ ଅନେକ  ବରାଦି ରହିଛି । 

ମୁଁ ଉଭୟ ଅନଲାଇନ୍‌ ଓ  ଅଫଲାଇନ୍‌ ବଜାରରେ ନିଜର ସାମଗ୍ରୀ ବିକ୍ରି  କରେ । ଅଧିକାଂଶ ମହିଳା ଗଣମାଧ୍ୟମରୁ ବିଭିନ୍ନ  ଡିଜାଇନ୍‌ ଦେଖି ସେହିଭଳି ଅଳଙ୍କାର ପ୍ରସ୍ତୁତ  କରିବାକୁ କହୁଛନ୍ତି । ଏଥିସହିତ ସରକାରୀ  ଅଧିକାରୀ ଏବଂ ସ୍କୁଲ, କଲେଜଗୁଡ଼ିକରେ ଖଦି  ପତାକା ଅଧିକ କିଣୁଛନ୍ତି । ରାମ ମନ୍ଦିର ସମ୍ମୁଖରେ  ଥିବା ଖଦି ବୋର୍ଡ ଅଧିକାରୀ ବେଣୁଧର ପ୍ରଧାନ  କୁହନ୍ତି, ଲୋକମାନଙ୍କର ଖଦି ପତାକା ପ୍ରତି ବେଶ୍‌  ଚାହିଦା ବଢୁଛି । ଏବେ ଠାରୁ ଅନେକ ଲୋକ ପତାକା  କିଣିବା ଆରମ୍ଭ କରିଦେଲେଣି । ପତାକାର ଲମ୍ବ  ଅନୁଯାୟୀ ମୂଲ୍ୟ ଧାର୍ଯ୍ୟ ହୋଇଥାଏ ।