ବିଶାଖାପଟ୍ଟନମ୍,୦୨/୦୨: ଶୁକ୍ରବାର ଘରୋଇ ଭାରତ ଓ ଇଂଲଣ୍ଡ ମଧ୍ୟରେ ଦ୍ୱିତୀୟ ଟେଷ୍ଟ ଆରମ୍ଭ ହେବାକୁ ଯାଉଛି । ଏସିଏ-ଭିଡିସିଏ ଷ୍ଟାଡ଼ିୟମ୍ରେ ଏହି ମ୍ୟାଚ୍ ଖେଳାଯିବ । ପ୍ରଥମ ଟେଷ୍ଟ ପରାଜିତ ହୋଇସାରିଥିବା ଭାରତ ପାଇଁ ପ୍ରତ୍ୟାବର୍ତ୍ତନ ଜରୁରି ହୋଇଯାଇଛି । ଏଥିପାଇଁ ଦଳ ସବୁ ଶକ୍ତି ଖଟାଇବାକୁ ପ୍ରସ୍ତୁତ ।
ସିରିଜକୁ ଫେରିବା ଘରୋଇ ଦଳ ପାଇଁ ବଡ଼ ଚ୍ୟାଲେଞ୍ଜ ରୂପେ ଉଭା ହୋଇଥିବାବେଳେ ସଂଘର୍ଷ କରୁଥିବା ଯୁବ ଭାରତୀୟ ବ୍ୟାଟରଙ୍କ ପାଇଁ ସୁଇଂ ସମ୍ରାଟ୍ ଜେମ୍ସ ଆଣ୍ଡରସନ୍ ବଡ଼ ଚ୍ୟାଲେଞ୍ଜ ରୂପେ ଉଭା ହୋଇଛନ୍ତି । ପ୍ରଥମ ଟେଷ୍ଟ ଜିତି ମନୋବଳ ଦୃଢ କରିଥିବା ଇଂଲଣ୍ଡ ମଧ୍ୟ ଇତିହାସ ରଚିବାକୁ ଅପେକ୍ଷା କରିଛି । ୨୦୧୨/୧୩ରେ ଇଂଲଣ୍ଡ ଏଠାରେ ଟେଷ୍ଟ ସିରିଜ ଜିତିଥିଲା । ଏଥର ମଧ୍ୟ ବାଜବଲ୍ ରଣନୀତିକୁ ଭାରତରେ ସଫଳ କରି ସିରିଜ ହାତେଇବାକୁ ଇଂଲଣ୍ଡ ପ୍ରସ୍ତୁତ ରହିଛି ।
ରୋହିତଙ୍କ ଉପରେ ନଜର: ନେତୃତ୍ୱ ଓ ରଣକୌଶଳ ବ୍ୟତୀତ ରୋହିତଙ୍କ ବ୍ୟାଟିଂକୁ ନେଇ ବେଶ୍ ଆଲୋଚନା ଚାଲିଛି । ଭଲ ଆରମ୍ଭ ସତ୍ତେ୍ୱ ରୋହିତ ବଡ ଇନିଂସ ଖେଳିବାରେ ବିଫଳ ହେଉଛନ୍ତି । ବିରାଟ କୋହଲି ନଥିବାରୁ ରୋହିତଙ୍କ ଅଭିଜ୍ଞତା ଉପରେ ଦଳର ବ୍ୟାଟିଂ ବିଭାଗ ନିର୍ଭର କରୁଛି । ତେଣୁ ତାଙ୍କୁ ବଡ଼ ଇନିଂସ ଖେଳିବାକୁ ପଡ଼ିବ । ଏସିଏ-ଭିଡିସିଏ ଷ୍ଟାଡିୟମ୍ରେ ରୋହିତଙ୍କ ପ୍ରଦର୍ଶନ ବେଶ୍ ଚମତ୍କାର ରହିଛି । ଏଠାରେ ସେ ଖେଳିଥିବା ଏକ ଟେଷ୍ଟର ଉଭୟ ଇନିଂସରେ ଯଥାକ୍ରମେ ୧୭୬ ଓ ୧୨୭ ରନ୍ ସଂଗ୍ରହ କରିଥିଲେ।
୨ସ୍ଥାନ ପାଇଁ ୪ପ୍ରତିଦ୍ୱନ୍ଦ୍ୱୀ: ଭାରତର ଏକାଦଶ ଚୟନ ଉପରେ ସମଗ୍ର କ୍ରିକେଟ୍ ପ୍ରେମୀଙ୍କ ନଜର ରହିଛି । ବିରାଟ କୋହଲିଙ୍କ ପରେ କେ ଏଲ ରାହୁଲ ଓ ରବୀନ୍ଦ୍ର ଜାଡେଜା ନଥିବାରୁ ୨ଟି ସ୍ଥାନ ପାଇଁ ୪ଜଣ ଖେଳାଳିଙ୍କ ମଧ୍ୟରେ ପ୍ରତିଦ୍ୱନ୍ଦ୍ୱିତା ହେବ । ବ୍ୟାଟିଂ ବିଭାଗରେ ୫ନଂ ସ୍ଥାନ ଖାଲି ରହିଛି । ରାହୁଲ ଏହି ସ୍ଥାନରେ ଖେଳୁଥିଲେ । ସେହିପରି ରବିନ୍ଦ୍ର ଜାଡେଜାଙ୍କ ସ୍ଥାନ ପାଇଁ ୱାସିଂଟନ ସୁନ୍ଦର ଦୌଡ଼ରେ ରହିଥିଲେ ହେଁ କୁଲଦୀପ ଯାଦବଙ୍କୁ ଅଗ୍ରଧିକାର ମିଳିବ ।
ପାତିଦାର ବନାମ ସର୍ଫରାଜ
ଶୁକ୍ରବାର ରଜିତ ପାତିଦାର ଓ ସର୍ଫରାଜ ଖାନ୍ଙ୍କ ମଧ୍ୟରୁ ଜଣେ ପଦାର୍ପଣ କରିବା ନିଶ୍ଚିତ । ମାତ୍ର ଟସ୍ ପର୍ଯ୍ୟନ୍ତ ଅପେକ୍ଷା କରିବାକୁ ପଡ଼ିବ । ଉଭୟ ଭାରତ ଏ’ ପକ୍ଷରୁ ଇଂଲଣ୍ଡ ଏ’ ବିପକ୍ଷ ଅନଫିସିଆଲ୍ ଟେଷ୍ଟରେ ଶତକ ଅର୍ଜନ କରିଥିଲେ । ପାତିଦାରଙ୍କ ବ୍ୟାଟିଂ ଟେକ୍ନିକ୍ ଟେଷ୍ଟ ପାଇଁ ଉପଯୁକ୍ତ । ମାତ୍ର ସର୍ଫରାଜ ଗତ ୪ବର୍ଷ ହେଲା ରଣଜୀ ଟ୍ରଫିରେ ଚମତ୍କାର ପ୍ରଦର୍ଶନ କରି ଚୟନକର୍ତ୍ତାଙ୍କୁ ବାରମ୍ବାର ଆକର୍ଷିତ କରିଛନ୍ତି । ଉଭୟ ସ୍ପିନରଙ୍କ ବିପକ୍ଷରେ ଖେଳିବାରେ ସିଦ୍ଧହସ୍ତ ।
ସର୍ଫରାଜ ଇଂଲଣ୍ଡ-ଏ ବିପକ୍ଷ ମୁକାବିଲାର ପ୍ରଥମ ଇନିଂସରେ ୧୬୧ ରନ୍ର ଇନିଂସ ଖେଳିଥିଲେ । ଗତ କିଛି ବର୍ଷ ହେଲା ରଣଜୀ ଟ୍ରଫିରେ ସର୍ଫରାଜଙ୍କ ପ୍ରଦର୍ଶନ ଚିତ୍ତାକର୍ଷକ ରହିଥିଲା । ୪୫ଟି ମ୍ୟାଚ୍ରୁ ସେ ୬୯.୮୫ ହାରରେ ମୋଟ୍ ୩୯୧୨ ରନ୍ ସଂଗ୍ରହ କରିସାରିଛନ୍ତି । ଏଥିରେ ୧୪ଟି ଶତକ ରହିଛି । ରଣଜୀ ଟ୍ରଫିରେ ସେ ଗୋଟିଏ ତ୍ରିଶତକ ଓ ୨ଟି ଦ୍ୱିଶତକ ଅର୍ଜନ କରିସାରିଛନ୍ତି । ପାତିଦାର ମଧ୍ୟ ପଛରେ ନାହାନ୍ତି । ପ୍ରଥମ ଶ୍ରେଣୀ କ୍ରିକେଟ୍ରେ ସେ ୫୩.୪୮ହାରରେ ୪୦୦୦ ରନ୍ ସଂଗ୍ରହ କରିସାରିଛନ୍ତି । ଏଥିରେ ୧୨ଟି ଶତକ ରହିଛି ।
ଆଣ୍ଡରସନ୍, ବଶିର ଖେଳିବେ: ଦ୍ୱିତୀୟ ଟେଷ୍ଟ ପାଇଁ ଇଂଲଣ୍ଡ ଚୂଡ଼ାନ୍ତ ଏକାଦଶ ଘୋଷଣା କରିସାରିଛି । ପ୍ରଥମ ଟେଷ୍ଟ ଭଳି ଇଂଲଣ୍ଡ ଏଥର ମଧ୍ୟ ୩ଜଣ ସ୍ପିନରଙ୍କୁ ନେଇ ଗ୍ରାଉଣ୍ଡକୁ ଓହ୍ଲାଇବ । ଜ୍ୟାକ୍ ଲିଚ୍ ଆହତ ହୋଇ ଦ୍ୱିତୀୟ ଟେଷ୍ଟରୁ ବାଦ ପଡ଼ିଛନ୍ତି । ଫଳରେ ତାଙ୍କ ସ୍ଥାନରେ ସୋହେବ ବଶିର ପଦାର୍ପଣ କରିବେ । ସେହିପରି ପ୍ରଥମ ଟେଷ୍ଟ ଖେଳିଥିବା ମାର୍କ ଉଡ୍ଙ୍କ ସ୍ଥାନରେ ଜେମ୍ସ ଆଣ୍ଡରସନ୍ ଏକାଦଶକୁ ଫେରିବେ ।
ଟସ୍ ଜିତିଲେ ବ୍ୟାଟିଂ: ବିଶାଖାପଟ୍ଟନମ୍ ପିଚ୍ ସ୍ପିନରଙ୍କୁ ସହାୟତା କରିବା ନିଶ୍ଚିତ । ମାତ୍ର ପ୍ରଥମ ଦିନରୁ ବଲ୍ ଟର୍ଣ୍ଣ କରିବାର ସମ୍ଭାବନା ନାହିଁ। ସମୟ କ୍ରମେ ପିଚ୍ ଶୁଷ୍କ ହେବା ସହ ସ୍ପିନରମାନେ ପିଚ୍ରୁ ଫାଇଦା ଉଠାଇ ପାରିବେ । ପ୍ରଥମ ୨ ଦିନରେ ପିଚ୍ ବ୍ୟାଟିଂ ପାଇଁ ଅନୁକୂଳ ରହିବ । ଫଳରେ ଟସ ବିଜୟୀ ଦଳ ବ୍ୟାଟିଂ କରିବା ନିଶ୍ଚିତ । ସ୍ଥାନୀୟ ଜଳବାୟୁ ଅନୁଯାୟୀ ପୁରୁଣା ବଲ୍ ରିଭର୍ସ ସୁଇଂ କରିବା ଆଶା କରାଯାଉଛି । ପୂର୍ବରୁ ମଧ୍ୟ ପେସ ବୋଲରମାନେ ଏଠାରେ ରିଭର୍ସ ସୁଇଂ କରି ବିପର୍ଯ୍ୟୟ ଘଟାଇଛନ୍ତି । ୨୦୧୯ରେ ଅନୁଷ୍ଠିତ ଦକ୍ଷିଣ ଆଫ୍ରିକା ବିପକ୍ଷ ଟେଷ୍ଟରେ ମହମ୍ମଦ ସାମି ଚତୁର୍ଥ ଇନିଂସରେ ରିଭର୍ସ ସୁଇଂ କରି ୫ଟି ୱିକେଟ୍ ନେଇଥିଲେ ।
ସମ୍ଭାବ୍ୟ ଦଳ
ଭାରତ: ରୋହିତ ଶର୍ମା(ଅଧିନୟେକ), ଯଶସ୍ୱୀ ଜୈସ୍ୱାଲ, ଶୁଭମନ ଗିଲ୍, ଶ୍ରେୟାସ ଆୟର, ରଜତ ପାତିଦାର/ସର୍ଫରାଜ ଖାନ, ଅକ୍ଷର ପଟେଲ, କେଏସ ଭରତ, ଆର ଅଶ୍ୱିନ, କୁଲଦୀପ ଯାଦବ/ୱାସିଂଟନ ସୁନ୍ଦର, ଯଶପ୍ରୀତ ବୁମରା, ମହମ୍ମଦ ସିରାଜ ।
ଇଂଲଣ୍ଡ: ଜ୍ୟାକ୍ କ୍ରଲି, ବେନ ଡକେଟ୍, ଓଲି ପୋପ, ଜୋ ରୁଟ୍, ଜନି ବେୟାରଷ୍ଟୋ, ବେନ ଷ୍ଟୋକ୍ସ(ଅଧିନାୟକ), ରେହାନ ଅହମ୍ମଦ, ଟମ ହାର୍ଟଲି, ସୋହେବ ବଶିର, ଜେମ୍ସ ଆଣ୍ଡରସନ ।
