ନୂଆଦିଲ୍ଲୀ: ସୋମବାର ପାକିସ୍ତାନରେ ଥିବା ଭାରତୀୟ ଉଚ୍ଚ ଆୟୋଗର ଅଧିକାରୀ ମାନେ ପାକିସ୍ତାନର ଆଦିଆଲା ଜେଲରେ ରହୁଥିବା ଦୁଇଜଣ ଭାରତୀୟ ଯୁବକଙ୍କୁ ଭେଟିଛନ୍ତି । ଗୁପ୍ତଚର ଅଭିଯୋଗରେ ଏହି ଯୁବକ ମାନଙ୍କୁ ଚାରି ବର୍ଷ ପୂର୍ବେ ଗିରଫ କରାଯାଇଥିଲା । ନିକଟରେ ତାଙ୍କୁ ରାୱଲପିଣ୍ଡିର ଉଚ୍ଚ ସୁରକ୍ଷା ଭିତ୍ତିକ ଆଦିଆଲା ଜେଲକୁ ସ୍ଥାନାନ୍ତର କରାଯାଇଛି । ଉଭୟ ଯୁବକଙ୍କ ପରିଚୟ ୨୯ ବର୍ଷିୟ ଫିରୋଜ ଅହମ୍ମଦ ଲୋନ ଏବଂ ୨୪ ବର୍ଷିୟ ନୁହ ଅହମ୍ମଦ ୱାନି ବୋଲି ଜଣାପଡିଛି।
ପାକିସ୍ତାନରେ ଗୁପ୍ତଚର ଅଭିଯୋଗରେ ଗିରଫ ହୋଇଥିବା ଉଭୟ ଯୁବକ ଜାମ୍ମୁ କାଶ୍ମୀରର ବାନ୍ଦିହୁରା ଗୋରେଜ ଅଞ୍ଚଳର ବାସିନ୍ଦା । ଉଭୟ ଯୁବକଙ୍କୁ ୨୦୨୦ ମସିହାରେ ପାକିସ୍ତାନ ଅଧିକୃତ କାଶ୍ମୀରର ଗିଲଗିତ୍ ବାଲ୍ଟିସ୍ତାନ ଅଞ୍ଚଳରୁ ଗିରଫ କରାଯାଇଥିଲା । ନିକଟରେ ଉଭୟଙ୍କୁ ପିଓକେର ଗିଲଗିତ ବାଲ୍ଟିସ୍ତାନ ଜେଲରୁ ରାୱଲପିଣ୍ଡିର ଆଦିଆଲା ଜେଲକୁ ସ୍ଥାନାନ୍ତର କରାଯାଇଛି । ଭାରତ ସରକାରଙ୍କ ଆବେଦନ ଉପରେ ପାକିସ୍ତାନ ସରକାର ଜେଲରେ ଥିବା ଭାରତୀୟ ନାଗରିକଙ୍କୁ କନସୁଲାର ସୁବିଧା ପ୍ରଦାନ କରିଛନ୍ତି । ଏହା ପରେ ସୋମବାର ଦିନ ଭାରତୀୟ ଉଚ୍ଚାୟୋଗ ଏବଂ ଭାରତୀୟ ଗୃହ ମନ୍ତ୍ରଣାଳୟର ଏକ ଟିମ୍ ଜେଲରେ ଥିବା ଭାରତୀୟ ନାଗରିକଙ୍କୁ ଭେଟିଛନ୍ତି ।
ପାକିସ୍ତାନରେ ଥିବା ଭାରତୀୟ ଉଚ୍ଚ ଆୟୋଗ କିମ୍ବା ପାକିସ୍ତାନ ବୈଦେଶିକ କାର୍ଯ୍ୟାଳୟ ପକ୍ଷରୁ ଏପର୍ଯ୍ୟନ୍ତ କୌଣସି ପ୍ରତିକ୍ରିୟା ମିଳିନାହିଁ । ୨୦୧୮ ମସିହାରେ ଜାମ୍ମୁ କାଶ୍ମୀରରୁ ଉଭୟ ଯୁବକ ନିଖୋଜ ହୋଇଯାଇଥିଲେ । କୁହାଯାଉଛି କି, ଉଭୟ ଯୁବକ ହଠାତ୍ ସୀମା ପାର ହୋଇ ଯାଇଥିଲେ । ଆଉ ଏହି ସମୟରେ ଗୁପ୍ତଚର ଅଭିଯୋଗରେ ପାକିସ୍ତାନ ପୋଲିସ ଉଭୟଙ୍କୁ ଗିରଫ କରିଥିଲା ।