ଚେନ୍ନାଇ,୨୨/୦୩: ଗ୍ରୀଷ୍ମର ଆଗମନ ସହ ନିର୍ବାଚନ ଋତୁ ସାରା ଦେଶର ଉତ୍ତାପକୁ ବଢାଇ ଦେଇଥିବାବେଳେ କ୍ରିକେଟ୍ ଜରିଆରେ ଭରପୂର ମନୋରଞ୍ଜନ ଯୋଗାଇ ଦେବାକୁ ପ୍ରତ୍ୟାବର୍ତ୍ତନ କରିଛି ଆଇପିଏଲ୍। ଶୁକ୍ରବାରଠୁ ଆରମ୍ଭ ହେବ ୧୭ତମ ସଂସ୍କରଣ । ପ୍ରିୟ ଚିପକ ଗ୍ରାଉଣ୍ଡକୁ ଓହ୍ଲାଇବ ଡିଫେଣ୍ଡିଂ ଚାମ୍ପିଅନ୍ ଚେନ୍ନାଇ ସୁପରକିଙ୍ଗ୍ସ । ସମ୍ମୁଖରେ ରୟାଲ୍ ଚ୍ୟାଲେଞ୍ଜର୍ସ ବେଙ୍ଗାଲୁରୁ । ଦର୍ଶକଙ୍କ ଉତ୍କଣ୍ଠା ଶିଖର ଛୁଇଁଛି । ଦୀର୍ଘ ଦିନ ପରେ ଦୁଇ ପ୍ରସିଦ୍ଧ ଖେଳାଳି ମହେନ୍ଦ୍ର ସିଂହ ଧୋନି ଓ ବିରାଟ କୋହଲିଙ୍କୁ ଦେଖିବାକୁ ଦର୍ଶକ ଅପେକ୍ଷା କରିଛନ୍ତି । ଧୋନି ବର୍ଷକ ପରେ କ୍ରିକେଟ୍ ଖେଳିବେ । କୋହଲି ମଧ୍ୟ ୨ ମାସ ପରେ ଗ୍ରାଉଣ୍ଡକୁ ଓହ୍ଲାଇବେ । ବର୍ତ୍ତମାନ ଉଭୟଙ୍କ ଉପରେ ସମସ୍ତଙ୍କ ନଜର ।
ଶୁକ୍ରବାର ରାତି ୮ଟାରେ ମ୍ୟାଚ୍ ଆରମ୍ଭ ହେବ । ଏହା ପୂର୍ବରୁ ଅଧଘଣ୍ଟାର ସାଂସ୍କୃତିକ କାର୍ଯ୍ୟକ୍ରମ ରହିଛି । ପ୍ରସିଦ୍ଧ ସଙ୍ଗୀତ ନିର୍ଦ୍ଦେଶକ ଏ ଆର ରେହମାନ, କଣ୍ଠଶିଳ୍ପୀ ସୋନୁ ନିଗମଙ୍କ ସମେତ ବଲିଉଡ୍ ତାରକା ଅକ୍ଷୟ କୁମାର, ଟାଇଗର ଶ୍ରଫ୍ ଉଦ୍ଘାଟନୀ ଉତ୍ସବରେ ଯୋଗ ଦେଇ ଦର୍ଶକଙ୍କ ମନୋରଞ୍ଜନ କରିବେ । ତଥାପି ଦର୍ଶକଙ୍କ ନଜର ରହିବ ମ୍ୟାଚ୍ ଉପରେ ।
𝐈𝐭'𝐬 𝐒𝐡𝐨𝐰𝐓𝐢𝐦𝐞!
— IndianPremierLeague (@IPL) March 21, 2024
The #TATAIPL is here and WE are ready to ROCK & ROLL 🎉🥳🥁
Presenting the 9 captains with PBKS being represented by vice-captain Jitesh Sharma. pic.twitter.com/v3fyo95cWI
ଚାମ୍ପିଅନ ସୁପରକିଙ୍ଗ୍ସ ବିଜୟ ଧାରା ଜାରି ରଖିବାକୁ ପ୍ରସ୍ତୁତ । ମାତ୍ର ରୟାଲ ଚ୍ୟାଲେଞ୍ଜର୍ସ ପ୍ରଥମ ଟାଇଟଲ ପାଇଁ ବ୍ୟାକୁଳ । ମହିଳା ଦଳ ଡବ୍ଲ୍ୟୁପିଏଲ୍ ଚାମ୍ପିଅନ୍ ହେବା ପରେ ସମର୍ଥକଙ୍କ ଆଶା ବଢ଼ିଯାଇଛି । ରୟାଲ୍ ଚ୍ୟାଲେଞ୍ଜର୍ସକୁ ଏଥର ଚାମ୍ପିଅନ୍ ଭାବେ ଦେଖିବାକୁ ସମର୍ଥକ ବ୍ୟାକୁଳତାର ସହ ଅପେକ୍ଷା କରିଛନ୍ତି । କୋହଲି ମଧ୍ୟ ଟ୍ରଫି ଉଠାଇବାର ଅଭିଳାଷକୁ ଏଥର ପୂରଣ କରିବାକୁ ଆଶାବାଦୀ ।
ସିଜନ ଆରମ୍ଭ ହେଉଥିବାରୁ ସମ୍ଭାବ୍ୟ ଏକାଦଶ ପ୍ରସ୍ତୁତ କରିବା କଷ୍ଟକର । ତଥାପି ରଜତ ପାତିଦାର ଓ କାମେରନ ଗ୍ରୀନ୍ ରୟାଲ ଚ୍ୟାଲେଞ୍ଜର୍ସ ଏକାଦଶରେ ସ୍ଥାନ ପାଇବା ନିଶ୍ଚିତ । ପୂର୍ବ ସିଜନ ଭଳି ଫାଫ ଡୁ ପ୍ଲେସି ଓ ବିରାଟ କୋହଲି ପାଳି ଆରମ୍ଭ କରିବେ । ଋତୁରାଜ ପ୍ରଥମ କରି ସୁପରକିଙ୍ଗ୍ସର ନେତୃତ୍ୱ ନେବାକୁ ଯାଉଛନ୍ତି । ମାତ୍ର ନଜର ରଚିନ ରବିନ୍ଦ୍ରଙ୍କ ଉପରେ ରହିବ । ଡେଭନ କନୱେଙ୍କ ସ୍ଥାନରେ ରବିନ୍ଦ୍ର ପାଳି ଆରମ୍ଭ କରିବେ । ଚିପକ୍ ପିଚ ପାରମ୍ପରିକ ଭାବେ ସ୍ପିନରଙ୍କୁ ସହାୟତା କରିଆସିଛି । ମାତ୍ର ଦ୍ୱିତୀୟ ଭାଗରେ ବ୍ୟାଟିଂ ସହଜ ହେବ । ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ ।
ସମ୍ଭାବ୍ୟ
ସୁପରକିଙ୍ଗ୍ସ ଏକାଦଶ: ଋତୁରାଜ ଗାଏକୱାଡ୍(ଅଧିନାୟକ), ରଚିନ ରବିନ୍ଦ୍ର, ଅଜିଙ୍କ୍ୟ ରାହାଣେ, ମୋଇନ ଅଲି, ଡାରିଲ ମିଚେଲ, ଶିବମ ଦୁବେ, ରବିନ୍ଦ୍ର ଜାଡେଜା, ମହେନ୍ଦ୍ର ସିଂହ ଧୋନି, ସର୍ଦୁଲ ଠାକୁର, ଦୀପକ ଚହର, ମହୀଶ ତୀକ୍ଷଣା ।
ରୟାଲ୍ ଚ୍ୟାଲେଞ୍ଜର୍ସ ଏକାଦଶ: ଫାଫ ଡୁ ପ୍ଲେସି(ଅଧିନାୟକ), ବିରାଟ କୋହଲି, ରଜତ ପାତିଦାର, ଗ୍ଲେନ୍ ମ୍ୟାକ୍ସୱେଲ୍, କାମେରନ ଗ୍ରୀନ, ଅନୁଜ ରାୱତ, ଦିନେଶ କାର୍ତ୍ତିକ, ଅଲଜାରୀ ଯୋଶେଫ, ମୟଙ୍କ ଡଗର, ଆକାଶଦୀପ, ମହମ୍ମଦ ସିରାଜ ।
