ନୂଆଦିଲ୍ଲୀ,୧୮/୦୪: ଆଗାମୀ ଟି-ଟ୍ୱେଣ୍ଟି ବିଶ୍ୱକପ୍ ପାଇଁ ପ୍ରତ୍ୟେକ ଦଳ ୧୫ ଜଣିଆ ଖେଳାଳି ତାଲିକା ଆସନ୍ତା ମେ’ ୧ ତାରିଖ ସୁଦ୍ଧା ଘୋଷଣା କରିବେ । ତେଣୁ ଯାହା ଆଶା କରାଯାଉଛି, ଚଳିତ ମାସ ଶେଷ ସପ୍ତାହରେ ଭାରତୀୟ ଦଳ ଘୋଷଣା ହେବ । କିନ୍ତୁ ଏହା ପୂର୍ବରୁ କେଉଁମାନେ ବିଶ୍ୱକପ୍ ଦଳରେ ସାମିଲ ହେବେ ତାହାକୁ ନେଇ ଆଲୋଚନା ଆରମ୍ଭ ହୋଇଛି ।
ଏକ ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ, କୌଣସି ନବାଗତଙ୍କୁ ଆଇପିଏଲ ପ୍ରଦର୍ଶନ ଆଧାରରେ ସିଧାସଳଖ ବିଶ୍ୱକପ୍ ଦଳରେ ସୁଯୋଗ ମିଳିନପାରେ । ସେହିପରି ଅଭିଜ୍ଞ ନିୟମିତ ଖେଳାଳିଙ୍କ ମଧ୍ୟରୁ କିଛି ନିରାଶ ହୋଇପାରନ୍ତି । ଅନ୍ତର୍ଜାତୀୟ ଟି-ଟ୍ୱେଣ୍ଟି ଏବଂ ଆଇପିଏଲ ପ୍ରଦର୍ଶନ ଆଧାରରେ ଖେଳାଳି ୧୫ ଜଣିଆ ଦଳରେ ସ୍ଥାନ ପାଇବେ ।
ସମ୍ଭାବ୍ୟ ୨୦ ଜଣିଆ ଖେଳାଳିଙ୍କୁ ନେଇ ଚର୍ଚ୍ଚା ଜୋର ଧରିଛି । ସେହି ଖେଳାଳିମାନଙ୍କ ମଧ୍ୟରେ ଅଛନ୍ତି ସ୍ପେଶାଲିଷ୍ଟ ବ୍ୟାଟର - ରୋହିତ ଶର୍ମା, ଯଶସ୍ୱୀ ଜୈସ୍ୱାଲ, ଶୁଭମନ ଗିଲ, ବିରାଟ କୋହଲି, ସୂର୍ଯ୍ୟକୁମାର ଯାଦବ ଓ ରିଙ୍କୁ ସିଂ ଅଲରାଉଣ୍ଡ - ହାର୍ଦ୍ଦିକ ପାଣ୍ଡ୍ୟା, ରବିନ୍ଦ୍ର ଜାଡେଜା, ଶିବମ ଦୁବେ ଓ ଅକ୍ଷର ପଟେଲ ସ୍ପେଶାଲିଷ୍ଟ ସ୍ପିନର- ୟୁଝବେନ୍ଦ୍ର ଚହଲ, କୁଲଦୀପ ଯାଦବ ଓ ରବି ବିଷ୍ଣୋଇ ଏବଂ ଦ୍ରୁତ ବୋଲର- ଯଶପ୍ରୀତ ବୁମରା, ମହମ୍ମଦ ସିରାଜ, ଅର୍ଶଦୀପ ସିଂ ଓ ଅଭେଶ ଖାନ । ସେହିପରି ୱିକେଟ୍କିପର ତାଲିକାରେ ରିଷଭ ପନ୍ତ, କେଏଲ୍ ରାହୁଲ ଓ ସଞ୍ଜୁ ସାମସନ ରହିଛନ୍ତି । ଏହି ୨୦ ଜଣିଆ ତାଲିକାରୁ ୫ ଖେଳାଳି ବାଦ ପଡ଼ିବେ । କିଏ ଦଳରେ ରହିବେ ଏବଂ କିଏ ବାଦ ପଡ଼ିବେ ଆଉ ଗୋଟିଏ ସପ୍ତାହ ମଧ୍ୟରେ ସ୍ପଷ୍ଟ ହୋଇଯିବ ।
