ନୂଆଦିଲ୍ଲୀ,୩୧/୦୩: ଆଗାମୀ ଟି-ଟ୍ୱେଣ୍ଟି ବିଶ୍ୱକପ୍ ପାଇଁ ଏପ୍ରିଲ ଶେଷ ସପ୍ତାହରେ ଭାରତୀୟ ଦଳ ଘୋଷଣା କରାଯିବ । ଆଇସିସି ମେ ମାସ ୧ ତାରିଖକୁ ଦଳ ଘୋଷଣାର ଶେଷ ତାରିଖ ଧାର୍ଯ୍ୟ କରିଛି । ବର୍ତ୍ତମାନ ଭାରତର ପ୍ରାୟ ସମସ୍ତ ଖେଳାଳି ଆଇପିଏଲ୍ ଖେଳିବାରେ ବ୍ୟସ୍ତ । ଚୟନ କିମିଟି ସେମାନଙ୍କ ପ୍ରଦର୍ଶନ ଉପରେ ନଜର ରଖିଛନ୍ତି ।
ଆମେରିକା ଓ ୱେଷ୍ଟ ଇଣ୍ଡିଜ୍ ମିଳିତ ଭାବେ ଟି-ଟ୍ୱେଣ୍ଟି ବିଶ୍ୱକପ୍ ଆୟୋଜନ କରୁଛନ୍ତି । ବିଭିନ୍ନ ପର୍ଯ୍ୟାୟରେ ଭାରତୀୟ ଦଳ ଆମେରିକା ଯାତ୍ରା କରିବ । ମେ ୧୯ ତାରିଖରେ ଆଇପିଏଲ୍ର ଲିଗ୍ ପର୍ଯ୍ୟାୟ ଶେଷ ହେବ । ପ୍ଲେ-ଅଫ୍ରୁ ବାଦ ପଡ଼ିଥିବା ଦଳରେ ରହିଥିବା ଭାରତୀୟ ଦଳର ସଦସ୍ୟ ଆଗୁଆ ନ୍ୟୁୟର୍କ ଯାତ୍ରା କରିବେ । ପ୍ଲେ-ଅଫ୍ରେ ପ୍ରବେଶ କରିଥିବା ୪ଟି ଦଳରେ ରହିଥିବା ଭାରତୀୟ ଦଳର ସଦସ୍ୟ ଦ୍ୱିତୀୟ ପର୍ଯ୍ୟାୟରେ ଯାତ୍ରା କରିବେ । ଏଥର ଭାରତୀୟ ଦଳ ସହ ଆଉ କିଛି ଅତିରିକ୍ତ ଖେଳାଳିଙ୍କୁ ସାମିଲ କରାଯିବ । ଟୁର୍ଣ୍ଣାମେଣ୍ଟ ସମୟରେ କୌଣସି ଖେଳାଳି ଆହତ ହେଲେ ସେମାନଙ୍କ ସ୍ଥାନ ପୂରଣ କରିବା ସହଜ ହେବ ।