କୋଲକାତା - ଆଇପିଏଲ -୨୦୨୪ର ୧୭ତମ ସିଜନର ୪୭ତମ ମ୍ୟାଚ୍ରେ ଆଜି କୋଲକାତା ନାଇଟ୍ ରାଇଡର୍ସ (କେକେଆର) ଓ ଦିଲ୍ଲୀ କ୍ୟାପିଟାଲ୍ସ (ଡିସି) ମୁହାଁମୁହିଁ ହୋଇଛନ୍ତି। ଉଭୟ ଟିମ୍ ମଧ୍ୟରେ ଏହି ମୁକାବିଲା କୋଲକାତାର ଐତିହାସିକ ଇଡେନ ଗାର୍ଡେନ୍ସରେ ଖେଳାଯାଉଛି। ଉକ୍ତ ମ୍ୟାଚ୍ରେ ଦିଲ୍ଲୀ କ୍ୟାପିଟାଲ୍ସ , କୋଲକାତାକୁ ୧୫୪ରନ୍ ଟାର୍ଗେଟ୍ ଦେଇଛି। କୋଲକାତା ନାଇଟ୍ ରାଇଡର୍ସ ବର୍ତ୍ତମାନର ଆଇପିଏଲ ସିଜନରେ ଏବେସୁଦ୍ଧା ୮ଟି ମଧ୍ୟରୁ ୫ଟି ମୁକାବିଲା ଜିତି ପାରିଛି। ଅନ୍ୟପଟେ ଦିଲ୍ଲୀ କ୍ୟାପିଟାଲ୍ସ ୧୦ଟି ମ୍ୟାଚ୍ ଖେଳି ୫ଟିରେ ବିଜୟ ହାସଲ କରିଛି।
ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ଆସିଥିବା ଦିଲ୍ଲୀ କ୍ୟାପିଟାଲ୍ସ ୨୦ ଓଭରରେ ୯ ୱିକେଟ୍ରେ ୧୫୩ ରନ୍ କରିଛି। ଦିଲ୍ଲୀ କ୍ୟାପିଟାଲ୍ସ ପାଇଁ କୁଲଦୀପ ଯାଦବ ସବୁଠୁ ଅଧିକ ଅପରାଜେୟ ଭାବେ ୩୫ ରନ୍ କରିଥିବା ବେଳେ, ଅଧିନାୟକ ରିଷଭ ପନ୍ତ ୨୦ଟି ବଲରେ ୨୭ ରନ କରି ପାରିଛନ୍ତି। ଯେଉଁଥିରେ ରହିଛି ୨ଟି ଚୌକା ଓ ଗୋଟିଏ ଛକା ।
ଏହା ବ୍ୟତୀତ ଅଭିଷେକ ପୋରେଲ ୧୮ ଓ ଅକ୍ଷର ପଟେଲ ୧୫ ରନ୍ କରିଛନ୍ତି। କେକେଆରର ବରୁଣ ଚକ୍ରବର୍ତ୍ତୀ ସବୁଠୁ ଅଧିକ ୩ଟି ୱିକେଟ୍ ନେଇଛନ୍ତି। ସେପଟେ ବୈଭବ ଅରୋରା ଓ ହର୍ଷିତ ରାଣାଙ୍କୁ ୨-୨ ୱିକେଟ୍ ମିଳିଛି।
ଉକ୍ତ ମୁକାବିଲା ପାଇଁ ଦୁଇ ଟିମ୍ରେ ବଡ଼ ପରିବର୍ତ୍ତନ ହୋଇଛି। କୋଲକାତା ନାଇଟ୍ ରାଇଡର୍ସର ଦ୍ରୁତ ବୋଲର ମିଚେଲ ଷ୍ଟାର୍କ ଆହତ ସମସ୍ୟାରୁ ବାହାରି ଏହି ମ୍ୟାଚ୍ରେ ଖେଳିଛନ୍ତି। ଯେଉଁଥି ପାଇଁ ଦୁଷ୍ମନ୍ତା ଚମିରାଙ୍କୁ ବାହାରେ ରହିବାକୁ ପଡ଼ିଛି। ଦ୍ରୁତ ବୋଲର ବୈଭବ ଅରୋରାଙ୍କୁ ମଧ୍ୟ ଏହି ମ୍ୟାଚରେ ସୁଯୋଗ ମିଲିଛି। ଅନ୍ୟପଟେ ଦିଲ୍ଲୀ କ୍ୟାପିଟାଲ୍ସର ପ୍ଲେଇଂ-୧୧ରେ ଓପନର ପୃଥ୍ୱୀ ଶ’ଙ୍କ ପ୍ରତ୍ୟାବର୍ତ୍ତନ ହୋଇଛି ।