କୋଲକାତା,୧୬/୦୪: ଚଳିତ ଆଇପିଏଲର ୩୧ତମ ଲିଗ୍ ମୁକାବିଲାରେ ଘରୋଇ କୋଲକାତା ନାଇଟ ରାଇଡର୍ସ - ରାଜସ୍ଥାନ ରୟାଲ୍ସକୁ ଭେଟିବାକୁ ଯାଉଛି । ଏହି ମ୍ୟାଚ୍କୁ ନେଇ ଦର୍ଶକମହଲରେ ପ୍ରବଳ ଉତ୍କଣ୍ଠା ପ୍ରକାଶ ପାଇଛି । ଉଭୟ ଦଳ ପଏଣ୍ଟ ତାଲିକାର ପ୍ରଥମ ୨ଟି ସ୍ଥାନ ଦଖଲ କରିଛନ୍ତି । ରାଜସ୍ଥାନ ରୟାଲ୍ସ ୬ଟି ମ୍ୟାଚ୍ ଖେଳି ୫ ବିଜୟ ସହ ୧୦ ପଏଣ୍ଟ ହାସଲ କରି ଶୀର୍ଷରେ ରହିଛି । ୫ଟି ମ୍ୟାଚ୍ରୁ ୪ବିଜୟ ସହ ୮ ପଏଣ୍ଟ ହାସଲ କରିଥିବା ନାଇଟ୍ ରାଇଡର୍ସ ପାଇଁ ଶୀର୍ଷ ସ୍ଥାନ ହାସଲ କରିବାର ସୁଯୋଗ ରହିଛି । ନାଇଟ୍ ରାଇଡର୍ସର ରନ୍ ରେଟ୍ ଢେର ଅଧିକ ରହିଥିବାରୁ ମଙ୍ଗଳବାର ଜିତିଲେ ରାଜସ୍ଥାନ ରୟାଲ୍ସକୁ ଟପି ପାରିବ ।
ପୂର୍ବ ରେକର୍ଡ ମଧ୍ୟ ଏକ ପ୍ରକାର ବରାବର ସ୍ଥିତିରେ ରହିଛି । ଉଭୟ ଦଳ ପରସ୍ପରକୁ ୨୮ଥର ଭେଟିଛନ୍ତି । ଏଥିରୁ ନାଇଟ ରାଇଡର୍ସ ୧୪ଟି ଓ ରୟାଲ୍ସ ୧୩ଟି ମ୍ୟାଚ୍ ଜିତିଛନ୍ତି । ଗତ ସିଜନରେ ଉଭୟ ଦଳ ପରସ୍ପରକୁ ଥରେ ଭେଟିଥିଲେ ଓ ରୟାଲ୍ସ ଉକ୍ତ ମ୍ୟାଚ୍କୁ ୯ୱିକେଟ୍ରେ ଜିତିଥିଲା । ଗତ ବର୍ଷ ନାଇଟ୍ ରାଇଡର୍ସ ଦଳ ଦୁର୍ବଳ ରହିଥିଲା । ଅଧିନାୟକ ଶ୍ରେୟାସ ଆୟରଙ୍କ ସମେତ କିଛି ଖେଳାଳି ଆହତ ଥିଲେ । ଏଥର ସ୍ଥିତି ସମ୍ପୂର୍ଣ୍ଣ ଭିନ୍ନ । ଅନ୍ୟ ଦଳଗୁଡ଼ିକ ତୁଳନାରେ ନାଇଟ୍ ରାଇଡର୍ସ ଅପେକ୍ଷାକୃତ ଅଧିକ ସନ୍ତୁଳିତ । ଦଳଗତ ପ୍ରଦର୍ଶନରେ ମଧ୍ୟ ଆଗୁଆ । ପ୍ରତି ସ୍ଥାନ ପାଇଁ ପର୍ଯ୍ୟାପ୍ତ ବିକଳ୍ପ ରହିଛି । ତେଣୁ କୌଣସି ଖେଳାଳି ଆହତ ହେଲେ ମଧ୍ୟ ଦଳ ପ୍ରଭାବିତ ହେବ ନାହିଁ ।
ରାଜସ୍ଥାନ ରୟାଲ୍ସ ଚଳିତ ସିଜନରେ ଚମତ୍କାର ପ୍ରଦର୍ଶନ କରୁଛି । ଯଶସ୍ୱୀ ଜୈସ୍ୱାଲ୍, ଧ୍ରୁବ ଜୁରେଲଙ୍କ ଭଳି ଯୁବ ତାରକା ଫର୍ମ ଫେରି ପାଇ ନାହନ୍ତି । ତଥାପି ଏହା ଦଳର ପ୍ରଦର୍ଶନରେ ବାଧକ ସାଜିନାହିଁ । ରୟାଲ୍ସର ବିଜୟରେ ଅସଲ ଭୂମିକା ତୁଲାଉଛି ବୋଲିଂ ବାହିନୀ । ୟୁଝବେନ୍ଦ୍ର ଚହଲ ଓ ରବି ଚନ୍ଦ୍ରନ ଅଶ୍ୱିନଙ୍କ କୁଶଳୀ ସ୍ପିନ ବୋଲିଂ ପ୍ରତିପକ୍ଷ ପାଇଁ ଚିନ୍ତାର କାରଣ ସାଜିଛି । ପେସ୍ ବୋଲିଂ ବିଭାଗ ମଧ୍ୟ ଘାତକ ସାବ୍ୟସ୍ତ ହୋଇଛି ।
ଦିନକ ତଳେ ଲକ୍ଷ୍ନୌ ସୁପରଜାଏଣ୍ଟ୍ସକୁ ହରାଇଥିବା ନାଇଟ୍ ରାଇଡର୍ସ ମଙ୍ଗଳବାର ଦଳ ଅପରିବର୍ତ୍ତିତ ରଖିବା ଏକ ପ୍ରକାର ନିଶ୍ଚିତ । ରାଜସ୍ଥାନ ରୟାଲ୍ସ ଏକାଦଶରେ ପରିବର୍ତ୍ତନ କରିବ । ପଞ୍ଜାବ କିଙ୍ଗ୍ସ ବିପକ୍ଷ ମ୍ୟାଚ୍ ଖେଳି ନଥିବା ଜୋସ ବଟଲର ଓ ରବି ଅଶ୍ୱିନ ଫିଟ୍ ଘୋଷିତ ହୋଇଛନ୍ତି । ଉଭୟ ମଙ୍ଗଳବାର ଖେଳିବେ । ଫଳରେ ତନୁଶ କୋଟିଆନ୍, ରୋଭମାନ ପାୱେଲ୍ ଓ କେଶବ ମହାରାଜଙ୍କ ମଧ୍ୟରୁ ୨ଜଣ ବାଦ ପଡ଼ିବେ ।
ଇଡେନ ଗାର୍ଡେନ୍ସର ଆଦର୍ଶ ପିଚ ମ୍ୟାଚ୍ର ରୋମାଞ୍ଚ ବଢାଇ ଦେବ । ଫ୍ଲଡ ଲାଇଟ୍ରେ ସମ୍ପୂର୍ଣ୍ଣ ମ୍ୟାଚ୍ ଖେଳାଯିବ । ତେଣୁ ଦ୍ୱିତୀୟ ଭାଗରେ ବ୍ୟାଟିଂ ସହଜ ହେବ । ଟସ୍ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ । ମୋଟ୍ ଉପରେ ଦେଖିବାକୁ ଗଲେ ମଙ୍ଗଳବାର ଉଭୟ ଦଳର ସ୍ପିନରଙ୍କ ମଧ୍ୟରେ ଅସଲ ଲଢେଇ ଦେଖିବାକୁ ମିଳିବ ।
ସମ୍ଭାବ୍ୟ ଦଳ
ନାଇଟ୍ ରାଇଡର୍ସ: ଫିଲ୍ ସଲ୍ଟ, ସୁନୀଲ ନାରାଏନ, ଅଙ୍ଗକ୍ରୀଶ ରଘୁବଂଶୀ, ଭେଙ୍କଟେଶ ଆୟର, ଶ୍ରେୟାସ ଆୟର(ଅଧିନାୟକ), ରମଣଦୀପ ସିଂହ/ନିତିଶ ରାଣା, ଆନ୍ଦ୍ରେ ରସେଲ, ରିଙ୍କୁ ସିଂହ, ମିଚେଲ ଷ୍ଟାର୍କ, ବୈଭବ ଆରୋରା/ ହର୍ଷିତ ରାଣା, ବରୁଣ ଚକ୍ରବର୍ତ୍ତୀ । (ଇମ୍ପାକ୍ଟ ପ୍ଲେୟାର: ସୂୟାଶ ଶର୍ମା) ।
ରାଜସ୍ଥାନ ରୟାଲ୍ସ : ଯଶସ୍ୱୀ ଜୈସ୍ୱାଲ୍, ଜୋସ ବଟଲର, ସଞ୍ଜୁ ସାମସନ(ଅଧିନାୟକ), ରିୟାନ ପରାଗ, ସିମରନ ହେତମାୟର, ଧ୍ରୁବ ଜୁରେଲ୍, ରୋଭମାନ ପାୱେଲ୍/କେଶବ ମହାରାଜ, ଆର ଅଶ୍ୱିନ, ଟ୍ରେଣ୍ଟ ବୋଲ୍ଟ, ଅଭେଶ ଖାନ, କୁଲଦୀପ ସେନ । (ଇମ୍ପାକ୍ଟ ପ୍ଲେୟାର: ୟୁଝବେନ୍ଦ୍ର ଚହଲ) ।
