ମୁଲନପୁର,୧୩/୦୪:ଚଳିତ ଆଇପିଏଲର ୨୭ତମ ଲିଗ୍ ମ୍ୟାଚ୍ରେ ଘରୋଇ ପଞ୍ଜାବ କିଙ୍ଗ୍ସ ଓ ରାଜସ୍ଥାନ ରୟାଲ୍ସ ପରସ୍ପରକୁ ଭେଟିବାକୁ ଯାଉଛନ୍ତି । ଉଭୟ ଦଳ ଏହି ମ୍ୟାଚ୍କୁ ନେଇ ଜୋରଦାର ଅଭ୍ୟାସ କରିଛନ୍ତି । ଉଭୟ ଦଳ ନିଜ ନିଜର ଶେଷ ମ୍ୟାଚ୍ରେ ପରାଜିତ ହୋଇଥିବାରୁ ଶନିବାର ବିଜୟକୁ ଫେରିବା ପାଇଁ ତତ୍ପର ।
ଶନିବାର ଉଭୟ ଦଳର ବ୍ୟାଟିଂ ବିଭାଗ ପେସ୍ ଚ୍ୟାଲେଞ୍ଜର ସାମ୍ନା କରିବେ । ମୁଲନପୁର ଷ୍ଟାଡିୟମ୍ର ପିଚ୍ ପେସ୍ ବୋଲରଙ୍କୁ ଭରପୂର ସହାୟତା କରୁଛି । ଏଠାରେ ଖେଳାଯାଇଥିବା ୨ଟି ମ୍ୟାଚ୍ରେ ମୋଟ୍ ୩୦ଟି ୱିକେଟ୍ର ପତନ ଘଟିଛି । ଏଥିରୁ ପେସ୍ ବୋଲରମାନେ ୨୩ଟି ୱିକେଟ୍ ଅକ୍ତିଆର କରିଥିବାବେଳେ ସ୍ପିନରମାନେ ୪ଟି ୱିକେଟ୍ ନେଇଛନ୍ତି । ବାକି ୩ଟି ୱିକେଟ୍ ରନ୍ ଆଉଟ୍ ଭାବେ ମିଳିଛି । ୨ଟି ମ୍ୟାଚ୍ର ପାୱାର ପ୍ଲେ’ରେ ମୋଟ୍ ୯ଟି ୱିକେଟ୍ର ପତନ ହୋଇଛି ।
ଗତ ସିଜନ ତୁଳନାରେ ପଞ୍ଜାବ କିଙ୍ଗ୍ସ ଏଥର ଉନ୍ନତ ପ୍ରଦର୍ଶନ କରୁଛି । ତଥାପି ବିଜୟ ଧାରା ବଜାୟ ରଖିବାରେ ବିଫଳ ହୋଇଛି । ୫ଟି ମ୍ୟାଚ୍ ଖେଳି ଦଳ ୨ଟି ବିଜୟ ସହ ମୋଟ୍ ୪ ପଏଣ୍ଟ ହାସଲ କରିଛି । କିନ୍ତୁ ରାଜସ୍ଥାନ ରୟାଲ୍ସ ଦମ୍ଦାର ପ୍ରଦର୍ଶନ ସହ ପଏଣ୍ଟ ତାଲିକାରେ ଆଧିପତ୍ୟ ବଜାୟ ରଖିଛି । କ୍ରମାନ୍ୱୟରେ ୪ଟି ମ୍ୟାଚ୍ ଜିତିବା ପରେ ରାଜସ୍ଥାନ ରୟାଲ୍ସ ଶେଷ ମ୍ୟାଚ୍ରେ ଗୁଜରାଟ ଟାଇଟନ୍ସ ଠାରୁ ପରାଜିତ ହୋଇଥିଲା । ଷ୍ଟାର ପେସ ବୋଲରମାନେ ଆହତ ହେବାରୁ ଦଳକୁ ପରାଜୟର ସାମ୍ନା କରିବାକୁ ପଡ଼ିଥିଲା । ନାନ୍ଦ୍ରେ ବର୍ଗର ଉକ୍ତ ମ୍ୟାଚ୍ ଖେଳି ନଥିଲେ । ସେହିପରି ଟ୍ରେଣ୍ଟ ବୋଲ୍ଟ ମାତ୍ର ୨ ଓଭର ବୋଲିଂ କରିବା ପରେ ଗ୍ରାଉଣ୍ଡ ଛାଡ଼ିଥିଲେ ।
ପୂର୍ବ ରେକର୍ଡ ରାଜସ୍ଥାନ ରୟାଲ୍ସ ପକ୍ଷରେ ରହିଛି । ଉଭୟ ପରସ୍ପରକୁ ୨୬ଥର ଭେଟିଛନ୍ତି । ଏଥିରୁ ରାଜସ୍ଥାନ ରୟାଲ୍ସ ୧୫ଟି ମ୍ୟାଚ ଜିତିଛି। ଗତ ବର୍ଷ ଉଭୟ ଦଳ ମଧ୍ୟରେ ୨ଟି ମ୍ୟାଚ୍ ଖେଳାଯାଇଥିଲା ଓ ଉଭୟ ଗୋଟିଏ ଲେଖାଏଁ ମ୍ୟାଚ ଜିତିଥିଲେ ।
ଶନିବାର ପଞ୍ଜାବ କିଙ୍ଗ୍ସ ଦଳରେ ପରିବର୍ତ୍ତନ ସମ୍ଭାବନା ନାହିଁ । ଲାଏମ ଲିଭଙ୍ଗଷ୍ଟୋନ୍ ଫିଟ୍ ହୋଇ ନାହାନ୍ତି । ତେଣୁ ସିକନ୍ଦର ରାଜା ଏକାଦଶରେ ସ୍ଥାନ ବଜାୟ ରଖିବେ । ଅଶର୍ଦୀପ ସିଂହ ଓ ପ୍ରଭସିମରନ ସିଂହ ଇମ୍ପାକ୍ଟ ପ୍ଲେୟାର ଭାବେ ଅଦଳ ବଦଳ ହେବେ । ରାଜସ୍ଥାନ ରୟାଲ୍ସ ଦଳରେ ମଧ୍ୟ ଆହତଙ୍କ ସଂଖ୍ୟା ବୃଦ୍ଧି ପାଇଛି । ବୋଲ୍ଟ ଓ ବର୍ଗରଙ୍କ ଫିଟ୍ନେସ୍ ସମ୍ପର୍କରେ ସ୍ପଷ୍ଟ ସୂଚନା ମିଳିନାହିଁ । ବର୍ଗର ଶୁକ୍ରବାର ଅଭ୍ୟାସ କରିଥିଲେ । ଶନିବାର ସେ ଏକାଦଶକୁ ପ୍ରତ୍ୟାବର୍ତ୍ତନ କରି ପାରନ୍ତି । ସେହିପରି ସନ୍ଦିପ ଶର୍ମାଙ୍କ ଖେଳିବା ସମ୍ଭାବନା କ୍ଷୀଣ ।
ଶନିବାର ଶଶାଙ୍କ ସିଂହ ଓ ୟୁଝବେନ୍ଦ୍ର ଚହଲଙ୍କ ଉପରେ ନଜର ରହିବ । ଶଶାଙ୍କ ଗତ ୨ଟି ମ୍ୟାଚ୍ରେ ଚମତ୍କାର ବ୍ୟାଟିଂ କରିଥିଲେ । ସେହିପରି ଚହଲ ପର୍ପଲ କ୍ୟାପ୍ ଦୌଡ଼ରେ ରହିଛନ୍ତି।
ସମ୍ଭାବ୍ୟ ଏକାଦଶ
ପଞ୍ଜାବ କିଙ୍ଗ୍ସ: ଶିଖର ଧାୱନ(ଅଧିନାୟକ), ଜନି ବେୟାରଷ୍ଟୋ, ପ୍ରଭସିମରନ ସିଂହ, ସାମ କରନ, ଜିତେଶ ଶର୍ମା, ଶଶାଙ୍କ ସିଂହ, ସିକନ୍ଦର ରାଜା, ଆଶୁତୋଷ ଶର୍ମା, ହରପ୍ରୀତ ବ୍ରାର, ହର୍ଷଲ ପଟେଲ, କାଗିସୋ ରାବାଡା । (ଇମ୍ପାକ୍ଟ ପ୍ଲେୟାର: ଅର୍ଶଦୀପ ସିଂହ) ।
ରାଜସ୍ଥାନ ରୟାଲ୍ସ: ଜୋସ ବଟଲର, ଯଶସ୍ୱୀ ଜୈସ୍ୱାଲ, ସଞ୍ଜୁ ସାମସନ(ଅଧିନାୟକ), ରିୟାନ ପରାଗ, ଧ୍ରୁବ ଜୁରେଲ, ସିମରନ ହେତମାୟର, ଆର ଅଶ୍ୱିନ, ଟ୍ରେଣ୍ଟ ବୋଲ୍ଟ, ଅଭେଶ ଖାନ, ନାନ୍ଦ୍ରେ ବର୍ଗର, ୟୁଝବେନ୍ଦ୍ର ଚହଲ । (ଇମ୍ପାକ୍ଟ ପ୍ଲେୟାର: କୁଲଦୀପ ସେନ)
