ହାଇଦ୍ରାବାଦ,୧୬/୦୫: ଗୁରୁବାର ୬୬ତମ ଲିଗ୍ ମ୍ୟାଚ୍ ଉପଲ୍ ଷ୍ଟାଡ଼ିୟମ୍ରେ ଘରୋଇ ସନରାଇଜର୍ସ ହାଇଦ୍ରାବାଦ ୨୦୨୨ ସିଜନ ଚାମ୍ପିଅନ୍ ଗୁଜରାଟ ଟାଇଟନ୍ସକୁ ଭେଟିବ । ଏହି ମ୍ୟାଚ୍ର ଫଳାଫଳ ଉପରେ ଆଉ ୩ଟି ଦଳର ଭାଗ୍ୟ ନିର୍ଭର କରୁଛି । ତେଣୁ ଦର୍ଶକ ଉତ୍ସୁକତାର ସହ ମ୍ୟାଚ୍କୁ ଅପେକ୍ଷା କରିଛନ୍ତି ।
ସନରାଇଜର୍ସ ଗତ ୮ ତାରିଖରେ ଲକ୍ଷ୍ନୌ ସୁପରଜାଏଣ୍ଟ୍ସକୁ ୧୦ ୱିକେଟ୍ରେ ପରାସ୍ତ କରିଥିଲା । ଏହାପରେ ଦଳକୁ ବିଶ୍ରାମ ନେବା ପାଇଁ ୭ଦିନ ସମୟ ମିଳିଛି । ଫଳରେ ପ୍ରତ୍ୟେକ ଖେଳାଳିଙ୍କ ମାନସିକ କ୍ଳାନ୍ତିରୁ ବାହାରି ସାରିଛନ୍ତି। ମନୋବଳ ଶିଖର ଛୁଇଁଛି । ଫଳରେ ସନରାଇଜର୍ସ ଗୁରୁବାର ଦର୍ଶକଙ୍କୁ ଭରପୁର ମନୋରଞ୍ଜନ ଯୋଗାଇବା ନିଶ୍ଚିତ ।
୧୨ଟି ମ୍ୟାଚ୍ରୁ ୧୪ ପଏଣ୍ଟ ହାସଲ କରିସାରିଥିବା ସନରାଇଜର୍ସ ଶେଷ ୨ଟି ମ୍ୟାଚ୍ରୁ ମାତ୍ର ୧ ପଏଣ୍ଟ ହାସଲ କଲେ ମଧ୍ୟ ପ୍ଲେ-ଅଫ୍ରେ ପ୍ରବେଶ କରିପାରିବ । ମାତ୍ର ସନରାଇଜର୍ସର ପ୍ରଦର୍ଶନ ଯଥାକ୍ରମେ ରାଜସ୍ଥାନ ରୟାଲ୍ସ, ଚେନ୍ନାଇ ସୁପରକିଙ୍ଗ୍ସ ଓ ରୟାଲ୍ ଚ୍ୟାଲେଞ୍ଜର୍ସର ଭାଗ୍ୟ ନିର୍ଦ୍ଧାରଣ କରିବ । ସନରାଇଜର୍ସ ଶେଷ ୨ଟି ଯାକ ମ୍ୟାଚ୍ ଜିତିଲେ ପଏଣ୍ଟ ତାଲିକାର ଦ୍ୱିତୀୟକୁ ଉନ୍ନୀତ ହୋଇପାରିବ । ଯାହା ପ୍ଲେ-ଅଫ ପାଇଁ ବେଶ୍ ସହାୟକ ହେବ। ସୁପରକିଙ୍ଗ୍ସ ଓ ରୟାଲ୍ ଚ୍ୟାଲେଞ୍ଜର୍ସ ନିକଟରେ ଗୋଟିଏ ଲେଖାଏଁ ମ୍ୟାଚ୍ ରହିଛି । ଉଭୟ ଏହି ମ୍ୟାଚ୍ରେ ପରସ୍ପରକୁ ଭେଟିବେ।
ସୁପରକିଙ୍ଗ୍ସ ୧୪ପଏଣ୍ଟ ଓ ରୟାଲ୍ ଚ୍ୟାଲେଞ୍ଜର୍ସ ୧୨ ପଏଣ୍ଟ ଅର୍ଜନ କରିଛନ୍ତି । ଫଳରେ ସନରାଇଜର୍ସ ଆସନ୍ତା କାଲି ବିଜୟୀ ହେଲେ ପଏଣ୍ଟ ତାଲିକାର ଚତୁର୍ଥ ସ୍ଥାନ ପାଇଁ ଉଭୟ ସନରାଇଜର୍ସ ଓ ରୟାଲ୍ ଚ୍ୟାଲେଞ୍ଜର୍ସଙ୍କ ନିକଟରେ ସୁଯୋଗ ରହିବ । ସୁପରକିଙ୍ଗ୍ସ ପାଇଁ କେବଳ ବିଜୟ ଓ ରୟାଲ୍ ଚ୍ୟାଲେଞ୍ଜର୍ସ ପାଇଁ ବିଶାଳ ବ୍ୟବଧାନରେ ବିଜୟ ଆବଶ୍ୟକ ପଡ଼ିବ । ଟାଇଟନ୍ସ ଓ ସନରାଇଜର୍ସ ମଧ୍ୟରେ ମୋଟ୍ ୪ଟି ମ୍ୟାଚ୍ ଖେଳାଯାଇଛି । ଏଥିରୁ ଟାଇଟନ୍ସ ୩ଟି ମ୍ୟାଚ୍ ଜିତିଛି । ଚଳିତ ସିଜନରେ ଉଭୟ ଦଳ ମାର୍ଚ୍ଚ ୩୧ତାରିଖରେ ପରସ୍କରକୁ ଭେଟିଥିଲେ ।
ଟାଇଟନ୍ସ ୭ୱିକେଟ୍ରେ ଉକ୍ତ ମ୍ୟାଚ୍ ଜିତିଥିଲା। ସନରାଇଜର୍ସ ନିକଟରେ ପ୍ରତିଶୋଧ ନେବାର ସୁଯୋଗ ରହିଛି । ସନରାଇଜର୍ସର ବିଧ୍ୱଂସୀ ବ୍ୟାଟିଂ ଟାଇଟନ୍ସ ପାଇଁ ଚିନ୍ତା ସୃଷ୍ଟି କରିବା ନିଶ୍ଚିତ । ସନରାଇଜର୍ସ ଇତି ମଧ୍ୟରେ ୧୨ଟି ମ୍ୟାଚ୍ ଖେଳି ୧୪୬ଟି ଛକା ମାରିଛି । ବିଶେଷ କରି ଟ୍ରେଭିସ୍ ହେଡ୍ ଓ ଅଭିଷେକ ଶର୍ମାଙ୍କୁ ଅଟକାଇବା ପାଇଁ ଟାଇଟନ୍ସ ସ୍ୱତନ୍ତ୍ର ରଣନୀତି ପ୍ରସ୍ତୁତ କରିବା ଆବଶ୍ୟକ । ମୋଟ୍ ଉପରେ ଦେଖିବାକୁ ଗଲେ ସନରାଇଜର୍ସର ବ୍ୟାଟର ଓ ଟାଇଟନ୍ସ ବୋଲରଙ୍କ ମଧ୍ୟରେ ଜୋରଦାର ଲଢେଇ ହେବ ।
ଟାଇଟନ୍ସର ଦୁଇ ଓପନର ଶୁଭମନ ଗିଲ୍ ଓ ସାଇ ସୁଦର୍ଶନ ଗତ ଚେନ୍ନାଇ ସୁପରକିଙ୍ଗ୍ସ ବିପକ୍ଷରେ ଶତକ ଅର୍ଜନ କରି ଫର୍ମକୁ ଫେରିଥିବା ପ୍ରମାଣ କରିଥିଲେ । ଏହାପରେ କୋଲକାତା ନାଇଟ ରାଇଡର୍ସ ବିପକ୍ଷ ମୁକାବିଲା ବର୍ଷା ଯୋଗୁଁ ବାତିଲ ହୋଇଯିବାରୁ ଟାଇଟନ୍ସ ପ୍ଲେ-ଅଫ ଦୌଡରୁ ବାଦ ପଡ଼ିଯାଇଥିଲା । ଗୁରୁବାର ଉଭୟଙ୍କ ଉପରେ ଦଳର ଭାଗ୍ୟ ନିର୍ଭର କରିବ । ଉପଲ ପିଚ୍ ବ୍ୟାଟିଂ ପାଇଁ ବେଶ୍ ଅନୁକୂଳ। ଏଠାରେ ବିଶାଳ ସ୍କୋର ସଂଗୃହୀତ ହେବ । ଉଭୟ ଦଳ ନିକଟରେ ଦମ୍ଦାର ବ୍ୟାଟର ରହିଥିବାରୁ ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ।
ସମ୍ଭାବ୍ୟ ଏକାଦଶ
ସନରାଇଜର୍ସ : ଅଭିଷେକ ଶର୍ମା, ଟ୍ରେଭିସ୍ ହେଡ୍, ମୟଙ୍କ ଅଗରୱାଲ, ନିତିଶ କୁମାର ରେଡ୍ଡୀ, ହେନରିକ କ୍ଲାସେନ, ମାର୍କୋ ଜାନସେନ/ଗ୍ଳେନ ଫିଲିପ୍ସ, ଅବଦୁଲ ସମଦ, ସାହବାଜ ଅହମ୍ମଦ, ପ୍ୟାଟ୍ କମିନ୍ସ (ଅଧିନାୟକ), ଭୁବନେଶ୍ୱର କୁମାର, ଟି ନଟରାଜନ । (ଇମ୍ପାକ୍ଟ ପ୍ଲେୟାର: ଉମ୍ରାନ ମଲ୍ଲିକ) ।
ଟାଇଟନ୍ସ : ଶୁଭମନ ଗିଲ୍(ଅଧିନାୟକ), ରିଦ୍ଧିମାନ ଶାହା, ସାଇ ସୁଦର୍ଶନ, ଶାହରୁଖ ଖାନ, ଡେଭିଡ୍ ମିଲର, ବିଜୟ ଶଙ୍କର, ରାହୁଲ ତେୱାତିଆ, ରସିଦ ଖାନ, ମୋହିତ ଶର୍ମା, ନୂର ଅହମ୍ମଦ, ଅଜମତୁଲ୍ଲା ଓମାରଜାଇ । (ଇମ୍ପାକ୍ଟ ପ୍ଲେୟାର: ସନ୍ଦିପ ୱାରିୟର) ।
