ତେଲ୍ ଅଭିଭ୍,୧୧/୧୧: ଇସ୍ରାଏଲ ଓ ହମାସ୍ ମଧ୍ୟରେ ଲାଗିଥିବା ଯୁଦ୍ଧ ୩୬ ଦିନରେ ପହଞ୍ଚିଛି । ଏହି ଯୁଦ୍ଧ ଭିତରେ ଉତ୍ତର ଗାଜର ଅଲ୍-ସଫତାୱି ଅଞ୍ଚଳରେ ଥିବା ଏକ ସ୍କୁଲ ଉପରେ ଇସ୍ରାଏଲ ସେନା ଆକାଶ ମାର୍ଗରୁ ବୋମା ମାଡ଼ କରିଛି । ଫଳରେ ୫୦ରୁ ଅଧିକ ପ୍ରାଣ ହରାଇଛନ୍ତି ଏବଂ ଶତାଧିକ ଆହତ ହୋଇଛନ୍ତି ।
ପାଲେଷ୍ଟାଇନ ଗଣମାଧ୍ୟମର ସୂଚନା ଅନୁସାରେ ଓସାମା ବିନ ଜୈଦ ସ୍କୁଲକୁ ଶୁକ୍ରବାର ଇସ୍ରାଏଲୀ ସେନା ଟାର୍ଗେଟ କରିଛି । ଏଠାରେ ଯୁଦ୍ଧଦ୍ୱାରା ପ୍ରଭାବିତ ପ୍ରାୟ ୨ ହଜାରରୁ ଅଧିକ ପାଲେଷ୍ଟାଇନ ଶରଣାର୍ଥୀ ରହୁଥିଲେ । ଜାତିସଂଘର ରିଲିଫ ଓ ୱାର୍କ ଏଜେନ୍ସି ଏହାକୁ ବ୍ୟବହାର କରୁଥିଲା । ଶୁକ୍ରବାର ସକାଳୁ ହଠାତ ଇସ୍ରାଏଲ ସେନା ଉକ୍ତ ସ୍କୁଲ ଉପରେ ମିସାଇଲ ମାଡ଼ କରିବା ସହ ସ୍ଥଳ ସେନା ପ୍ରଚଣ୍ଡ ଆକ୍ରମଣ କରିଥିଲା । ଫଳରେ ସ୍କୁଲ ବ୍ୟାପକ ଭାବେ କ୍ଷତିଗ୍ରସ୍ତ ହୋଇଛି । ସ୍ଥାନୀୟ ଅଲ୍ସିଫା ହସ୍ପିଟାଲର ନିର୍ଦ୍ଦେଶକ ମହମ୍ମଦ ଅବୁ ସାଲମିୟାଙ୍କ ସୂଚନା ଅନୁସାରେ ସେଠାକୁ ୫୦ଟି ମୃତଦେହ ଅଣାଯାଇଛି । ଶତାଧିକ ଆହତଙ୍କୁ ମଧ୍ୟ ହସ୍ପିଟାଲରେ ଭର୍ତ୍ତି କରାଯାଇଛି । ସେମାନଙ୍କ ମଧ୍ୟରେ ବହୁ ମହିଳା ଓ ପିଲା ଅଛନ୍ତି । ହମାସ ଆତଙ୍କୀମାନେ ହସ୍ପିଟାଲ, ସ୍କୁଲ ଓ ମସ୍ଜିଦରେ ସୁଡଙ୍ଗ କରି ରହୁଥିବାରୁ ଇସ୍ରାଏଲୀ ସେନା ସେମାନଙ୍କୁ ନିପାତ କରିବା ଲାଗି ଏସବୁ ଅଟ୍ଟାଳିକା ଉପରେ ମିସାଇଲ, ରକେଟ ଓ ବୋମା ମାଡ଼ ଜାରି ରଖିଛି ।
ଅନ୍ୟପକ୍ଷରେ ସିରିୟା ପଟୁ ଇସ୍ରାଏଲର ଏଲାତ ସହରରେ ଥିବା ଏକ ସ୍କୁଲ ଉପରେ ଆକ୍ରମଣ ହୋଇଛି । ଜବାବରେ ସିରିୟାରେ ଏୟାରଷ୍ଟ୍ରାଇକ କରାଯାଇଥିବା ଇସ୍ରାଏଲ ସେନା କହିଛି । ତେବେ ଇସ୍ରାଏଲ ସ୍କୁଲ ଉପରେ କେଉଁ ସଙ୍ଗଠନ ଆକ୍ରମଣ କରିଛି ତାହା ସେନା ପକ୍ଷରୁ ସ୍ପଷ୍ଟ କରାଯାଇନାହିଁ । ଆମେରିକା ମଧ୍ୟ ସିରିୟାରେ ଇରାନ୍ ସମର୍ଥତ ଆତଙ୍କବାଦୀଙ୍କ ଆଡ୍ଡା ଉପରେ ଏୟାରଷ୍ଟ୍ରାଇକ୍ କରିଛି । ଉଭୟ ଇସ୍ରାଏଲ ଏବଂ ଆମେରିକା ଆକ୍ରମଣରେ ୧୨ ଆତଙ୍କୀଙ୍କ ମୃତ୍ୟୁ ଘଟିଛି । ସେହିପରି ଗୁରୁବାର ବିଳମ୍ବିତ ରାତିରେ ଇସ୍ରାଏଲ ଗାଜାର ସବୁଠୁ ବଡ଼ ହସ୍ପିଟାଲ ଅଲ୍-ଶିଫା କମ୍ପେ୍ଲକ୍ସରେ ଆକ୍ରମଣ କରିଥିବା ଅଲ୍ଜଜିରା ପ୍ରକାଶ କରିଛି । ଏଥିରେ ଅନ୍ୟୁନ ୬ ଜଣଙ୍କ ମୃତ୍ୟୁ ଘଟିଛି । ଅନେକ ଗୁରୁତର ଥିବାରୁ ମୃତ୍ୟୁସଂଖ୍ୟା ବଢ଼ିବା ଆଶଙ୍କା ରହିଛି । ପାଲେଷ୍ଟାଇନ ସ୍ୱାସ୍ଥ୍ୟ ମନ୍ତ୍ରଣାଳୟ ଅନୁସାରେ, ଉକ୍ତ ହସ୍ପିଟାଲରେ ହଜାର ହଜାର ଲୋକ ଆଶ୍ରୟ ନେଇଥିଲେ । ଇସ୍ରାଏଲ ଆକ୍ରମଣରେ ଅଦ୍ୟାବଧି ୧୧,୦୭୮ ଜଣଙ୍କ ମୃତ୍ୟୁ ଘଟିଛି ।
ସେପଟେ ଗାଜା ଉପରେ କବ୍ଜା କରିବା ଇସ୍ରାଏଲର ଲକ୍ଷ୍ୟ ନୁହେଁ ବୋଲି ଏହାର ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁ ପୁଣି ଦୋହରାଇଛନ୍ତି । ସେଠାରେ ଇସ୍ରାଏଲ ସରକାର ମଧ୍ୟ ଗଢ଼ିବାକୁ ଚାହୁଁନାହିଁ । କେବଳ ଗାଜାର ଉଜ୍ଜ୍ୱଳ ଭବିଷ୍ୟତ ଚାହୁଁ ବୋଲି ନେତନ୍ୟାହୁ କହିଛନ୍ତି । ଗାଜାରେ ଇସ୍ରାଏଲ ସେନା ଉଭୟ ଆକାଶମାର୍ଗ ଏବଂ ସ୍ଥଳଭାଗରୁ ଆକ୍ରମଣ ଜାରି ରଖିଛି । ଏଥିରେ ହମାସ୍ ଆତଙ୍କୀଙ୍କ ଅନେକ ଭିତ୍ତିଭୂମି, ସୁଡ଼ଙ୍ଗ ନଷ୍ଟ ହେବା ସହ ୬୦ରୁ ଊଦ୍ଧ୍ୱର୍ ହମାସ୍ କମାଣ୍ଡରଙ୍କ ମୃତ୍ୟୁ ଘଟିଲାଣି । ସେହିପରି ହମାସ୍ର ପାଲଟା ଆକ୍ରମଣରେ ଗାଜାରେ ୩୬ ଇସ୍ରାଏଲ ସୈନିକଙ୍କ ମୃତ୍ୟୁ ଘଟିଥିବା ଜଣାପଡ଼ିଛି । ହମାସ୍ର ମୂଳୋତ୍ପାଟନ ନ କରିବା ପର୍ଯ୍ୟନ୍ତ ଇସ୍ରାଏଲ ଅଟକିବନି ବୋଲି ବାରମ୍ବାର କହିଆସୁଛି । ଏହି ଅଭିଯାନ ବେଶ୍ ଲମ୍ବିବ ଏବଂ କଷ୍ଟକର ହେବ ବୋଲି ଇସ୍ରାଏଲ ପ୍ରଧାନମନ୍ତ୍ରୀ ଏବଂ ସେନା ପକ୍ଷରୁ କୁହାଯାଇଛି । ତେବେ ଯୁଦ୍ଧବିରତି ପାଇଁ ମଧ୍ୟ ଅନ୍ତର୍ଜାତୀୟ ସ୍ତରରେ ଇସ୍ରାଏଲ ଉପରେ ଚାପ ବଢ଼ୁଛି ।