ତେହରାନ,୧୩/୦୫: ଇରାନ ଏହାର ପରମାଣୁ ଅସ୍ତ୍ର ମହତ୍ତ୍ୱାକାଂକ୍ଷାକୁ ସର୍ବସମ୍ମୁଖକୁ ଆଣିବା ସହ ଇସ୍ରାଏଲକୁ ଧମକ ଦେଇଛି । ଇସ୍ରାଏଲ ସହ ବିବାଦ ବଢ଼ି ଚାଲିଥିବାବେଳେ ଦେଶର ଆଣବିକ ଅଭିଳାଷ ବାବଦରେ ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖାମେନେଇଙ୍କ ଜଣେ ପରାମର୍ଶଦାତାଙ୍କ ବୟାନ ଚିନ୍ତା ବଢ଼ାଇଛି ।
ଆୟାତୋଲ୍ଲାଙ୍କ ପରାମର୍ଶଦାତା କମଲ ଖାରଜ୍ଜି କହିଛନ୍ତି, ଏବେ ନ୍ୟୁକ୍ଲିୟର ବୋମା ପ୍ରସ୍ତୁତ କରିବାରେ ଇରାନର କୌଣସି ଉଦ୍ଦେଶ୍ୟ ନାହିଁ । ଯଦି ଦେଶର ଅସ୍ତିତ୍ୱ ଇସ୍ରାଏଲ ଯୋଗୁ ବିପଦରେ ପଡ଼େ ତେବେ ଇରାନ ଆଣବିକ ଅସ୍ତ୍ର ବନାଇବା ଦିଗରେ ଏ ଯାଏ ଥିବା ସିଦ୍ଧାନ୍ତକୁ ବଦଳାଇପାରିବ । ଇସ୍ରାଏଲ ଇରାନ ନ୍ୟୁକ୍ଲିୟର ସାଇଟ୍ରେ ଆକ୍ରମଣ କଲେ ଇରାନ ନିଜର ରକ୍ଷା ପାଇଁ ଏ ଦିଗରେ ଆଗକୁ ବଢ଼ିବ ବୋଲି ସେ କହିଛନ୍ତି । ୨୦୦୩ରେ ଇରାନ ସୁପ୍ରିମ ଲିଡର ଖାମେନେଇ ପରମାଣୁ ଅସ୍ତ୍ର ସମେତ ବ୍ୟାପକ ଧ୍ୱଂସଲୀଳା ରଚିବାର କ୍ଷମତା ଥିବା ଅସ୍ତ୍ର ବନାଇବା ବିରୋଧରେ ଫତୱା ଜାରି କରିଥିଲେ ।
କିନ୍ତୁ ୨୦୨୧ରେ ଇରାନର ତତ୍କାଳୀନ ଗୁଇନ୍ଦା ମନ୍ତ୍ରୀ କହିଥିଲେ ଯେ, ପାଶ୍ଚାତ୍ୟ ଦେଶଗୁଡ଼ିକ ପକ୍ଷରୁ ଚାପ ପଡ଼ୁଥିବାରୁ ଇରାନ ଆବଶ୍ୟକ ପଡ଼ିଲେ ଏହି ଫତୱାକୁ ପଲଟାଇପାରେ । ରିପୋର୍ଟ ଅନୁସାରେ, ଇରାନ ୬୦% ପର୍ଯ୍ୟନ୍ତ ଏନ୍ରିଚ ବା ଏହାର ଗଣବତ୍ତା ବୃଦ୍ଧି କରାଉଛି । ସେହିପରି ଯୁଦ୍ଧାସ୍ତ୍ରରେ ବ୍ୟବହୃତ ୟୁରାନିୟମକୁ ୯୦% ପର୍ଯ୍ୟନ୍ତ ଏନ୍ରିଚ କରାଉଛି । ପରମାଣୁ ଅସ୍ତ୍ରଶସ୍ତ୍ର ଉପରେ ନଜର ରଖୁଥିବା ଏଜେନ୍ସି ଆଇଏଇଏ ଅନୁସାରେ, ଯଦି ୟୁରାନିୟମକୁ ଅଧିକ ଏନ୍ରିଚ୍ କରାଯାଏ ତେବେ ତାହା ୨ ପରମାଣୁ ଅସ୍ତ୍ରର ଆବଶ୍ୟକତା ପୂରଣ କରିବା ସହ ସମାନ ହୋଇଯିବ ।
ଗତ ଜାନୁଆରୀରେ ଜାତିସଂଘର ନ୍ୟୁକ୍ଲିୟର ନୀରିକ୍ଷକ ଡେଭିଡ୍ ଅଲ୍ବ୍ରାଇଟ ଦାବି କରିଥିଲେ ଯେ, ଇରାନ ପାଖରେ ପରମାଣୁ ବୋମା ବନାଇବାର ଟେକ୍ନୋଲୋଜି ମହଜୁଦ ଅଛି । ଏଥିପାଇଁ ଆବଶ୍ୟକ ପରିମାଣର ୟୁରାନିୟମ ମଧ୍ୟ ରହିଛି । ଜରୁରି ପଡ଼ିଲେ ଇରାନ ୫ରୁ ୧୨ ମାସ ଭିତରେ ପରମାଣୁ ବୋମା ପ୍ରସ୍ତୁତ କରିପାରିବ । ଗତ ଏପ୍ରିଲ ୧ରେ ଇସ୍ରାଏଲ ସିରିଆରେ ଥିବା ଇରାନ ଦୂତାବାସ କୋଠା ଉପରେ ଆକ୍ରମଣ କରିବା ଫଳରେ ଇରାନର ଦୁଇ ଶୀର୍ଷ କମାଣ୍ଡରଙ୍କ ସମେତ ୧୩ ଜଣଙ୍କ ମୃତ୍ୟୁ ଘଟିଥିଲା । ଏହାକୁ ନେଇ ଇରାନ ଓ ଇସ୍ରାଏଲ ଭିତରେ ସଦ୍ୟ ବିବାଦ ଉପୁଜିଛି । ଏହାର ଜବାବରେ ଇରାନ ଏପ୍ରିଲ ୧୩ରେ ଇସ୍ରାଏଲ ଉପରେ ୩ ଶହରୁ ଅଧିକ ମିସାଇଲ ଏବଂ ଡ୍ରୋନ୍ରେ ଆକ୍ରମଣ କରିଥିଲା । ତେବେ ଆମେରିକା, ବ୍ରିଟେନ, ଫ୍ରାନ୍ସ ସହଯୋଗରେ ଇସ୍ରାଏଲ ୯୯% ମିସାଇଲ-ଡ୍ରୋନ୍କୁ ଖସାଇଦେଇ ଆକ୍ରମଣକୁ ବିଫଳ କରିଥିଲା ।
