ନୂଆଦିଲ୍ଲୀ,୨୪।୯: ପେଜର ଓ ଓ୍ବାକି-ଟକି ବିସ୍ପୋରଣ ପରେ ଇସ୍ରାଏଲ ଏବେ ଲେବାନନ୍ରେ ସକ୍ରିୟ ହିଜବୁଲା ବିରୋଧରେ ସିଧାସଳଖ ଯୁଦ୍ଧ ଆରମ୍ଭ କରିଦେଇଛି। ସୋମବାର ଲେବାନନ୍ ଉପରେ ଇସ୍ରାଏଲ କରିଛି ଜୋରଦାର ଆକ୍ରମଣ। ୧୮ ବର୍ଷରେ ହୋଇଛି ସବୁଠାରୁ ଭୀଷଣ ହମଲା। ୧୬୦୦ଟି ଏୟାର ଷ୍ଟ୍ରାଇକ୍ରେ ୪୯୨ ଜଣଙ୍କର ମୃତ୍ୟୁ ହୋଇଥିବା ବେଳେ ଶତାଧିକ ଆହତ ହୋଇଛନ୍ତି। ଏପରିକି ଭୟଙ୍କର ଆକ୍ରମଣରେ ଅନେକ ଲୋକଙ୍କ ଜୀବନ ଯିବା ପରେ ମଧ୍ୟ ଏତିକିରେ ଅଟକି ନଥିଲା ଇସ୍ରାଏଲ। ରାତିସାରା କରିଥିଲା ଏୟାର ଷ୍ଟ୍ରାଇକ୍। ଏପରିକି ମଙ୍ଗଳବାର ସକାଳ ପର୍ଯ୍ୟନ୍ତ ମଧ୍ୟ ଆକ୍ରମଣ ଜାରି ରହିଥିଲା। ହିଜବୁଲା ପକ୍ଷରୁ ମଧ୍ୟ ଇସ୍ରାଏଲ ଉପରେ ପାଲଟା ଆକ୍ରମଣ ହୋଇଛି।
ଇସ୍ରାଏଲ ଆକ୍ରମଣର ଜବାବ୍ ଦେବାକୁ ଯାଇ ହିଜବୁଲା ପକ୍ଷରୁ ୨୦୦ ରକେଟ ମାଡ଼ କରାଯାଇଛି। ଏହି କାରଣରୁ ଇସ୍ରାଏଲରେ ୭ ଦିନ ପାଇଁ ଏମର୍ଜେନ୍ସି ଘୋଣା ଯାଇଛି। ଏହା ସହ ଆଇରନ୍ ଡୋମ୍କୁ ମଧ୍ୟ ସକ୍ରିୟ ରଖାଯାଇଛି। ଲେବାନନ୍ ପାଇଁ ୨୩ ସେପ୍ଟେମ୍ବର ଥିଲା ସବୁଠାରୁ ଘାତକ। ୮ ବର୍ଷ ପୂର୍ବେ ୨୦୦୬ ରେ ତାକୁ ଏଭଳି ଆକ୍ରମଣର ସମ୍ମୁଖୀନ ହେବାକୁ ପଡିଥିଲା। ଇସ୍ରାଏଲ ସେନା ହିଜବୁଲା ବିରୋଧରେ ବ୍ୟାପକ ଏୟାରଷ୍ଟ୍ରାଇ୍ ପୂର୍ବରୁ ଦକ୍ଷିଣ ଓ ପୂର୍ବ ଲେବାନନ୍ର ନିବାସୀଙ୍କୁ ନିଜ ଘର ଖାଲି କରିବାକୁ ଚେତାବନୀ ଦେଇଥିଲା। ଦକ୍ଷିଣ ଲେବାନନ୍ରୁ ଇସ୍ରାଏଲକୁ ଚେତାବନୀ ପରେ ହଜାର ହଜାର ଲେବାନନ୍ ବାସିନ୍ଦା ନିଜ ଘର ଛାଡି ଚାଲିଯାଥିଲେ।
ଅନ୍ୟପକ୍ଷେ ଇସ୍ରାଏଲ ଓ ଲେବାନନ୍ ମଧ୍ୟରେ ହୋଇଥିବା ଆକ୍ରମଣକୁ ନେଇ ଇରାନ ଆଶ୍ଚର୍ଯ୍ୟ ପ୍ରକାଶ କରିଛି। ଏହା ସହ ଇସ୍ରାଏଲକୁ ଏହାର ପରିଣାମ ଭୋଗିବାକୁ ପଡିବ ବୋଲି ଇରାନ ଧମକ ଦେଇଛି। ସେପେଟ ଇସ୍ରାଏଲ ଓ ହିଜବୁଲା ମଧ୍ୟରେ ଯୁଦ୍ଧକୁ ଦୃଷ୍ଟିରେ ରଖି ଆମେରିକା ପଶ୍ଚିମ ଏସିଆରେ ଅତିରିକ୍ତ ସୈନିକ ପଠାଇଛି, ଯାହାଫଳରେ ଯୁଦ୍ଧ ଆହୁରି ବଢିପାରେ ବୋଲି ଆଶଙ୍କା କରାଯାଉଛି।
