ଶ୍ରୀନଗର,୨୬/୦୯: ଜମ୍ମୁ-କାଶ୍ମୀର ବିଧାନସଭା ନିର୍ବାଚନର ଦ୍ୱିତୀୟ ପର୍ଯ୍ୟାୟରେ ୬ ଜିଲ୍ଲାର ୨୬ ଆସନରେ ଭୋଟିଂ ଶେଷ ହୋଇଛି । ୨୫.୭୮ ଲକ୍ଷ ମତଦାତା ସକାଳ ୭ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ନିଜ ମତାଧିକାର ସାବ୍ୟସ୍ତ କରିଥିଲେ । ବୁଧବାର ଭୋଟ୍ ଶେଷ ସୁଦ୍ଧା ୫୬% ମତଦାନ ହୋଇଥିବା ଜଣାପଡ଼ିଛି ।
ନିର୍ବାଚନ କମିଶନଙ୍କ ରିପୋର୍ଟ ମୁତାବକ, ରିୟାସିରେ ସର୍ବାଧିକ ୭୧.୮୧% ମତଦାନ ହୋଇଥିବା ବେଳେ ଶ୍ରୀନଗରରେ ସର୍ବନିମ୍ନ ୨୭.୩୧% ଭୋଟ୍ ପଡ଼ିଛି । ସେହିଭଳି ବଡ଼ଗାମ୍ରେ ୫୮.୯୭% ମତଦାନ ହୋଇଥିଲା ବେଳେ ଗାନ୍ଦରବଲରେ ୫୮.୮୧%, ପୁଞ୍ଚରେ ୭୧.୫୯%, ରାଜୌରିରେ ୬୭.୭୭% ଭୋଟିଂ ହୋଇଛି । ଦ୍ୱିତୀୟ ପର୍ଯ୍ୟାୟର ୨୬ ଆସନ ମଧ୍ୟରୁ ୧୫ଟି ଆସନ କେନ୍ଦ୍ରୀୟ କାଶ୍ମୀର ଏବଂ ୧୧ଟି ଜମ୍ମୁରୁ ରହିଛି । ଦ୍ୱିତୀୟ ପର୍ଯ୍ୟାୟରେ ଲଢ଼ୁଥିବା ୨୩୯ ପ୍ରାର୍ଥୀଙ୍କ ମଧ୍ୟରୁ ୨୩୩ ପୁରୁଷ ଏବଂ ୬ ଜଣ ମହିଳା । ୧୩୧ ପ୍ରାର୍ଥୀ କୋଟିପତି ହୋଇଥିବା ବେଳେ ୪୯ ଜଣଙ୍କ ବିରୋଧରେ ଫୌଜଦାରୀ ମାମଲା ରହିଛି । ପୂର୍ବତନ ମୁଖ୍ୟମନ୍ତ୍ରୀ ତଥା ଏନ୍ସି ଉପାଧ୍ୟକ୍ଷ ଓମାର ଅବ୍ଦୁଲ୍ଲା ଗାନ୍ଦରବଲ୍ ଓ ବୀରୱାହରୁ ନିର୍ବାଚନ ଲଢ଼ୁଛନ୍ତି ।
ସେପ୍ଟେମ୍ବର ୧୮ରେ ଅନୁଷ୍ଠିତ ପ୍ରଥମ ପର୍ଯ୍ୟାୟ ନିର୍ବାଚନରେ ୬୧.୩୮% ମତଦାନ ହୋଇଥିଲା । ଜମ୍ମୁ-କାଶ୍ମୀର ନିର୍ବାଚନ ଦେଖିବା ପାଇଁ ଆମେରିକା, ନରୱେ, ମେକ୍ସିକୋ, ଗୁୟାନା, ଦକ୍ଷିଣ କୋରିଆ, ସୋମାଲିଆ, ପାନାମା, ସ୍ପେନ, ନାଇଜେରିଆ ଓ ସିଙ୍ଗାପୁର ଭଳି ୧୬ ଦେଶରୁ କୂଟନୀତିଜ୍ଞ ଆସିଛନ୍ତି ।
