ୱାଶିଂଟନ୍‌,୦୯/୦୯: ଆମେରିକା  ରାଷ୍ଟ୍ରପତି ଜୋ ବାଇଡେନ୍‌ ନିଜର ୪  ବର୍ଷରୁ କମ୍‌ ଅବଧିର କାର୍ଯ୍ୟକାଳ ମଧ୍ୟରେ  ପ୍ରାୟ ଦେଢ଼ ବର୍ଷ ଅର୍ଥାତ୍‌ ୫୩୨ ଦିନ  ଛୁଟି ନେଇଛନ୍ତି । ୮୧ ବର୍ଷୀୟ ବାଇଡେନ୍‌  ରାଷ୍ଟ୍ରପତି ପଦ ଭାର ଗ୍ରହଣ କରିବାର  ଅଦ୍ୟାବଧି ୧୩୨୬ ଦିନ ହୋଇସାରିଛି ।  ସେଥିମଧ୍ୟରୁ ୪୦ ପ୍ରତିଶତ ଦିନ ସେ  ଛୁଟି ନେଇଛନ୍ତି । ମାତ୍ର ୭୯୪ ଦିନ କାମ  କରିଛନ୍ତି । ହିସାବ କଲେ ଜଣାପଡ଼ୁଛି ବର୍ଷକୁ  ସେ ପ୍ରାୟ ୧୩୩ ଦିନ ଛୁଟି ନେଇଛନ୍ତି ।  

ଅପରପକ୍ଷରେ ଯଦି ପ୍ରଧାନମନ୍ତ୍ରୀ  ନରେନ୍ଦ୍ର ମୋଦୀଙ୍କ କ୍ଷେତ୍ରରେ ଦେଖିବା,  ସେ ବିଗତ ୨୩ ବର୍ଷ ମଧ୍ୟରେ ସେ  ଗୋଟିଏ ବି ଛୁଟି ନେଇନାହାନ୍ତି । ୨୦୦୧  ମସିହାରେ ସେ ଗୁଜରାଟର ମୁଖ୍ୟମନ୍ତ୍ରୀ  ଭାବେ ଦାୟିତ୍ୱ ଗ୍ରହଣ କରିବା ପରଠାରୁ  ଏବଂ ୨୦୧୪ରେ ପ୍ରଧାନମନ୍ତ୍ରୀ ହେବା  ପରେ ମଧ୍ୟ ସେ ଦିନଟିଏ ଛୁଟି ନେଇ  ନଥିବା କିଛି ଦିନରେ ସ୍ୱରାଷ୍ଟ୍ର ମନ୍ତ୍ରୀ ଅମିତ  ଶାହ କହିଥିଲେ । ମୋଦି ଦିନକୁ ୧୮  ଘଣ୍ଟା କାମ କରୁଥିବା ବେଳେ ବଳକା  ୬ ଘଣ୍ଟାରେ ନିଜ କାମ କରିଥାନ୍ତି ।  

ନ୍ୟୁୟର୍କ ପୋଷ୍ଟ ରିପୋର୍ଟ ଅନୁସାରେ,  ପ୍ରତି ୧୦ ଦିନରେ ସେ ୪ ଦିନ ଛୁଟି  ନେଉଛନ୍ତି । ଆମେରିକାରେ ଜଣେ ବ୍ୟକ୍ତିଙ୍କୁ  ପ୍ରତିବର୍ଷ ହାରାହାରି ୧୧ଟି ଛୁଟି ମିଳିଥାଏ ।  ସେହି ହିସାବରେ ଦେଖିବାକୁ ଗଲେ  ବାଇଡେନ୍‌ ୪ ବର୍ଷ ମଧ୍ୟରେ ଯେତିକି ଛୁଟି  ନେଇଛନ୍ତି ସେତିକି ଛୁଟି ନେବାକୁ ଜଣେ  ସାଧାରଣ ଆମେରିକୀୟଙ୍କୁ ୪୮ ବର୍ଷ  ସମୟ ଲାଗିବ । ବାଇଡେନ୍‌ ଆମେରିକା  ଇତିହାସରେ ସବୁଠୁ ଅଧିକ ଛୁଟି ନେଇଥିବା  ରାଷ୍ଟ୍ରପତି ବୋଲି କୁହାଯାଉଛି । ତାଙ୍କ  ପୂର୍ବରୁ ଡୋନାଲ୍ଡ ଟ୍ରମ୍ପ ନିଜର କାର୍ଯ୍ୟକାଳ  ସମୟରେ ୨୬ ପ୍ରତିଶତ ଅର୍ଥାତ୍‌ ୧୪୬୧ରୁ  ୩୮୧ ଦିନ ଛୁଟି ନେଇଥିଲେ । ସେହିପରି  ବାରାକ୍‌ ଓବାମା ଓ ରୋନାଲ୍ଡ ରେଗାନ୍‌ ନିଜର  କାର୍ଯ୍ୟକାଳ ମଧ୍ୟରେ ମାତ୍ର ୧୧ ପ୍ରତିଶତ ଦିନ  ଛୁଟିରେ ଥିଲେ । ଜିମି କାର୍ଟର ତ ରାଷ୍ଟ୍ରପତି  ଭାବେ ମାତ୍ର ୭୯ ଦିନ ଛୁଟି ନେଇଥିଲେ ।  

ବାଇଡେନ୍‌ଙ୍କର ଏହି ଅଧିକ ଛୁଟି  ନେବାକୁ ବିଭିନ୍ନ ମହଲରୁ ସମାଲୋଚନା  କରାଯାଉଛି । ଟ୍ରମ୍ପଙ୍କ କାର୍ଯ୍ୟକାଳ ସମୟରେ ହ୍ୱାଇଟ୍‌ ହାଉସ୍‌ର  ପରାମର୍ଶଦାତା ଥିବା ମାର୍କ ପାଓଲେଟା କହିଛନ୍ତି,  ଦେଶର ଏକ ବେଳାଭୂମିରେ ଚେୟାର ଉପରେ  ଆରାମ କରୁଥିବା ବାଇଡେନ୍‌ଙ୍କ ଫଟୋ ସୋସିଆଲ୍‌  ମିଡିଆରେ ଭାଇରାଲ୍‌ ହେଉଛି । ଆମେରିକା  ଓ ସାରା ବିଶ୍ୱରେ ହଚଚମଟ ଜାରି ଥିବାବେଳେ  ତାଙ୍କର ଏହି ଆରାମ କରିବା ରାଷ୍ଟ୍ରପତି ଭାବେ ତାଙ୍କର  କାର୍ଯ୍ୟକାଳକୁ ପରିଭାଷିତ କରିବ । 

ସେପଟେ ତାଙ୍କର  ସହଯୋଗୀମାନେ କହିଛନ୍ତି, ଛୁଟିରେ ଯାଇଥିବା  ସମୟରେ ବି ବାଇଡେନ ସବୁବେଳେ ନିଜ କାମ  ସହ ଜଡି଼ତ ରହୁଥିଲେ । ସେ ଲଗାତର ଜରୁରି  କଲ୍‌ ରିସିଭ୍‌ କରୁଥିଲେ । ତାଙ୍କ ସହ ସହଜରେ  ଯୋଗାଯୋଗ ହୋଇପାରୁଥିଲା । ସୂଚନାଥାଉକି, ଆମେରିକାର ରାଷ୍ଟ୍ରପତି ପଦ ସମ୍ଭାଳିବାରେ ବାଇଡେନ୍‌  ସବୁଠୁ ବୟସ୍କ ନେତା । ଡେମୋକ୍ରାଟ୍‌ ବାଇଡେନ୍‌  ୨୦୨୧ ଜାନୁଆରୀ ୨୦ରେ ରାଷ୍ଟ୍ରପତି ଭାବେ ଶପଥ  ନେଇଥିଲେ । ସେ ରିପବ୍ଲିକାନ୍‌ ପ୍ରାର୍ଥୀ ଡୋନାଲ୍ଡ ଟ୍ରମ୍ପଙ୍କୁ  ହରାଇ କ୍ଷମତା ହାସଲ କରିଥିଲେ ।