ନୂଆଦିଲ୍ଲୀ,୧୬/୦୯: ସୁପ୍ରିମକୋର୍ଟ ଓ ହାଇକୋର୍ଟରେ  ବିଚାରପତି ନିଯୁକ୍ତି ପ୍ରକ୍ରିୟା ଆହୁରି ଅଧିକ ପାରଦର୍ଶୀ  ହେବ । ସେଥିପାଇଁ ବସ୍ତୁନିଷ୍ଠ ମାନଦଣ୍ଡ ପ୍ରସ୍ତୁତ କରାଯିବ  ବୋଲି ପ୍ରଧାନ ବିଚାରପତି ଡି.ୱାଇ ଚନ୍ଦ୍ରଚୂଡ କହିଛନ୍ତି ।  ନୂଆଦିଲ୍ଲୀ ଠାରେ ରାମଜେଠ ମାଲାନୀ  ସ୍ମାରକୀ ବକ୍ତୃତାରେ ଯୋଗଦେବା  ଅବସରରେ ସେ କହିଛନ୍ତି ସେଣ୍ଟର  ଫର ପ୍ଲାନିଂ ଆଣ୍ଡ ରିସର୍ଚ୍ଚ ଦେଶରେ  ନିଯୁକ୍ତି ଯୋଗ୍ୟ ବିଚାରପତିଙ୍କ ଉପରେ ଆକଳନ କରିବା ଲାଗି ଏକ ବ୍ୟାପକ  ମଞ୍ଚ ପ୍ରସ୍ତୁତ କରିବା କାର୍ଯ୍ୟରେ ଲାଗିଛି ।  ବିଚାରପତିଙ୍କ ଅଭିଜ୍ଞତା ଓ ରାୟ ପ୍ରଦାନର ମାପକାଠି  ଆଧାରରେ ସେମାନଙ୍କ ନିଯୁକ୍ତି ହେବ । ସୁପ୍ରିମକୋର୍ଟରେ  ନିଯୁକ୍ତି ପାଇଁ ଦେଶର ପ୍ରମୁଖ ୫୦ ଜଣ ବିଚାରପତିଙ୍କ  ଡାଟାବେସ୍‌ ପ୍ରସ୍ତୁତ କରାଯାଇ ସେମାନଙ୍କ ଦକ୍ଷତା ଓ  କାର୍ଯ୍ୟର ବିଶ୍ଳେଷଣ କରାଯିବ ।

ସେହିଭଳି ସୁପ୍ରିମକୋର୍ଟ ଓ  ହାଇକୋର୍ଟ ବିଚାରପତି ନିଯୁକ୍ତି ଲାଗି ପ୍ରାର୍ଥୀଙ୍କ ମୂଲ୍ୟାଙ୍କନ  କରିବା ସଂକ୍ରାନ୍ତ ତଥ୍ୟ କଲେଜିୟମ ପାଖରେ ରହୁନଥିବା  ବୋଲି ଯେଉଁ ଅଭିଯୋଗ ହେଉଛି ତାକୁ ପ୍ରଧାନ ବିଚାରପତି ଖଣ୍ଡନ କରିଛନ୍ତି । କହିଛନ୍ତି ଦେଶର ୫୦ ଜଣ ପ୍ରମୁଖ  ବିଚାରପତିଙ୍କୁ ନେଇ କଲେଜିୟମ ଏକ ପ୍ଲାଟଫର୍ମ ପ୍ରସ୍ତୁତ  କରିଛି । ସେହି ବିଚାରପତିଙ୍କ ଦକ୍ଷତା ଆକଳନ କରାଯାଇ  ସେମାନଙ୍କୁ ନିଯୁକ୍ତି ଦିଆଯାଉଛି ।