ନୂଆଦିଲ୍ଲୀ,୩୧/୫: ବିଜେପି ପ୍ରାର୍ଥୀ କରଣ ଭୂଷଣ ଶରଣ  ସିଂହଙ୍କ କାର୍‌କେଡ୍ ଦୁର୍ଘଟଣାରେ ୨ ପିଲାଙ୍କ ଜୀବନ ଚାଲିଯିବା ଘଟଣା। ଏହି ଘଟଣାକୁ ନେଇ ମୁହଁ ଖୋଲିଛନ୍ତି କରଣ ଭୂଷଣ । ସେ କହିଛନ୍ତି ଯେ, ଦୁର୍ଘଟଣା ଘଟାଇଥିବା ଗାଡ଼ିଠୁ ତାଙ୍କ ଗାଡ଼ି ପ୍ରାୟ ୪-୫ କିମି ଦୂରରେ ଥିଲା । ଯାହା ଘଟିଗଲା ତାହା ଅତ୍ୟନ୍ତ ଦୁଃଖଦାୟକ । ଆମେ ୩ ରୁ ୪ଟି ଗାଡ଼ିରେ ନିର୍ବାଚନୀ କାର୍ଯ୍ୟକ୍ରମ ପାଇଁ ଯାଉଥିଲୁ। ମୋ ଗାଡ଼ିଠୁ ଦୁର୍ଘଟଣା ଘଟାଇଥିବା ଗାଡ଼ିଟି ପ୍ରାୟ ୪-୫ କିମି ଦୂରତାରେ ଥିଲା। ମୁଁ ନିର୍ବାଚନୀ କାମରେ ବ୍ୟସ୍ତ ଥିବା ବେଳେ ଦୁର୍ଘଟଣାରେ ୨ ଜଣଙ୍କ ମୃତ୍ୟୁ ହୋଇଥିବା ସମ୍ପର୍କରେ କଲ୍‌ ଆସିଥିଲା। ଏହାପରେ ତୁରନ୍ତ ମୁଁ ଏକ ଗାଡ଼ି ଘଟଣାସ୍ଥଳକୁ ପଠାଇଥିଲି।

ଏଥିସହ ସେ କହିଛନ୍ତି, ଭାରସାମ୍ୟ ହରାଇ ବାଇକ୍‌ଟି ରାସ୍ତାରେ ପଡ଼ିଯିବାରୁ ପଛରେ ଥିବା ଆମ ଗାଡ଼ି ତାହାକୁ ଧକ୍କା ଦେଇଥିଲା। ଏଥିରେ ଘଟଣାସ୍ଥଳରେ ଦୁଇ କଲେଜ ଛାତ୍ରଙ୍କ ଜୀବନ ଚାଲି ଯାଇଛି । ଏହା ଅତ୍ୟନ୍ତ ଦୁଃଖଦାୟକ । ଏହି ଦୁର୍ଘଟଣାରେ ଜଣେ ମହିଳା ଆହତ ହୋଇଥିବା ବେଳେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି।  ଏହା ଏକ ଦୁର୍ଘଟଣା ତେଣୁ ଅଯଥାରେ ତାଙ୍କ ନାଁକୁ ସାମିଲ ନ କରିବାକୁ ସେ କହିଛନ୍ତି ।