ଖଲ୍ଲିକୋଟ ୧୧/୦୨: ଖଲ୍ଲିକୋଟ ରାଣୀମା’ଙ୍କ ବିୟୋଗ ପରେ ଖଲ୍ଲିକୋଟ ଓ କବିସୂର୍ଯ୍ୟନଗର ମାଟି ସହ ସାରା ଗଞ୍ଜାମ ଜିଲ୍ଲା ତାଙ୍କୁ ଝୁରୁଛି । ଖଲ୍ଲିକୋଟର ରାଣୀମା’ ତଥା ରାଜମାତା ସେଠିକାର ବାସିନ୍ଦାଙ୍କ ମନ ଓ ହୃଦୟରେ ଏକ ସ୍ୱତନ୍ତ୍ର ସ୍ଥାନ ସର୍ବଦା ପାଇ ଆସିଥିଲା । ରମ୍ଭାରେ ଥିବା ତାଙ୍କ ରାଜନଅର, ମନ୍ଦିରର ପୂଜକଙ୍କ ଠାରୁ ଆରମ୍ଭ କରି ବହୁ ବିଶିଷ୍ଟ ବ୍ୟକ୍ତି ତାଙ୍କୁ ଝୁରି ହେଉଛନ୍ତି । ରାଣୀ ସାହେବା ଭି. ସୁଜ୍ଞାନ କୁମାରୀ ଦେଓଙ୍କ ପରଲୋକ ଖବର ସକାଳୁ ପ୍ରଚାରିତ ହେବା ପରେ ଖଲ୍ଲିକୋଟ ଅଞ୍ଚଳରେ ଶୋକର ଛାୟା ଖେଳିଯାଇଛି । ସମସ୍ତଙ୍କ ମୁହଁରେ କେବଳ ଗୋଟିଏ କଥା- ରାଣୀ ମାଆ ଚାଲିଗଲେ । ସ୍ୱତଃପ୍ରବୃତ୍ତ ଭାବେ ଦୋକାନ ବଜାର ବନ୍ଦ ରହିଥିଲା ।
ଖଲ୍ଲିକୋଟ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ପଛପଟେ ରାଜପରିବାର ପାଇଁ ଉଦ୍ଦିଷ୍ଟ ସ୍ୱତନ୍ତ୍ର ଶ୍ମଶାନ (ସମାଧି ମଠ)ରେ ରବିବାର ତାଙ୍କର ଅନ୍ତେଷ୍ଟିକ୍ରିୟା ସମ୍ପନ୍ନ ହେବ । ରବିବାର ଦିନତମାମ ଅନ୍ତିମ ଦର୍ଶନ ପରେ ଏକ ବିରାଟ ଶୋଭାଯାତ୍ରାରେ ପାର୍ଥିବ ଶରୀରକୁ ନଗର ପରିକ୍ରମା କରାଯିବ । ଅପରାହ୍ନ ୩ଟାରେ ଏକ ଅନ୍ତିମ ସଂସ୍କାର କରାଯିବ ବୋଲି ଜଣାଯାଇଛି । ପୋଷ୍ୟ ପୁତ୍ର ଡାକ୍ତର ସାକେତ ରାମା ରାଓ ମୁଖାଗ୍ନି ଦେବେ ବୋଲି ଜଣାଯାଇଛି ।
