କୋଲକାତା: ଡାକ୍ତର ଦୁଷ୍କର୍ମ ଓ ହତ୍ୟା ମାମଲାକୁ ନେଇ ଦେଶବ୍ୟାପୀ ବିରୋଧ ପ୍ରଦର୍ଶନ ଜାରି ରହିଛି । ଏହି ମାମଲାରେ ସୁପ୍ରିମକୋର୍ଟରେ ସିବିଆଇ ଷ୍ଟାଟସ୍ ରିପୋର୍ଟ ଦାଖଲ କରିଛି । ସିବିଆଇ ଦ୍ବାରା ଏବେ ସୁଦ୍ଧା କରାଯାଇଥିବା ତଦନ୍ତରୁ ଜଣାପଡ଼ିଛି ଯେ, ମୃତ ଡାକ୍ତରଙ୍କ ଦୁଷ୍କର୍ମ ଓ ହତ୍ୟା ମାମଲାରେ କେବଳ ସଞ୍ଜୟ ରୟର ସଂପୃକ୍ତି ଥିବା କୁହାଯାଇଛି । ଡାକ୍ତରଙ୍କ ସହିତ ଗଣଦୁଷ୍କର୍ମ ହୋଇନାହିଁ ବୋଲି ସିବିଆଇ ଷ୍ଟାଟସ୍ ରିପୋର୍ଟରେ ଦର୍ଶାଯାଇଛି । କିନ୍ତୁ ଏନେଇ ତଦନ୍ତ ଜାରି ରହିଛି ।
ସିବିଆଇ ଫରେନ୍ସିକ ରିପୋର୍ଟ ଯାଞ୍ଚ କରିଛି । ଆରଜି କର ମେଡିକାଲ କଲେଜ ଏବଂ ହସ୍ପିଟାଲର ୩୧ ବର୍ଷୀୟା ଡାକ୍ତରଙ୍କ ଦୁଷ୍କର୍ମ ଓ ହତ୍ୟା ମାମଲାରେ କେବଳ ସଞ୍ଜୟ ରୟର ସଂପୃକ୍ତି ରହିଛି । ସୂତ୍ର ଆଧାରରେ ମିଳିଥିବା ସୂଚନାକୁ ଭିତ୍ତି କରି ଜାତୀୟ ଗଣମାଧ୍ୟମରେ ଏନେଇ ଖବର ପ୍ରକାଶ ପାଇଛି । ସେପଟେ ଡିଏନଏ ରିପୋର୍ଟରେ ମଧ୍ୟ ଜଣେ ଲୋକଙ୍କ ସଂପୃକ୍ତି ନେଇ ଜଣାପଡ଼ିଛି । କିନ୍ତୁ ପୀଡ଼ିତାଙ୍କୁ ଗଣଦୁଷ୍କର୍ମ କରାଯାଇଥିବା ନେଇ ଅଭିଯୋଗ ହେଉଥିଲା ।
ସଞ୍ଜୟ ରୟକୁ ଅଗଷ୍ଟ ୧୦ରେ କୋଲକାତା ପୋଲିସ ଗିରଫ କରିଥିଲା ଏବଂ ପରେ ତାକୁ ସିବିଆଇକୁ ହସ୍ତାନ୍ତର କରିଥିଲା । ସେପଟେ ହସ୍ପିଟାଲର ସେମିନାର ହଲକୁ ସଞ୍ଜୟ ରୟ ପଶୁଥିବାର ସିସିଟିଭି ଫୁଟେଜ୍ ମଧ୍ୟ ଯାଞ୍ଚ ହୋଇଛି । ସେମିନାର ହଲରୁ ହିଁ ଡାକ୍ତରଙ୍କ ମୃତଦେହ ଉଦ୍ଧାର କରାଯାଇଥିଲା । ଘଟଣାସ୍ଥଳରୁ ରୟ’ର ହେଡସେଟ୍ ମିଳିବା ପରେ ତାକୁ ଗିରଫ କରାଯାଇଥିଲା । ସବୁଠୁ ବଡ଼ କଥା ହେଉଛି, ସିବିଆଇ ତଦନ୍ତ ଜାରି ରଖିଛି । ମାମଲାରେ ଅନ୍ୟ କେଉଁମାନଙ୍କ ସଂପୃକ୍ତି ରହିଛି ସେନେଇ ସିବିଆଇ ଖୋଳତାଡ କରୁଛି । ପରବର୍ତ୍ତୀ ସମୟରେ ମାମଲାରେ ଆଉ କିଛି ତଥ୍ୟ ସାମ୍ନାକୁ ଆସିପାରେ ।
ଅନ୍ୟପଟେ , କୋଲାକାତା ଦୁଷ୍କର୍ମ ଓ ହତ୍ୟା ମାମଲାରେ ସୁପ୍ରିମକୋର୍ଟରେ ଶୁଣାଣି ହୋଇଛି । ଆନ୍ଦୋଳନରତ ଡାକ୍ତରଙ୍କୁ କାର୍ଯ୍ୟରେ ଯୋଗ ଦେବାକୁ ସୁପ୍ରିମକୋର୍ଟ କହିଥିବା ବେଳେ ଡାକ୍ତରଙ୍କ ବିରୋଧରେ କୌଣସି ଆକ୍ସନ ହେବ ନାହିଁ ବୋଲି ଆଶ୍ବସ୍ତ କରିଛନ୍ତି । ସେପଟେ ମୃତ ଡାକ୍ତରଙ୍କ ଶରୀରରୁ ୧୫୧ ଗ୍ରାମର ସିମେନ୍ ମିଳିଥିବା ନେଇ ଯେଉଁ ଦାବି କରାଯାଉଛି ତା ଉପରେ ସୁପ୍ରିମକୋର୍ଟ କ୍ଷୋଭ ପ୍ରକାଶ କରିଛନ୍ତି । ସୋସିଆଲ ମିଡିଆ ଡିବେଟ ଉପରେ ଭାରସା ନକରିବାକୁ କହିଛନ୍ତି ସିଜେଆଇ ଡିଓ୍ବାଇ ଚନ୍ଦ୍ରଚୂଡ଼ ।
