ମାଲକାନଗିରି, ୧୮/୦୭ : ଛତିଶଗ଼ଡ କାଙ୍କେର ଜିଲ୍ଲାର ପାଖାଁଞ୍ଜୁର ଥାନା ଅନ୍ତର୍ଗତ ଚିନ୍ଦବେଟି ଜଙ୍ଗଲରେ ସୁରକ୍ଷାକର୍ମୀ ଓ ମାଓବାଦୀଙ୍କ ମଧ୍ୟରେ ଗୁଳି ବିନିମୟ ହୋଇଛି। ଏଥିରେ ୨ ଜଣ ଯବାନ ସହିଦ ହୋଇଥିବା ବେଳେ ୪ ଜଣ ଗୁରୁତର ଭାବେ ଆହତ ହୋଇଛନ୍ତି। ଛତିଶଗଡ ଡିଆରଜି ବାହିନୀର ୪ ଜଣ ଆହତ ଯବାନଙ୍କୁ ବାୟୁସେନାର ହେଲିକପ୍ଟର ଯୋଗେ ରାୟପୁର ସ୍ଥାନାନ୍ତର କରାଯାଇଛି। ଯବାନଙ୍କ ଗୁଳିରେ ଦୁଇ ଜଣ ମାଓବାଦୀ ପ୍ରାଣ ହରାଇଥିବା ଜଣାପଡିଛି।
ସୂଚନାନୁଯାୟୀ, ପାଖାଁଞ୍ଜୁର ଚିନ୍ଦବେଟି ଜଙ୍ଗଲରେ ମାଓ ଗତିବିଧି ବଢିବା ଯୋଗୁଁ ମହାରାଷ୍ଟ୍ର ଓ ଛତିଶଗଡ଼ ପୋଲିସ ପକ୍ଷରୁ ମିଳିତ ଭାବେ କମ୍ବିଂ ଅପରେସନ ଆରମ୍ଭ ହୋଇଥିଲା। ହେଲେ ଏହାର ଖବର ପାଇ ମାଓବାଦୀମାନେ ଘଞ୍ଚ ଜଙ୍ଗଲରେ ଲୁଚିଛପି ଯବାନଙ୍କ ଉପରେ ପ୍ରଥମେ ଆକ୍ରମଣ କରିଥିଲେ। ଯବାନମାନେ ମଧ୍ୟ ଏହାର ପାଲଟା ଜବାବ ଦେଇଥିଲେ। ହେଲେ ଗୁଳି ବିନିମୟ ସମୟରେ ମହାରାଷ୍ଟ୍ର ପୋଲିସର ୨ ଜଣ ଯବାନ ଓ ଛତିଶଗଡ ପୋଲିସର ୪ ଜଣ ଯବାନ ଆହତ ହୋଇଥିଲେ। ଆହତ ଯବାନମାନଙ୍କୁ ତୁରନ୍ତ ମେଡିକାଲ ନିଆଯାଇଥିଲା। ସେଠାରେ ଚିକିତ୍ସାଧିନ ଅବସ୍ଥାରେ ୨ ଜଣ ଯବାନ ସହିଦ ହୋଇଛନ୍ତି। ସହିଦ ଦୁଇ ଯବାନ ହେଉଛନ୍ତି ଏସଟିଏଫ୍ ବାହିନୀର ଭରତ ଲାଲ୍ ସାହୁ ଓ ସତେର ସିଂ। ବର୍ତ୍ତମାନ ଘଟଣାସ୍ଥଳରେ ସର୍ଚ୍ଚ ଅପରେସନ ଜାରି ରହିଛି।
