ଭୋପାଳ,୭।୮:  ମଧ୍ୟ ପ୍ରଦେଶରେ କଂଗ୍ରେସର ବରିଷ୍ଠ ନେତା ସଜ୍ଜନ ସିଂହ ବର୍ମାଙ୍କ ବିବାଦୀୟ ବୟାନ। ସେ କହିଛନ୍ତି, ଶ୍ରୀଲଙ୍କା ଓ ବାଂଲାଦେଶ ଭଳି ସ୍ଥିତି ଏବେ ଭାରତରେ ହେବାକୁ ଯାଉଛି। ଏପରିକି ସେ କହିଛନ୍ତି, ଯେଉଁଭଳି ଶେଖ ହସିନାଙ୍କ ଘରେ ସାଧାରର ଜନତା ପଶିଗଲେ, ସେଭଳି ଭାରତରେ ମଧ୍ୟ ମୋଦିଙ୍କ ଘରେ ପଶିବେ। ବର୍ମାଙ୍କ ଏହି ବିବାଦୀୟ ବୟାନ ଦିଆଯାଇଥିବା ଭିଡିଓ ଏବେ ଜୋରଦାର ଭାଇରାଲ ହେଉଛି।

ଯେଉଁ ସମୟରେ ସଜ୍ଜନ ସିଂହ ବର୍ମା ଏହି ବିବାଦୀୟ ମନ୍ତବ୍ୟ ଦେବା ବେଳେ ମଞ୍ଚରେ ମଧ୍ୟ ପ୍ରଦେଶ କଂଗ୍ରେସ ଅଧ୍ୟକ୍ଷ ଜିତୁ ପଟଓ୍ବାରୀଙ୍କ ସହିତ ବହୁ ନେତା ଥିଲେ। ଇନ୍ଦୋର ନଗର ନିଗମରେ ଭ୍ରଷ୍ଟାଚାର ଅଭିଯୋଗ ଓ ଟ୍ୟାକ୍ସ ବୃଦ୍ଧି ବିରୋଧକୁ ନେଇ କଂଗ୍ରେସର ବଡ ପ୍ରଦର୍ଶନ ଆୟୋଜନ କରାଯାଇଥିଲା। ଏହି ସମୟରେ ଭାଷଣ ଦେଇ ସଜ୍ଜନ ସିଂହ ବର୍ମା ଭାରତର ତୁଳନା ଶ୍ରୀଲଙ୍କା ଓ ବାଂଲାଦେଶ ସହିତ କରିଛନ୍ତି।

ବର୍ମା କହିଛନ୍ତି, ମୁଁ ତ କେବଳ ଏତିକି କହିବାକୁ ଚାହୁଁ ଦୁଇ ଦିନ ହେବ ଆପଣ ଟିଭିରେ ଦେଖୁଛନ୍ତି, ବାଂଲାଦେଶର ଜନତା ଶେଖ ହସିନାଙ୍କ ଭୁଲ କାରଣରୁ ପ୍ରଧାନମନ୍ତ୍ରୀଙ୍କ ବାସଭବନ ଓ ରାଷ୍ଟ୍ରପତି ଭବନରେ ପଶି ଯାଇଥିଲେ। ମନେ ରଖନ୍ତୁ ମୋଦିଜୀ ଆପଣଙ୍କ ଭୁଲ ନୀତି ଯୋଗୁଁ ଦିନେ ଲୋକେ ଆପଣଙ୍କ ବାସଭବନରେ ପଶି ଦଖଲ କରିନେବେ। ପ୍ରଥମେ ଶ୍ରୀଲଙ୍କା, ତା ପରେ ବାଂଲାଦେଶ ଏବେ ଭାରତର ନମ୍ବର ଆସୁଛି।’