ବାରଙ୍ଗ ୨୩/୦୩: ନନ୍ଦନକାନନ ପ୍ରାଣୀ ଉଦ୍ୟାନ ପାଇଁ ଖୁସି ଖବର । ୬ ବର୍ଷ ବୟସ୍କା ସିଂହୀ ରେୱା ମା’ ହେବାକୁ ଯାଉଛି । ରେୱା ପ୍ରଥମ ଥର ତା’ର ଶାବକମାନଙ୍କ ଠିକ୍ରେ ଯତ୍ନ ନେଇ ପାରିନଥିଲା । ତା’ର ଦୁଇ ନବଜାତକକୁ ମାରି ଦେଇଥିବାରୁ ଆରମ୍ଭରୁ ପ୍ରାଣୀ ଚିକିତ୍ସକମାନେ ରେୱାର ସ୍ୱାସ୍ଥ୍ୟ ଉପରେ ଅଧିକ ଧ୍ୟାନ ଦେଇଛନ୍ତି । ତାକୁ ଦରକାରୀ ଭିଟାମିନ ଖୁଆଇ ଏବଂ ପ୍ରତିଶୋଧକ ଟିକା ଦେଇତା’ର ସ୍ୱାସ୍ଥ୍ୟ ଉପରେ ଯତ୍ନ ନିଆଯାଉଥିଲା । ଏବେ ପ୍ରସବ ସମୟ ହୋଇଯାଇଥିବାରୁ ସଫାରୀର ଫିଡିଂ ଚ୍ୟାମ୍ବରକୁ ସିସିଟିଭି ନଜରରେ ରଖାଯାଇଛି । ଆଉ ଅଳ୍ପ ଦିନ ମଧ୍ୟରେ ରେୱା ପ୍ରସବ କରିବ ବୋଲି ସମସ୍ତ ପ୍ରକାର ସଙ୍କେତ ମିଳିଥିବା ଜଣେ ଅଧିକାରୀଙ୍କ ଠାରୁ ସୂଚନା ମିଳିଛି ।
ପ୍ରାୟ ୧୦୦ ଦିନ ପୂର୍ବରୁ କମଳା ନେହରୁ ପ୍ରାଣୀ ସଂଗ୍ରହାଳୟରୁ ଆସିଥିବା ସିଂହୀ ‘ରେୱା’ ସହିତ ନନ୍ଦନକାନନରେ ଜନ୍ମିତ ସିଂହ ‘ଜିତ୍’ର ମିଳନ କରାଯାଇଥିଲା । ୨୦୨୩ ଜାନୁଆରୀ ୧୦ରେ ସିଂହୀ ରେୱା ୪ଟି ଶାବକ ଜନ୍ମ ଦେଇଥିଲା । ସେଥିମଧ୍ୟରୁ ସକାଳେ ଗୋଟିକର ମୃତ୍ୟୁ ହୋଇଥିବା ବେଳେ ଗୋଟିକର କେବଳ ମୁଣ୍ଡ ପଡ଼ିଥିଲା । ତେଣୁ ମା’ ଗୋଟିକୁ ମାରି ଖାଇଥିବା ଓ ଅନ୍ୟଟିକୁ ମାରିଥିବା ଅନୁମାନ କରି କର୍ତ୍ତୃପକ୍ଷ ଜୀବିତ ଦୁଇ ଶାବକକୁ ମା’ଠାରୁ ଅଲଗା କରି ଶିଶୁଯତ୍ନ କେନ୍ଦ୍ରରେ ଛାଡ଼ିଥିଲେ । ଏବେ ଦୁଇ ଶାବକ ପ୍ରାୟ ୧୪ ମାସର ହେଲେଣି । ଗତ ନନ୍ଦନକାନନ ପ୍ରତିଷ୍ଠା ଦିବସରେ ସେମାନଙ୍କ ନାମ ମାୟା ଓ ଶିବମ୍ ରଖାଯାଇଛି ।