ନୂଆଦିଲ୍ଲୀ,୦୨/୦୪: ମଙ୍ଗଳବାରଠୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୧୬ ତାରିଖ ଯାଏ ଉତ୍ତରାଖଣ୍ଡ, ରାଜସ୍ଥାନ ଓ ଉତ୍ତରପ୍ରଦେଶରେ ନିର୍ବାଚନୀ ରାଲିକୁ ସମ୍ବୋଧନ କରିବେ ।
ରିପୋର୍ଟ ଅନୁସାରେ, ଏପ୍ରିଲ ୨ରେ ଅର୍ଥାତ୍ ମଙ୍ଗଳବାର ସେ ଉତ୍ତରାଖଣ୍ଡର ରୁଦ୍ରପୁର ଓ ରାଜସ୍ଥାନର କୋଠରୁତାଲିରେ ଜନସଭା କରିବେ । ଏପ୍ରିଲ ୬ ତାରିଖରେ ସେ ଉତ୍ତରପ୍ରଦେଶର ସାହାରନ୍ପୁରରେ ଏକ ଜନସଭାକୁ ସମ୍ବୋଧନ କରିବାର କାର୍ଯ୍ୟକ୍ରମ ରହିଛି । ସେହିଦିନ ସନ୍ଧ୍ୟାରେ ସେ ଗାଜିଆବାଦରେ ଏକ ରୋଡ୍ ଶୋ’ କରିବେ । ଏପ୍ରିଲ ୯ ତାରିଖରେ ପିଲଭିତ୍ରେ ଏକ ବ୍ୟାପକ ରାଲିକୁ ସମ୍ବୋଧନ କରିବେ ପ୍ରଧାନମନ୍ତ୍ରୀ । ୧୬ ତାରିଖରେ ସେ ରାଜ୍ୟର ମୋରାଦାବାଦରେ ଏକ ଜନସଭା କରିବେ ।
ଇତିମଧ୍ୟରେ ଲୋକସଭା ନିର୍ବାଚନକୁ ଆଉ ମାତ୍ର କେଇ ସପ୍ତାହ ବାକି ଥିବାବେଳେ ବିଜେପି ଏପ୍ରିଲ ୬ ତାରିଖରେ ଦଳର ପ୍ରତିଷ୍ଠା ଦିବସକୁ ‘୪୦୦ ପାର୍' ସ୍ଲୋଗାନ୍ ସହିତ ପାଳନ କରିବ । ପ୍ରତିଷ୍ଠା ଦିବସ ଦିନ ବିଭିନ୍ନ ସ୍ଥାନରେ କାର୍ଯ୍ୟକ୍ରମ କରିବା ଲାଗି ଦଳ ଏହାର କେନ୍ଦ୍ରୀୟ ନେତାଙ୍କଠାରୁ ଆରମ୍ଭ କରି ବୁଥ୍ସ୍ତରର କର୍ମକର୍ତ୍ତାଙ୍କୁ ନିର୍ଦ୍ଦେଶ ଜାରି କରିଛି ।
ସୂଚନାଥାଉକି, ଚଳିତଥର ଏପ୍ରିଲ ୧୯ରୁ ଆରମ୍ଭ କରି ୭ଟି ପର୍ଯ୍ୟାୟରେ ଲୋକସଭା ନିର୍ବାଚନ ଅନୁଷ୍ଠିତ ହେବ । ଏଥରକ ପ୍ରାୟ ୯୭ କୋଟି ଭୋଟର ସେମାନଙ୍କର ମତାଧିକାର ସାବ୍ୟସ୍ତ କରିବେ।
