କଟକ, ୧୩/୦୨ : ଏଟିଏମ୍ ଭ୍ୟାନରୁ ଦେଢ଼ କୋଟି ଲୁଟ୍ ଘଟଣାର ପର୍ଦ୍ଦାଫାସ୍। କଟକ ଜିଲ୍ଲା ତିଗିରିଆ ଥାନା ଅନ୍ତର୍ଗତ ଗୋଡ଼ିଝରିଆରେ ଏଟିଏମ୍ ଭ୍ୟାନରୁ ଦେଢ଼ କୋଟି ଲୁଟ୍ ଘଟଣାର ପର୍ଦ୍ଦାଫାସ୍ ହୋଇଛି। ଲୁଟ୍ କରିଥିବା ଗ୍ୟାଙ୍ଗକୁ ଧରିଲା କଟକ ଗ୍ରାମାଞ୍ଚଳ ପୋଲିସ। ଗ୍ୟାଙ୍ଗର ୭ ଜଣ ସଦସ୍ୟଙ୍କୁ ଗିରଫ କରାଯାଇଛି।
ଗତ ବର୍ଷ ନଭେମ୍ବର ୧୦ ତାରିଖରେ କଟକ ଜିଲ୍ଲା ତିଗିରିଆ ଥାନା ଅନ୍ତର୍ଗତ ଗୋଡ଼ିଝରିଆରେ ଏଟିଏମ୍ ଭ୍ୟାନରୁ ଦେଢ଼ କୋଟି ଲୁଟ୍ ହୋଇଥିଲା। ତିଗିରିଆ ଥାନା ଅନ୍ତର୍ଗତ ଗୋଡ଼ିଝରିଆ ରାସ୍ତାରେ ଟଙ୍କା ବୋଝେଇ ଏଟିଏମ୍ ଗାଡ଼ିକୁ ବନ୍ଧୁକ ମୁନରେ ଅଟକେଇ ଦେଢ଼ କୋଟି ଟଙ୍କା ଲୁଟି ଫେରାର ହୋଇଯାଇଥିଲେ ଏହି ଗ୍ୟାଙ୍ଗ୍। ସେମାନଙ୍କ ନିକଟରୁ ୬୪ ଲକ୍ଷ ୪୫ ହଜାର ଟଙ୍କା ସହ ୩ ଟି ଛୁରୀ ଜବତ କରାଯାଇଛି।
ଏଟିଏମ୍ ଗାଡ଼ିର ଦୁଇ ଜଣ କର୍ମଚାରୀ ଲୁଟ୍ ପାଇଁ କରିଥିଲେ ପ୍ଲାନ୍। ଲୁଟ୍ ପାଇଁ ତିଗିରିଆ ଥାନା ଅଞ୍ଚଳର ପେଶାଦାର ଅପରାଧୀ କଲିମ ଖାନକୁ ସୁପାରୀ ଦେଇଥିଲେ ଏଟିଏମ୍ ଗାଡ଼ିର ଦୁଇ କର୍ମଚାରୀ। ଭ୍ୟାନର ଦୁଇ ଜଣ କର୍ମଚାରୀ ଫେରାର ଅଛନ୍ତି। ସେମାନଙ୍କୁ ଧରିବା ପାଇଁ ଜୋରଦାର ଉଦ୍ୟମ ଚାଲିଛି। କଟକ ଗ୍ରାମାଞ୍ଚଳ ଏସପି ମିହିର କୁମାର ପଣ୍ଡା ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି।