ପାଟଣାଗଡ଼, ୦୪/୦୭ : ପାଟଣାଗଡ ଅଞ୍ଚଳରେ ଦିନକୁ ଦିନ ବଢିବାରେ ଲାଗିଛି ଚୋରି ଡକାୟତି ଘଟଣା। ୨ ଦିନ ତଳେ ପାଟଣାଗଡ଼ ମେନ୍ ରୋଡରେ ଥିବା ଏକ ମୋବାଇଲ୍ ଦୋକାନର ସଟର ଫାଡି ୧୦୦ଟି ମୋବାଇଲ୍ ସହ ମୋବାଇଲ୍ ସାମଗ୍ରୀ ଚୋରି ହୋଇଥିଲା। ଗତକାଲି ପୁଣି ପାଟଣାଗଡ ବ୍ଲକ ରହେନମାଲ ଗାଁର କପଡା ବ୍ୟବସାୟୀ ଖିରସିନ୍ଧୁ ମେହେରଙ୍କ ଘରୁ ଲୁଟ୍ ହୋଇଛି।
ସୂଚନାନୁଯାୟୀ, ବୁଧବାର ରାତିରେ ଖିରସିନ୍ଧୁ ମେହେରଙ୍କ ପରିବାର ଶୋଇଥିବା ସମୟରେ ଦୁର୍ବୃତ୍ତମାନେ ପଶି ଆଲମିରାରୁ ୧୦ ଭରି ସୁନା ଓ ୩ ଲକ୍ଷ ଟଙ୍କା ସହ କିଛି ଗୁରୁତ୍ଵପୂର୍ଣ୍ଣ କାଗଜପତ୍ର ନେଇ ଫେରାର ମାରିଥିଲେ। ପରିବାର ଲୋକେ ଉଠି ଦେଖିଲା ବେଲକୁ ଆଲମିରା ଭଙ୍ଗା ହୋଇ ସୁନା ଟଙ୍କା ଚୋରି ହୋଇଯାଇଛି। ଏହାପରେ ଖିରସିନ୍ଧୁ ପାଟଣାଗଡ ଥାନାରେ ଲିଖିତ ଅଭିଯୋଗ କରିଥିଲେ। ପାଟଣାଗଡ଼ ପୋଲିସ ଓ ବଲାଙ୍ଗିର ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ କରୁଥିବା ଦେଖିବାକୁ ମିଳିଛି।