ନୂଆଦିଲ୍ଲୀ,୧୯/୦୪: ଆଇପିଏଲ୍ ୨୦୨୪ର ୩୪ତମ ମ୍ୟାଚ୍ ଶୁକ୍ରବାର ଲକ୍ଷ୍ନୌର ଅଟଳ ବିହାରୀ ବାଜପାୟୀ ଏକନା ଷ୍ଟାଡିୟମରେ ଖେଳାଯାଇଥିଲା। ଏହି ମ୍ୟାଚ୍ରେ ମୁହାଁମୁହିଁ ହୋଇଥିଲେ ଚେନ୍ନାଇ ସୁପରକିଙ୍ଗ୍ସ ଓ ଲକ୍ଷ୍ନୌ ସୁପର ଜିଆଣ୍ଟ୍ସ। ତେବେ ପ୍ରଥମ ବ୍ୟାଟିଂ କରିବାକୁ ମଇଦାନକୁ ଓହ୍ଲାଇଥିବା ଚେନ୍ନାଇ ନିର୍ଦ୍ଧାରିତ ଓଭରରେ ୬ ଓ୍ବିକେଟ ହରାଇ ୧୭୬ ରନ୍ କରିଛି।
ଦଳ ପକ୍ଷରୁ ରବିନ୍ଦ୍ର ଜାଡ଼େଜା ସର୍ବାଧିକ ୫୭ ରନ୍ର ଅର୍ଦ୍ଧଶତକୀୟ ପାଳି ଖେଳିଥିବା ବେଳେ ମ୍ୟାଚ୍ ଶେଷରେ ଧୋନୀଙ୍କର ଦର୍ଶନୀୟ ପ୍ରଦର୍ଶନର ମଜା ଉଠାଇଥିଲେ କ୍ରିକେଟ ପ୍ରେମୀ। ଦଳ ପକ୍ଷରୁ ଆଜିଙ୍କ୍ୟା ରାହାଣେ ୨୪ ବଲ୍ରେ ୩୬ ରନ୍, ଋତୁରାଜ ଗାଏକଓ୍ବାଡ ୧୩ ବଲ୍ରେ ୧୭ ରନ୍, ରବିନ୍ଦ୍ର ଜାଡ଼େଜା ୫ଟି ଚୌକା ଓ ଗୋଟିଏ ଛକା ସହିତ ୪୦ ବଲ୍ରେ ୫୭ ରନ୍, ମୋଇନ୍ ଅଲ୍ଲୀ ୨୦ ବଲ୍ରେ ୩୦ ରନ୍ ଓ ଏମ୍ ଏସ୍ ଧୋନୀ ତିନୋଟି ଚୌକା ୨ଟି ଛକା ସହିତ ୯ ବଲ୍ରେ ୨୮ ରନ୍ କରି ଅପରାଜିତ ରହିଥିଲେ। ତେବେ ଅନ୍ୟ କୌଣସି ଖେଳାଳୀ ଦୁଇ ଅଙ୍କ ବି କରିପାରିନଥିଲେ।
ସେପଟେ ଲକ୍ଷ୍ନୌ ପକ୍ଷରୁ କୃଣାଳ ପାଣ୍ଡ୍ୟାଙ୍କୁ ୨ଟି ସଫଳତା ମିଳିଥିବା ବେଳେ ମୋହସିନ୍ ଖାନ୍, ୟସ୍ ଠାକୁର, ରବି ବିଷ୍ଣୋଇ ଏବଂ ମାର୍କସ୍ ଷ୍ଟୋଇନିସ୍ଙ୍କୁ ଗୋଟିଏ ଲେଖାଏଁ ସଫଳତା ମିଳିଥିଲା। ଏବେ ଲକ୍ଷ୍ନୌ ଦଳ ଚେନ୍ନାଇର ୧୭୭ ରନ୍ର ଟାର୍ଗେଟକୁ ପୂରା କରିବାକୁ ମଇଦାନକୁ ଓହ୍ଲାଇବେ।
