ଟୋକିଓ: ଜାପାନରେ ପୁଣି ଭୂମିକମ୍ପ । ଶକ୍ତିଶାଳୀ ଭୂକମ୍ପ ଝଟକାରେ ଥରିଉଠିଲା ଜାପାନ । ସୋମବାର ବିଳମ୍ବିତ ରାତି ପାଖାପାଖି ୧୨ଟା ୫୯ ମିନିଟ୍ ସମୟରେ ଉତ୍ତର ଜାପାନର ଲଓ୍ୱେତ ଓ ଆଓମୋରି ଅଞ୍ଚଳରେ ବଡ ଧରଣର ଭୂମିକମ୍ପ ଅନୁଭୂତ ହୋଇଛି । ରିକ୍ଟର ସ୍କେଲରେ ଏହାର ତୀବ୍ରତା ୬.୧ ରେକର୍ଡ କରାଯାଇଥିବା ନେଇ ଜାପାନ ପାଣିପାଗ ଏଜେନ୍ସି ପକ୍ଷରୁ ସୂଚନା ଜାରି କରାଯାଇଛି । 

 ଜାପାନର ଉପକୂଳବର୍ତ୍ତୀ ଅଞ୍ଚଳରେ ଏହି ଭୂକମ୍ପ ହୋଇଥିବା ବେଳେ ଏବେସୁଦ୍ଧା ସୁନାମି ନେଇ କୌଣସି ଆଲର୍ଟ ଜାରି କରାଯାଇ ନାହିଁ । ଅନ୍ୟପଟେ ଭୂକମ୍ପ ଜନିତ କ୍ଷୟକ୍ଷତି ନେଇ ମଧ୍ୟ କୌଣସି ସୂଚନା ମିଳିପାରି ନାହିଁ । ଭୂକମ୍ପ ପରେ ସ୍ଥାନୀୟ ଲୋକଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଛି । ଯଦିଓ ସୁନାମି ନେଇ କୌଣସି ସୂଚନା ଜାରି ହୋଇନି ତେବେ ଏଭଳି ଆଶଙ୍କାକୁ ଏଡ଼ାଇ ଦିଆଯାଇନପାରେ ।

ଏହାପୂର୍ବରୁ ଜାନୁଆରୀ ୧ ତାରିଖରେ ମଧ୍ୟ ଜାପାନରେ ଶକ୍ତିଶାଳୀ ଭୂମିକମ୍ପ ଅନୁଭୂତ ହୋଇଥିଲା । ଗୋଟିଏ ଦିନରେ ଏକାଧିକ ସ୍ଥାନରେ ସିରିଜ ଭୂକମ୍ପ ହୋଇଥିଲା । ନୋଟେ ଦ୍ୱୀପାଞ୍ଚଳର ଇସିକାଓ୍ବାରେ ୭.୬ ତୀବ୍ରତାର ଭୂକମ୍ପ ଅନୁଭୂତ ହୋଇଥିଲା । ଏହାପରେ ସୁନାମି ଆଲର୍ଟ ଜାରି କରାଯାଇଥିଲା । ଏଥିରେ ପାଖାପାଖି ୫୦ ଜଣଙ୍କ ଜୀବନ ଯାଇଥିବା ବେଳେ ଘର ଦ୍ୱାର ଭାଙ୍ଗିଯିବା ସହ ବ୍ୟାପକ କ୍ଷୟକ୍ଷତି ସହିଥିଲେ ଜାପାନର ଲୋକେ ।