ନୂଆଦିଲ୍ଲୀ: ଦିଲ୍ଲୀ ଅବକାରୀ ନୀତି ମାମଲାରେ ଆମ୍ ଆଦମୀ ପାର୍ଟି ନେତା ତଥା ପୂର୍ବତନ ଉପ ମୁଖ୍ୟମନ୍ତ୍ରୀ ମନୀଷ ସିସୋଦିଆ ତିହାର ଜେଲରୁ ମୁକ୍ତ ହୋଇଛନ୍ତି । ଆଜି (ଶୁକ୍ରବାର) ସୁପ୍ରିମକୋର୍ଟ ସିସୋଦିଆଙ୍କୁ ଅବକାରୀ ନୀତି ସହ ଜଡିତ ଦୁର୍ନୀତି ଏବଂ ଅର୍ଥ ହେରଫେର ମାମଲାରେ ଜାମିନ ପ୍ରଦାନ କରିଛନ୍ତି। ଆପ୍(AAP) ନେତା ମନୀଷ ସିସୋଦିଆଙ୍କ ଓକିଲ ଦିଲ୍ଲୀ କୋର୍ଟରେ ଜାମିନ ବଣ୍ଡ୍ ପୂରଣ କରିଥିଲେ ଏବଂ ପରେ ତାଙ୍କର ମୁକ୍ତି ସମାପ୍ତ ହୋଇଥିଲା । ଗତ ୧୭ ମାସ ଧରି ସେ ତିହାର ଜେଲରେ ରହିଥିଲେ । 

ସୂଚନାଥାଉକି,ଯେ ଦିଲ୍ଲୀର ପୂର୍ବତନ ଉପମୁଖ୍ୟମନ୍ତ୍ରୀ ସିସୋଦିଆଙ୍କୁ ୨୬ ଫେବୃଆରୀ ୨୦୨୩ରେ ସିବିଆଇ ଗିରଫ କରିଥିଲା । ଦିଲ୍ଲୀ ଅବକାରୀ ନୀତି ୨୦୨୧-୨୨ ର ପ୍ରକ୍ରିୟା ଏବଂ କାର୍ଯ୍ୟାନ୍ୱୟନରେ ଅନିୟମିତତା ହୋଇଥିବା ଅଭିଯୋଗ ହୋଇଛି । ପରେ ଏହି ନୀତି ବାତିଲ କରାଯାଇଥିଲା । ଏଥି ସହିତ, ଅର୍ଥ ହେରଫେର ମାମଲାରେ ୯ ମାର୍ଚ୍ଚ ୨୦୨୩ ରେ ଇଡି ତାଙ୍କୁ ଗିରଫ କରିଥିଲା।

ଅର୍ଥ ହେରଫେର ମାମଲା ସିବିଆଇ ଏଫ୍ଆଇଆର୍ ସହିତ ଜଡିତ ଥିଲା । ୨୮ ଫେବୃଆରୀ ୨୦୨୩ରେ ମନୀଷ ସିସୋଦିଆ ଦିଲ୍ଲୀ କ୍ୟାବିନେଟରୁ ଇସ୍ତଫା ଦେଇଥିଲେ । ଏହି ସମୟରେ ସେ ଶିକ୍ଷା ମନ୍ତ୍ରଣାଳୟର ଦାୟିତ୍ୱରେ ଥିଲେ। ଜାମିନ ମାଗିବା ବେଳେ ସିସୋଡିଆ କହିଥିଲେ ଯେ ସେ ୧୭ ମାସ ଜେଲରେ ଅଛନ୍ତି ଏବଂ ତାଙ୍କ ବିରୋଧରେ ମାମଲା ଏପର୍ଯ୍ୟନ୍ତ ଆରମ୍ଭ ହୋଇନାହିଁ । ଏହି ସମୟରେ ଇଡି ଏବଂ ସିବିଆଇ ତାଙ୍କ ଜାମିନ ଆବେଦନକୁ ବିରୋଧ କରିଥିଲେ।

ଅନ୍ୟପକ୍ଷରେ ମନୀଷ ସିସୋଦିଆଙ୍କୁ ଜାମିନ ପ୍ରଦାନ କରିବାକୁ ସୁପ୍ରିମକୋର୍ଟ ଦେଇଥିବା ନିଷ୍ପତ୍ତିକୁ ଆମ୍ ଆଦମୀ ପାର୍ଟି 'ସତ୍ୟର ବିଜୟ' ବୋଲି କହିଛି । ଏହା ସହିତ ଦଳ ଆଶା ପ୍ରକଟ କରିଛି ଯେ ଅନ୍ୟ ଜେଲରେ ଥିବା AAP ନେତାମାନେ ମଧ୍ୟ ନ୍ୟାୟ ପାଇବେ।