ଭୁବନେଶ୍ୱର, ୨୭।୦୩ : ବୁଧବାର ବିଜେଡିରେ ମିଶିବେ କଂଗ୍ରେସ ବିଧାୟକ ସୁର ରାଉତରାୟଙ୍କ ସାନପୁଅ କ୍ୟାପଟେନ ମନ୍ମଥ ରାଉତରାୟ। ଭୁବନେଶ୍ୱର ମାଉସୀ ମା' ଛକରୁ ସମର୍ଥକମାନଙ୍କୁ ଧରି ବିରାଟ ପଟୁଆରରେ ଯାଇ ଶଙ୍ଖ ଭବନରେ ବିଜେଡିରେ ସାମିଲ ହେବେ। ଦୀର୍ଘ ଦିନ ଧରି ମନ୍ମଥ କେଉଁ ଦଳକୁ ଯିବେ ଚର୍ଚ୍ଚା ଲାଗି ରହିଥିଲା। ଶେଷରେ ସେ ବିଜେଡି ସାମିଲ ହେବେ ବୋଲି ନିଷ୍ପତ୍ତି ନେଇଛନ୍ତି।
ସୂଚନାଯୋଗ୍ୟ ଯେ, କିଛି ମାସ ତଳେ କ୍ୟାପଟେନ ମନ୍ମଥ ରାଉତରାୟ ପାଇଲଟ ଚାକିରୀରୁ ସ୍ୱେଛାକୃତ ଭାବେ ଅବ୍ୟାହତି ନେଇଥିଲେ। ଜଟଣୀରୁ ବିଧାୟକ ପ୍ରାର୍ଥୀ ଭାବେ ଛିଡା ହେବାକୁ ଇଚ୍ଛା ପ୍ରକାଶ କରିଥିଲେ । ହେଲେ କଂଗ୍ରେସ ଦଳରେ ଛିଡା ହେବେନାହିଁ ବୋଲି ଗଣମାଧ୍ୟମ ଆଗରେ ସ୍ପଷ୍ଟ କହିଥିଲେ । ସେବେଠାରୁ କେଉଁ ଦଳରୁ ସେ ଆଗକୁ ନିର୍ବାଚନ ଲଢିବ, ତାକୁ ନେଇ ଜଟଣୀ ସହ ରାଜ୍ୟ ରାଜନୀତିରେ ଚର୍ଚ୍ଚା ଧରିଥିଲା।
ଏପିରିକି ଦୁଇ ଦିନ ତଳେ ଜଟଣୀ ବିଧାୟକ ସୁର ରାଉତରାୟ କହିଥିଲେ ଯେ, ମୁଁ ମୋ ପୁଅକୁ ବୁଝାଇବାକୁ ଚେଷ୍ଟା କରୁଛି। ମୋ ସାନ ପୁଅ ଟିକିଏ ଅବୁଝା। ସେ ବିଜେଡି ପ୍ରତି ଆକର୍ଷିତ ହୋଇଯାଇଛି। ତେଣୁ ବୁଝାଇବା ଟିକିଏ କଷ୍ଟ। ତଥାପି ମୁଁ ଚେଷ୍ଟା କରୁଛି।