ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ମାସିକ ରେଡିଓ ଭିତ୍ତିକ କାର୍ଯ୍ୟକ୍ରମ 'ମନ କି ବାତ'ର ୧୧୦ ତମ ସଂସ୍କରଣ ଆଜି (ରବିବାର) ପ୍ରସାରିତ ହୋଇଛି । ଏହି ପର୍ଯ୍ୟାୟରେ ପ୍ରଧାନମନ୍ତ୍ରୀ ମୋଦୀ ମହିଳା ଏବଂ ସେମାନଙ୍କର ସଶକ୍ତିକରଣ ବିଷୟରେ କହିଛନ୍ତି । ସେ କହିଛନ୍ତି ଯେ ଆଜି ଦେଶର ବିକାଶ ତଥା ପ୍ରଗତିରେ ମହିଳାମାନେ କାନ୍ଧରେ କାନ୍ଧ ମିଶାଇ କାମ କରୁଛନ୍ତି । ସେ କହିଛନ୍ତି ଯେ ଆଜି ସରକାର ବିଭିନ୍ନ ଯୋଜନା ସହାୟତାରେ ମହିଳାମାନଙ୍କୁ ସଶକ୍ତ କରୁଛନ୍ତି । ଏହି କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି ଯେ ମାର୍ଚ୍ଚରେ ଆଚରଣ ବିଧି ଲାଗୁ ହେବାର ସମ୍ଭାବନା ରହିଛି । ଏହି ସମୟ ମଧ୍ୟରେ ମନ୍ କି ବାତ୍ କାର୍ଯ୍ୟକ୍ରମ ଅନୁଷ୍ଠିତ ହେବ ନାହିଁ । ଆଚରଣ ସଂହିତା କାର୍ଯ୍ୟକାରୀ ହେବା ପରେ ଏହି କାର୍ଯ୍ୟକ୍ରମ ହୋଇପାରିବ ନାହିଁ ବୋଲି ସେ କହିଛନ୍ତି।
ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ କିଛିଦିନ ପରେ ମାର୍ଚ୍ଚ ୮ ରେ ଆମେ 'ମହିଳା ଦିବସ' ପାଳନ କରିବୁ । ଏହି ବିଶେଷ ଦିନ ହେଉଛି ଦେଶର ବିକାଶ ଯାତ୍ରାରେ ମହିଳା ଶକ୍ତିର ଅବଦାନକୁ ପ୍ରଣାମ କରିବାର ଏକ ସୁଯୋଗ । ସେ କହିଛନ୍ତି ଯେ କିଛି ସମୟ ପୂର୍ବରୁ ଆମେ କଳ୍ପନା କରିପାରୁନଥିଲୁ ଯେ ଦେଶର ମହିଳାମାନେ ଡ୍ରୋନ୍ ଉଡ଼ାଇବେ, କିନ୍ତୁ ବର୍ତ୍ତମାନ ଏହା ସମ୍ଭବ । ଆଜି ଦେଶରେ ଏପରି କୌଣସି କ୍ଷେତ୍ର ନାହିଁ ଯେଉଁଠାରେ ମହିଳା ଶକ୍ତି ପଛରେ ପଡିଛି ।
ଏହି ସମୟରେ ପ୍ରଧାନମନ୍ତ୍ରୀ କହିଛନ୍ତି ଯେ ମାର୍ଚ୍ଚ ୩ ହେଉଛି 'ବିଶ୍ୱ ବନ୍ୟଜନ୍ତୁ ଦିବସ'। ବନ୍ୟଜନ୍ତୁମାନଙ୍କର ସଂରକ୍ଷଣ ବିଷୟରେ ସଚେତନତା ସୃଷ୍ଟି କରିବା ଲକ୍ଷ୍ୟରେ ଏହି ଦିନ ପାଳନ କରାଯାଏ । ଚଳିତ ବର୍ଷ ବିଶ୍ୱ ବନ୍ୟଜନ୍ତୁ ଦିବସର ବିଷୟବସ୍ତୁରେ ଡିଜିଟାଲ୍ ନବସୃଜନକୁ ପ୍ରାଧାନ୍ୟ ଦିଆଯାଇଛି । ଗତ କିଛି ବର୍ଷ ମଧ୍ୟରେ ସରକାରଙ୍କ ଉଦ୍ୟମ ଯୋଗୁଁ ଦେଶରେ ବାଘ ସଂଖ୍ୟା ବୃଦ୍ଧି ପାଇଛି ।