ଭୁବନେଶ୍ୱର,୧୬/୦୪: ମଙ୍ଗଳବାର ବିଳମ୍ବିତ ରାତିରେ ନିଃସନ୍ତାନ ଦମ୍ପତିଙ୍କ ଉଦ୍ଦେଶ୍ୟରେ ନିଲାମ କରାଯାଇଛି ମୁକ୍ତେଶ୍ୱର ମନ୍ଦିର ପ୍ରାଙ୍ଗଣରେ ଥିବା ପବିତ୍ର ମରିଚି କୁଣ୍ଡ ପାଣି । ଏଥର ଏହି ନିଲାମରେ ସାରା ରାଜ୍ୟରୁ ପ୍ରାୟ ଅନେକ ଦମ୍ପତିି ଅଂଶ ଗ୍ରହଣ କରିଥିଲେ । ପ୍ରଥମ କଳସ ଜଳ ମହାପ୍ରଭୁ ଶ୍ରୀଲିଙ୍ଗରାଜଙ୍କ ରୁକୁଣା ରଥ ପ୍ରତିଷ୍ଠା ନୀତି ନିମନ୍ତେ ବଡୁ ନିଯୋଗ ସେବାୟତ ମାନେ ନେଇଥିଲେ । ଏହାପରେ ନିଲାମ ଆରମ୍ଭ ହୋଇଥିଲା । 

ପ୍ରଥମ ପୂର୍ଣ୍ଣ କଳସ ଜଳ ଜଗତସିଂହପୁରରୁ ଆସିଥିବା ଦମ୍ପତି ସବୁଠାରୁ ଅଧିକ ଟଙ୍କାରେ ନିଲାମ  ଧରିଥିଲେ । ପତି ୨୪,୫୦୦ ଟଙ୍କା ଦେଇ ଉକ୍ତ ପବିତ୍ର ଜଳ ପତ୍ନୀ ସୋନାଲି ପ୍ରିୟଦର୍ଶିନୀଙ୍କୁ ସ୍ନାନ କରିବାକୁ ଦେଇଥିଲେ । ଏହାପରେ ଅନ୍ୟ ସବୁ କଳସ ନିର୍ଦ୍ଦିଷ୍ଟ ଦରରେ ବାକି ଦମ୍ପତିଙ୍କୁ ଦିଆ ଯାଇଥିଲା । ଏଠାରେ ଶ୍ରଦ୍ଧାଳୁ ମହିଳା ମାନେ ସ୍ନାନ କରିବା ଲାଗି ବିଏମସି ପକ୍ଷରୁ ଅସ୍ଥାୟୀ ଗାଧୁଆ ଘର ଓ ମନ୍ଦିର ପରିସର ଆଲୋକୀକରଣ କରାଯାଇଥିଲା । ସୁରକ୍ଷା ନିମନ୍ତେ ୩ ଅଫିସରଙ୍କ ନେତୃତ୍ୱରେ ଗୋଟିଏ ପ୍ଳାଟୁନ ଫୋର୍ସ ନିଯୋଜନ କରାଯାଇଥିଲା । ନିଲାମରେ ଅଂଶ ଗ୍ରହଣ କରିବା ପୂର୍ବରୁ ସମସ୍ତ ଦମ୍ପତି ଶ୍ରୀଲିଙ୍ଗରାଜଙ୍କ ଠାରେ ଗୁଆ ନଡ଼ିଆ ବସାଇ ସଂକଳ୍ପ କରିଥିଲେ । ଏହାପରେ ଆଜ୍ଞା ପ୍ରସାଦ ପାଇ ନିଲାମରେ ସାମିଲ ହୋଇଥିଲେ । ଏହି ପବିତ୍ର ତିଥିରେ ମରିଚିକୁଣ୍ଡ ପାଣିରେ ସ୍ନାନ କଲେ ମହିଳାଙ୍କ ବନ୍ଧ୍ୟା ଦୋଷ ଦୂର ହୁଏ ବୋଲି ବିଶ୍ୱାସ ରହିଛି ।