ଅହମ୍ମଦାବାଦ,୨୬/୦୫: ଗୁଜରାଟ ରାଜକୋଟ ସହରର କାଲାୱଡ୍ ରୋଡ୍ସ୍ଥିତ ଟିଆର୍ପି ଗେମିଂ ଜୋନ୍ରେ ଶନିବାର ଅପରାହ୍ଣରେ ଭୟାବହ ଅଗ୍ନିକାଣ୍ଡ ଘଟିଛି । ସେଥିଯୋଗୁ ୧୨ ପିଲାଙ୍କ ସମେତ ୩୦ଜଣ ପ୍ରାଣ ହରାଇଛନ୍ତି । ଅଦ୍ୟାବଧି ୨୫ରୁ ଅଧିକ ଲୋକଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି । ମୃତକଙ୍କ ସଂଖ୍ୟା ଆହୁରି ବଢ଼ିପାରେ ବୋଲି ପ୍ରଶାସନ କହିଛି । ସେହିପରି ଶବଗୁଡି଼କ ଏଭଳି ଭାବେ ଜଳିଯାଇଛି ଯେ ତାର ଚିହ୍ନଟ ସମ୍ଭବପର ହୋଇନାହିଁ । ତେଣୁ ପରିଚୟ ସ୍ପଷ୍ଟ କରିବାକୁ ଡିଏନ୍ଏ ପରୀକ୍ଷା କରାଯିବ । ଅଗ୍ନିକାଣ୍ଡର କାରଣ ଓ ନିଆଁ ଲାଗିବା ସମୟରେ ଗେମିଂ ଜୋନ୍ରେ କେତେ ଲୋକ ଥିଲେ ତାହା ସ୍ପଷ୍ଟ ହୋଇପାରିନାହିଁ । ଅଗ୍ନିଶମ ବିଭାଗର ୮ଟି ଟିମ୍ ଦୀର୍ଘ ୩ ଘଣ୍ଟା ଧରି ଉଦ୍ୟମ କରିବା ପରେ ନିଆଁକୁ ନିୟନ୍ତ୍ରଣ କରାଯାଇଛି ।
ରାଷ୍ଟ୍ରପତି ଦ୍ରୌପଦୀ ମୁର୍ମୁ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ ଓ ରାଜ୍ୟ ମୁଖ୍ୟମନ୍ତ୍ରୀ ଭୂପେନ୍ଦ୍ର ପଟେଲ ଅଗ୍ନିକାଣ୍ଡରେ ମୃତକଙ୍କ ପ୍ରତି ଗଭୀର ଶୋକ ପ୍ରକାଶ କରିଛନ୍ତି । ପ୍ରଧାନମନ୍ତ୍ରୀ ଓ ସ୍ୱରାଷ୍ଟ୍ରମନ୍ତ୍ରୀ ଗୁଜରାଟ ମୁଖ୍ୟମନ୍ତ୍ରୀଙ୍କ ସହ ଟେଲିଫୋନ୍ରେ କଥା ହୋଇଛନ୍ତି ଏବଂ ମୃତାହତଙ୍କୁ ସବୁ ପ୍ରକାର ସହାୟତା ଯୋଗାଇ ଦେବାକୁ କହିଛନ୍ତି । ମୁଖ୍ୟମନ୍ତ୍ରୀ ପ୍ରତ୍ୟେକ ମୃତକଙ୍କ ପରିଜନଙ୍କୁ ୪ ଲକ୍ଷ ଓ ଆହତଙ୍କୁ ୫୦ ହଜାର ଟଙ୍କା ଲେଖାଏଁ ସହାୟତା ଦେବାକୁ ଘୋଷଣା କରିଛନ୍ତି । ଅଗ୍ନିକାଣ୍ଡର ତଦନ୍ତ ଲାଗି ଏକ ସ୍ୱତନ୍ତ୍ର ତଦନ୍ତକାରୀ ଦଳ(ଏସ୍ଆଇଟି) ଗଠିତ ହୋଇଛି ।
ରାଜକୋଟର ପୁଲିସ କମିଶନର ରାଜୁ ଭାର୍ଗବ କହିଛନ୍ତି, ଅପରାହ୍ଣ ପ୍ରାୟ ୪.୩୦ ମିନିଟ୍ ସମୟରେ ଟିଆରପି ଗେମିଂ ଜୋନ୍ରେ ଏହି ଅଘଟଣ ଘଟିଥିଲା। ଏହାପରେ ପ୍ରାୟ ୫ କିମି ଦୂର ଯାଏ ଧୂଆଁ ଦେଖିବାକୁ ମିଳିଥିଲା। ନିଆଁକୁ ନିୟନ୍ତ୍ରଣ କରାଯାଇଛି । ଏତେ ଲୋକଙ୍କ ମୃତ୍ୟୁ ନେଇ ଗେମିଂ ଜୋନ୍ର ମାଲିକ ଯୁବରାଜ ସିଂହ ସୋଲାଙ୍କିଙ୍କ ବିରୋଧରେ ଦାୟିତ୍ୱହୀନତା ଅଭିଯୋଗରେ ମାମଲା ରୁଜୁ କରାଯାଇଛି । ଜଣେ ପ୍ରତ୍ୟକ୍ଷଦର୍ଶୀ ୟଶ ପଟୋଲିୟା କହିଛନ୍ତି, ସେମାନେ ଗେମିଂ ଜୋନ୍ର ରେସ୍ତୋରାଁରେ ବସିଥିବାବେଳେ ସେଠାରେ ନିଆଁ ଲାଗିଥିଲା । ପ୍ରବଳ ପବନ ଯୋଗୁ ମାତ୍ର ୩୦ ସେକେଣ୍ଡ ମଧ୍ୟରେ ହିଁ ପୂରା ଅଞ୍ଚଳରେ ନିଆଁ ବ୍ୟାପିଯାଇଥିଲା । ରେସ୍ତୋରାଁର କର୍ମଚାରୀ ଅଗ୍ନି ନିର୍ବାପକ ଯନ୍ତ୍ର ସାହାଯ୍ୟରେ ନିଆଁ ଲିଭାଇବାକୁ ଉଦ୍ୟମ କରିଥିଲେ । କିନ୍ତୁ ସେଥିରେ ସଫଳତା ନ ମିଳିବାରୁ ଲୋକମାନେ ଜୀବନ ବଞ୍ଚାଇବା ଲାଗି ଏଣେତେଣେ ଦୌଡି଼ଥିଲେ ।
ଅନ୍ୟ ଜଣେ ପ୍ରତ୍ୟକ୍ଷଦର୍ଶୀ କହିଛନ୍ତି, ଗେମିଂ ଜୋନ୍ରେ ଅନେକ ପ୍ରକାରର ମରାମତି ଓ ରକ୍ଷଣାବେକ୍ଷଣ କାମ ଚାଲୁଥିଲା । ତେଣୁ ବହୁ ସଂଖ୍ୟାରେ ପ୍ଲାଏ ଖଣ୍ଡ ଓ କାଠ ଏପଟସେପଟ ହୋଇ ପଡ଼ିଥିଲା । ସେଥିରେ ନିଆଁ ଲାଗିବା ପରେ ତାହା ଦ୍ରୁତ ଗତିରେ ବ୍ୟାପିଥିଲା । ଦେଖୁ ଦେଖୁ ପୂରା ଗେମିଂ ଜୋନ୍ ଧ୍ୱଂସସ୍ତୁପ ପାଲଟି ଯାଇଥିଲା । ଶ୍ୱାସରୁଦ୍ଧ ହୋଇ ଅନେକ ପ୍ରାଣ ହରାଇଥିଲେ । ପରବର୍ତ୍ତୀ ସମୟରେ କିଛି ଲୋକଙ୍କୁ ଶିଡି଼ ଦ୍ୱାରା ଉଦ୍ଧାର କରାଯାଇଥିଲା । ସେପଟେ ଏହି ଦୁର୍ଘଟଣା ପରେ ଗୁଜରାଟ ସରକାର ଏନ୍ଓସି ନଥିବା ରାଜ୍ୟର ସମସ୍ତ ଗେମିଂ ଜୋନ୍କୁ ବନ୍ଦ କରିବାକୁ ଆଦେଶ ଦେଇଛନ୍ତି।
