କଟକ,୦୨/୦୪: ଗତ ୧୫ତାରିଖରୁ ୫୫ଟି ମୂଲ୍ୟାୟନ କେନ୍ଦ୍ରରେ ଚାଲିଥିବା ମାଟ୍ରିକ୍ ଉତ୍ତର ଖାତା ମୂଲ୍ୟାୟନ କାର୍ଯ୍ୟ ଇତିମଧ୍ୟରେ ଶେଷ ହୋଇଛି । ମୂଲ୍ୟାୟନ ଶେଷ ୫୫ଟି ଯାକ କେନ୍ଦ୍ରରୁ ଉତ୍ତର ଖାତାଗୁଡ଼ିକ କଡ଼ା ସୁରକ୍ଷା ବଳୟରେ ଆସି କଟକ ବଜ୍ରକବାଟିସ୍ଥିତ ବୋର୍ଡ କାର୍ଯ୍ୟାଳୟରେ ସୋମବାର ସୁଦ୍ଧା ପହଞ୍ଚିସାରିଛି ବୋଲି ବୋର୍ଡ ପକ୍ଷରୁ କୁହାଯାଇଛି । ତେବେ ମୂଲ୍ୟାୟନ କାର୍ଯ୍ୟ ମୋଟାମୋଟି ଭାବେ ଶେଷ ହୋଇଛି ବୋଲି କୁହାଯାଉଥିବା ବେଳେ କେତେକ ପରୀକ୍ଷାର୍ଥୀଙ୍କ ହିନ୍ଦୀ, ସଂସ୍କୃତ ଉତ୍ତର ଖାତା ମୂଲ୍ୟାୟନକୁ ନେଇ ଦ୍ୱନ୍ଦ୍ୱ ରହିଥିବା ସୂଚନା ମିଳିଛି ।
ପରୀକ୍ଷାର୍ଥୀମାନେ ତୃତୀୟ ଭାଷା ପରୀକ୍ଷା ଦେବା ଲାଗି ଫର୍ମ ପୂରଣ ଗୋଟିଏ ବିଷୟରେ କରିଥିବା ବେଳେ ପରୀକ୍ଷା ଅନ୍ୟ ଭାଷାରେ ଦେଇଥିଲେ । ଏପରି ହିନ୍ଦୀ ଏବଂ ସଂସ୍କୃତ ବିଷୟରେ ମନଇଚ୍ଛା ପରୀକ୍ଷା ଦେଇଥିବା ପରୀକ୍ଷାର୍ଥୀଙ୍କ ଉତ୍ତର ଖାତାକୁ ନେଇ ମୂଲ୍ୟାୟନ କେନ୍ଦ୍ରରେ ଉପୁଜିଥିବା ଦ୍ୱନ୍ଦ୍ୱ ବୋର୍ଡରେ ପୁନଃ ଯାଞ୍ଚ କରାଯିବ ବୋଲି ସୂଚନା ମିଳିଛି । ଏପରି ପାଖାପାଖି ୫ ହଜାର ଉତ୍ତର ଖାତା ବୋର୍ଡ କର୍ତ୍ତୃପକ୍ଷଙ୍କ ଅଧିନରେ ପରୀକ୍ଷକମାନେ ପୁନଃ ଯାଞ୍ଚ୍ କରିବାର ଯୋଜନା ରହିଛି । ଦିନେ ଦୁଇ ଦିନ ମଧ୍ୟରେ ଉକ୍ତ କାର୍ଯ୍ୟ ଶେଷ ହେବ ବୋଲି ବୋର୍ଡ ସୂତ୍ରରୁ ସୂଚନା ମିଳିଛି । ତେବେ ମୂଲ୍ୟାୟନ ପ୍ରକ୍ରିୟା ପ୍ରାୟ ଶେଷ ହୋଇଥିବାରୁ ଖୁବ୍ଶୀଘ୍ର ଟାବୁଲେସନ୍ ପ୍ରକ୍ରିୟା ବୋର୍ଡ ପକ୍ଷରୁ ଆରମ୍ଭ ହେବ ବୋଲି ସୂଚନା ମିଳିଛି ।
ସୂଚନାଯୋଗ୍ୟ, ୧୦୦ ନମ୍ବର ବିଶିଷ୍ଟ ହୋଇଥିବା ମାଟ୍ରିକ୍ ପରୀକ୍ଷାରେ ପରୀକ୍ଷାର୍ଥୀମାନେ ୫୦ ନମ୍ବର ସବ୍ଜେକ୍ଟିଭ୍ ପ୍ରଶ୍ନର ଉତ୍ତର ଦେଇଥିବା ବେଳେ ଆଉ ଅବଶିଷ୍ଟ ୫୦ ନମ୍ବର ଓଏମ୍ଆରରେ ଅବଜେକ୍ଟିଭ୍ ପ୍ରଶ୍ନର ଉତ୍ତର ଦେଇଥିଲେ । ଓଏମ୍ଆର ସିଟ୍ କମ୍ପ୍ୟୁଟରରେ ମୂଲ୍ୟାୟନ ହୋଇଥିବା ବେଳେ ସବଜେକ୍ଟିଭ୍ ଉତ୍ତର ଖାତା ୫୫ଟି ମୂଲ୍ୟାୟନ କେନ୍ଦ୍ରରେ ପରୀକ୍ଷକମାନେ ଖାତା ଦେଖିଥିଲେ । ମାଟ୍ରିକ୍ ସହ ମଧ୍ୟମା, ଷ୍ଟେଟ୍ ଓପନ ସ୍କୁଲ୍ ଏବଂ ସ୍କ୍ରିପ୍ଟ ଉତ୍ତର ଖାତା ମଧ୍ୟ ସମାନ୍ତରଳ ଭାବେ ୫୫ଟି କେନ୍ଦ୍ରରେ ଦେଖା ଚାଲିଥିଲା । ଉକ୍ତ ମୂଲ୍ୟାୟନ ପ୍ରକ୍ରିୟାରେ ରାଜ୍ୟରେ ୧୫ ହଜାରରୁ ଅଧିକ ଶିକ୍ଷକଙ୍କୁ ନିୟୋଜିତ ହୋଇଥିଲେ । ଏହାବଦ୍ ମୂଲ୍ୟାୟନ କେନ୍ଦ୍ରରେ ପୃଥକ ଭାବେ ୩ ଜଣଲେଖାଏଁ ଡାଟା ଏଣ୍ଟ୍ରି ଅପରେଟର ମଧ୍ୟ ନିୟୋଜିତ ହୋଇଥିଲେ ।
ଉଲ୍ଲେଖଥାଉକି, ପୂର୍ବ ବର୍ଷରେ ମଧ୍ୟ ଏହି ସମସ୍ୟା ଉପୁଜିଥିଲା । ଉକ୍ତ ତ୍ରୁଟିକୁ ସୁଧାରି କେତେକ ହିନ୍ଦି, ସଂସ୍କୃତ ଉତ୍ତର ଖାତାକୁ ମୂଲ୍ୟାୟନ କରି ରେଜଲ୍ଟ ପ୍ରସ୍ତୁତ କରିବାକୁ ବୋର୍ଡ କର୍ତ୍ତୃପକ୍ଷ ଅଡ଼ୁଆରେ ପଡ଼ିଥିଲେ ।
