ଫୁଲବାଣୀ,୦୭/୦୫: ମତଦାନ ତାରିଖ ପାଖେଇ ଆସୁଛି । ପ୍ରଚାର ଜୋର୍ ଧରିବାରେ ଲାଗିଲାଣି । ସବୁ ପ୍ରମୁଖ ଦଳଙ୍କ ଫୋକସ୍ରେ ରହିଛି କନ୍ଧମାଳ । ଏହି ପରିପ୍ରେକ୍ଷୀରେ ଆସନ୍ତା ସପ୍ତାହ କନ୍ଧମାଳ ଦେଖିବାକୁ ଯାଉଛି ହାଇଭୋଲ୍ଟେଜ୍ ପ୍ରଚାର । ଫୁଲବାଣୀ ଆସୁଛନ୍ତି ସବୁ ଦଳର ହେଭିୱେଟ୍ ନେତା ।
୯ ତାରିଖରେ ନିର୍ବାଚନୀ ପ୍ରଚାରରେ ଆସୁଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । କନ୍ଧମାଳ ଷ୍ଟାଡିୟମରେ ସେ ଏକ ଜନସଭାକୁ ସମ୍ବୋଧିତ କରିବେ । ପୁଣି ୧୧ରେ ଆସୁଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଫୁଲବାଣୀରେ ଏକ ବିଶାଳ ଜନସଭାରେ ଯୋଗ ଦେଇ ଭୋଟ୍ ମାଗିବେ ପ୍ରଧାନମନ୍ତ୍ରୀ । ସେହିଭଳି ୧୪ରେ କଂଗ୍ରେସର ରାଷ୍ଟ୍ରୀୟ ଅଧ୍ୟକ୍ଷ ମଲ୍ଲିକାର୍ଜୁନ ଖଡ୍ଗେ ଫୁଲବାଣୀରେ ଏକ ନିର୍ବାଚନୀ ସଭାରେ ଯୋଗ ଦେବେ ବୋଲି ଦଳୀୟ ସୂତ୍ରରୁ ଜଣାପଡ଼ିଛି । ଏହି ହେଭିୱେଟ୍ ନେତା ତଥା ତାରକା ପ୍ରଚାରକଙ୍କ ଗସ୍ତ ନେଇ ତିନି ପ୍ରମୁଖ ଦଳର ନେତା, କର୍ମୀଙ୍କ ମଧ୍ୟରେ ଉତ୍ସାହ ଖେଳିଯାଇଛି । ସବୁ ଦଳ ପକ୍ଷରୁ ପ୍ରସ୍ତୁତି ଜୋର୍ ଧରିଛି । ବିଜେଡି ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ (ବବି) ସ୍ଥିତି ପରଖିଥିବା ବେଳେ ବିଜେପି ପକ୍ଷରୁ ମଧ୍ୟ ପ୍ରସ୍ତୁତି ଆରମ୍ଭ ହୋଇଛି । ସେହିଭଳି କଂଗ୍ରେସ ପକ୍ଷରୁ ଏଆଇସିସି ସମ୍ପାଦକ ହର୍ଷବର୍ଦ୍ଧନ ସଫାଲ ଓ ଭୁପେନ୍ଦ୍ର ମାର୍ବୀ ସୋମବାର କନ୍ଧମାଳ ଜିଲ୍ଲା ଗସ୍ତ କରି ଆୟୋଜନ ନେଇ ଅନୁଧ୍ୟାନ କରିଛନ୍ତି।
