ପ୍ୟାରିସ,୧୪/୦୫: ଫ୍ରାନ୍ସର ପ୍ରସିଦ୍ଧ ଫୁଟବଲ୍ ଖେଳାଳି କିଲିଆନ୍ ଏମ୍ବାପେଙ୍କୁ ଆଗାମୀ ସିଜନରେ ପ୍ୟାରିସ ସେଣ୍ଟ ଜର୍ମେନ(ପିଏସ୍ଜି) ପକ୍ଷରୁ ଆଉ ଦେଖିବାକୁ ମିଳିବ ନାହିଁ । ଚଳିତ ଲିଗ୍-ୱାନ୍ ସିଜନ ଶେଷ ହେବା ସହ ସେ ପିଏସ୍ଜିରୁ ବିଦାୟ ନେବେ । ରବିବାର ଦିନ ଏମ୍ବାପେ ଘରୋଇ ଗ୍ରାଉଣ୍ଡ୍ରେ ଶେଷ ମ୍ୟାଚ୍ ଖେଳିଥିଲେ । ଅବଶ୍ୟ ପିଏସ୍ଜି ଉକ୍ତ ମ୍ୟାଚ୍ରେ ଟୌଲୁସ ଠାରୁ ୧-୩ ଗୋଲ୍ରେ ପରାଜିତ ହୋଇଥିଲା । ଏହା ପିଏସଜିର ଶେଷ ମ୍ୟାଚ୍ ରହିଥିଲା । ମ୍ୟାଚ୍ର ଅଷ୍ଟମ ମିନିଟ୍ରେ ଏମ୍ବାପେ ଗୋଲ୍ କରିଥିଲେ । ମାତ୍ର ଏହାପରେ ଟୌଲୁସ ପକ୍ଷରୁ ୧୩ତମ ମିନିଟ୍ରେ ଥିଜସ ଡିଲିଙ୍ଗା, ୬୮ତମ ମିନିଟ୍ରେ ୟାନ ଗୋବୋହୋ ଓ ୯୦୍ମ୫ତମ ମିନିଟ୍ରେ ଫ୍ରାଙ୍କ ମାଗ୍ରି ଗୋଲ୍ କରିଥିଲେ । ପରାଜୟ ସତ୍ତେ୍ୱ ପିଏସ୍ଜିର ଟାଇଟଲ୍ ନିଶ୍ଚିତ ରହିଛି ।
୩୨ଟି ମ୍ୟାଚ୍ରୁ ପିଏସ୍ଜି ୭୦ ପଏଣ୍ଟ ହାସଲ କରି ଶୀର୍ଷ ସ୍ଥାନ ବଜାୟ ରଖିଛି । ଆଗକୁ ଦଳ ଆଉ ୨ଟି ମ୍ୟାଚ୍ ଖେଳିବ । ଉଭୟ ମ୍ୟାଚ୍ ଯଥାକ୍ରମେ ନାଇସ ଓ ମେଜର ଘରୋଇ ଗ୍ରାଉଣ୍ଡରେ ଖେଳାଯିବ । ଚଳିତ ସିଜନ ସହ ଏମ୍ବାପେ ଓ ପିଏସ୍ଜି ମଧ୍ୟରେ ରହିଥିବା ଚୁକ୍ତିନାମା ଶେଷ ହେବ । ଆଗାମୀ ସିଜନରେ ଏମବାପେ ଫ୍ରି ଏଜେଣ୍ଟ ଭାବେ ଅନ୍ୟ କ୍ଲବ୍କୁ ଯାଇପାରିବେ । ରିୟଲ ମାଦ୍ରିଦ ତାଙ୍କୁ ଚୁକ୍ତି କରିବା ପାଇଁ ଅପେକ୍ଷା କରି ରହିଛି । ୬୪ ପଏଣ୍ଟ ସହ ଦ୍ୱିତୀୟ ସ୍ଥାନରେ ରହିଥିବା ମୋନାକୋ ଆଉ ଗୋଟିଏ ଲିଗ୍ ମ୍ୟାଚ୍ ଖେଳିବାର କାର୍ଯ୍ୟକ୍ରମ ରହିଛି । ତେଣୁ ଉକ୍ତ ମ୍ୟାଚ୍ ଜିତିଲେ ମଧ୍ୟ ମୋନାକୋ ପଏଣ୍ଟ ତାଲିକାର ଶୀର୍ଷକୁ ଉଠିପାରିବ ନାହିଁ ।