ତେଲଙ୍ଗାନା ୨୭/୦୮: ତେଲଙ୍ଗାନାର ଗ୍ରାମାଞ୍ଚଳରେ ମାଂସାହାରୀ ଖାଦ୍ୟ ପ୍ରତି ଖାସ୍‌ ରୁଚି ରହିଛି । ରବିବାର ପ୍ରାୟ ସମସ୍ତେ ମାଂସରେ ପ୍ରସ୍ତୁତ ସ୍ୱାଦିଷ୍ଟ ବ୍ୟଞ୍ଜନକୁ ଖୁବ୍‌ ଉପଭୋଗ କରିଥାନ୍ତି । ରାଜ୍ୟର ପ୍ରତ୍ୟେକ ଗାଁରେ ଏହା ଦେଖିବାକୁ ମିଳେ । କିନ୍ତୁ ଗୋଟିଏ ଗାଁ ଏଥିରୁ ସମ୍ପୂର୍ଣ୍ଣ ରୂପେ ଭିନ୍ନ । ରବିବାର ଏହି ଗାଁର ବାସିନ୍ଦା ମାଂସ ଓ ମଦଠୁ ଦୂରେଇ ରହନ୍ତି । ଜଗିତ୍ୟାଲା ଜିଲ୍ଲା, ମେଟପଲ୍ଲି ମଣ୍ଡଳରେ ସ୍ଥିତ ଏହି ଗାଁର ନାଁ ପେଦ୍ଦାପୁର । ଏଠାକାର ଲୋକେ ରବିବାର ମାଂସ ଓ ମଦ ଛୁଅଁନ୍ତି ନାହିଁ । କେବଳ ଶାକାହାରୀ ଭୋଜନ କରିଥାନ୍ତି । 

ଗାଁରେ ମଲ୍ଲାନ୍ନା ସ୍ୱାମୀଙ୍କୁ ପୂଜା କରାଯାଏ ଏବଂ ରବିବାରକୁ ତାଙ୍କର ପ୍ରିୟ ବାର ରୂପେ ବିବେଚନା କରାଯାଏ । ଏହି ଦିନ ଗାଁର ପ୍ରତ୍ୟେକ ଲୋକ ଶୁଦ୍ଧପୁତ ହୋଇ ପିଲାଙ୍କ ସହ ମନ୍ଦିରକୁ ଯାଆନ୍ତି ଏବଂ ସ୍ୱତନ୍ତ୍ର ପୂଜା କରନ୍ତି । ସେଥିପାଇଁ ରବିବାର ଗାଁରେ କୌଣସି ଅପବିତ୍ର କାର୍ଯ୍ୟ କରାଯାଏ ନାହିଁ । ବର୍ଷେ କି ଦୁଇ ବର୍ଷ ନୁହେଁ, ଗତ ୧୫ ବର୍ଷ ହେଲା ଗାଁ ଲୋକେ ରବିବାର ମଦ ଓ ମାଂସଠୁ ଦୂରରେ ରହି ଆଦର୍ଶ ଗ୍ରାମବାସୀର ପରିଚୟ ଦେଇଛନ୍ତି । ପ୍ରତି ବର୍ଷ ହୋଲି ପରେ ପଡୁଥିବା ରବିବାର ଦିନ ଗାଁରେ ପ୍ରଭୁ ମଲ୍ଲାନାଙ୍କୁ ୩୦ ହଜାର ଛେଳି ବଳି ଦିଆଯାଏ । 

ବୋନାଲା ପର୍ବ ନାମରେ ଏହା ପରିଚିତ । ମହାରାଷ୍ଟ୍ର, ଆନ୍ଧ୍ରପ୍ରଦେଶ ଓ କର୍ଣ୍ଣାଟକ ଭଳି ବିଭିନ୍ନ ଜିଲ୍ଲାରୁ ହଜାର ହଜାର ଭକ୍ତ ଏଥିରେ ଯୋଗ ଦେଇଥାନ୍ତି । ଶ୍ରାବଣ ମାସରେ ମଧ୍ୟ ଏକ ସ୍ୱତନ୍ତ୍ର ପୂଜା ଅନୁଷ୍ଠିତ ହୁଏ । ଏ ଅବସରରେ ଚାଉଳ ଓ ଗୁଡ଼ ରନ୍ଧାଯାଇ ଭକ୍ତଙ୍କୁ ପ୍ରଦାନ କରାଯାଏ । ସେହିପରି ପନୟମ ମଣ୍ଡଳର କୋଠୁର ଗାଁରେ ପ୍ରତି ରବିବାର ମାଂସ ଓ ଚିକେନ୍‌ ଦୋକାନ ବନ୍ଦ ରହେ । କାରଣ ପ୍ରାଚୀନ ପରମ୍ପରା ଅନୁସାରେ, ଏହି ଦିନ ଗାଁରେ ଆମିଷ ଆହାରକୁ କଡ଼ାକଡ଼ି ବାରଣ କରାଯାଇଛି । ଗାଁର ପ୍ରତ୍ୟେକ ବାସିନ୍ଦା ଏହି ପରମ୍ପରାକୁ କଡ଼ାକଡ଼ି ପାଳନ କରନ୍ତି । କିମ୍ବଦନ୍ତୀ ଅନୁସାରେ, କିଛି ଶତାବ୍ଦୀ ତଳେ ପ୍ରଭୁ ସୁବ୍ୱାରାୟୁଡୁ ଗାଁ ମୁଖିଆ ଚେନ୍ନା ରେଡ୍ଡୀଙ୍କୁ ସ୍ୱପ୍ନରେ ଦର୍ଶନ ଦେଇଥିଲେ । କୋଠୁର ଗାଁରେ ଶାନ୍ତି ଓ ସମୃଦ୍ଧି ପାଇଁ ତାଙ୍କର ମୂର୍ତ୍ତି ସ୍ଥାପନା କରି ରବିବାର ପୂଜା କରିବାକୁ ନିର୍ଦ୍ଦେଶ ଦେଇଥିଲେ । ଗାଁ ମୁଖିଆ ପ୍ରଭୁଙ୍କ ଇଚ୍ଛା ଅନୁସାରେ କର୍ତ୍ତବ୍ୟ ପାଳନ କରିଥିଲେ ।