ସୋର,୧୫/୦୯: ସାପ କାମୁଡ଼ାରେ ପ୍ରାଣ ହରାଇଲା ନାବାଳକ । ବାରିପଦାରୁ ଫୋନରେ ଝଡ଼ା ଫୁଙ୍କା କଲା ଗୁଣିଆ । ୨ଘଣ୍ଟା ଆମ୍ବୁଲାନ୍ସରେ ପଡ଼ିରହିଲା ମୃତଦେହ । ମୃତ ନାବାଳକ ଜଗବନ୍ଧୁ ବେହେରାଙ୍କ ୧୪ ବର୍ଷର ପୁଅ ମନୋରଞ୍ଜନ ବେହେରା ବୋଲି ଜଣାପଡ଼ିଛି । ବାଲେଶ୍ୱର ଜିଲ୍ଲା ଖଇରା ଗଗନଧୂଳି ପଞ୍ଚାୟତ ପାଣିଶିଆଳି ଗାଁରେ ଏଭଳି ଘଟଣା ଘଟିଛି । 

ସୂଚନା ମୁତାବକ, ମନୋରଞ୍ଜନ ଶନିବାର ରାତିରେ ଘରେ ଶୋଇଥିଲେ । ତେବେ ରବିବାର ଭୋର ସମୟରେ ତାଙ୍କ ଆଙ୍ଗୁଠିକୁ ଏକ ରଣା ସାପ କାମୁଡ଼ି ଦେଇଥିଲା । ମନୋରଞ୍ଜନ କଷ୍ଟରେ ଚିତ୍କାର କରିବାରୁ ପରିବାର ଲୋକେ ତାଙ୍କୁ ସୋର ଡାକ୍ତରଖାନାରେ ଭର୍ତ୍ତି କରାଇଥିଲେ । ସେଠାରେ ତାଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ହେବାରୁ ତାକୁ ଆମ୍ବୁଲାନ୍ସ ଯୋଗେ ପ୍ରଥମେ ବାଲେଶ୍ୱର ଏବଂ ପରେ କଟକ ନିଆଯାଇଥିଲା । ତେବେ କଟକ ନେବା ରାସ୍ତାରେ ମନୋରଞ୍ଜନଙ୍କ ମୃତ୍ୟୁ ହୋଇଥିଲା । ମନୋରଞ୍ଜନଙ୍କ ମୃତଦେହକୁ ତାଙ୍କ ପରିବାର ଓ ସମ୍ପର୍କୀୟମାନେ ସୋର ଡାକ୍ତରଖାନା ସମ୍ମୁଖରେ ଆମ୍ବୁଲାନ୍ସରେ ରଖିଥିଲେ ।

ଏଭଳି ସ୍ଥିତିରେ ଆମ୍ୱୁଲାନ୍ସରେ ଦେଖିବାକୁ ମିଳିଥିଲା ଏକ ଅମାନୁଷିକ ଦୃଶ୍ୟ । ଦୁଇ ବ୍ୟକ୍ତି ଆମ୍ବୁଲାନ୍ସରେ ଏକ ପିତଳ କୁମ୍ଭ ଓ କିଛି ଗେଣ୍ଡୁ ଫୁଲ ଧରି ବାରିପଦାର ଜଣେ ଗୁଣିଆ ନିର୍ଦ୍ଦେଶରେ ଝଡ଼ାଫୁଙ୍କା କରିଥିଲେ । ଏଥିରେ ମନୋରଞ୍ଜନଙ୍କ ପରିବାର ଲୋକେ ମଧ୍ୟ ସହଯୋଗ କରିଥିଲେ । ସେମାନଙ୍କର ବିଶ୍ୱାସ ଥିଲା ଯେ, ଝଡ଼ାଫୁଙ୍କା କରି ସେ ତାଙ୍କ ପୁଅକୁ ଫେରି ପାଇବେ । ଏହି ଆଶାରେ ମନୋରଞ୍ଜନଙ୍କ ମୃତଦେହକୁ ଷ୍ଟ୍ରେଚରରେ ନେଇ ହସ୍ପିଟାଲ ପରିସରରେ ରଖି ଝଡ଼ାଫୁଙ୍କା କରାଇଥିଲେ ମନୋରଞ୍ଜନଙ୍କ ପରିବାର ଲୋକେ । ଏଥି ସହିତ ମୃତଦେହର ପାଦ ଓ ଛାତିକୁ ମଧ୍ୟ ଘଷିଥିଲେ । ଏସବୁ ପରେ ମୃତ ମନୋରଞ୍ଜନ ନବଞ୍ଚିବାରୁ ଡାକ୍ତରଙ୍କ ପାଖକୁ ନେଇଥିଲେ । ସେଠାରେ ଡାକ୍ତର ମନୋରଞ୍ଜନକୁ ମୃତ ଘୋଷଣା କରିଥିଲେ ।