ମାଲକାନଗିରି,୦୬/୦୬: କଳ୍ପନାଜଳ୍ପନାର ଅନ୍ତ ଘଟିଛି । ୪ଦିନ ଧରି ପୁଲିସର ତନାଘନା ପରେ ନିଖୋଜ କାଲିମେଳା ଡାକ୍ତର ଅମ୍ଳାନ ଭୋଇଙ୍କୁ କର୍ଣ୍ଣାଟକର ବେଙ୍ଗାଲୁରୁରେ ଠାବ କରାଯାଇଛି । ସେଠାକାର ପୁଲିସ ଅକ୍ଲାନ୍ତ ପରିଶ୍ରମ କରି ଡାକ୍ତରଙ୍କୁ ଠାବ କରିବାରେ ସଫଳ ହୋଇଛି । ସେ ସୁରକ୍ଷିତ ଏବଂ ସୁସ୍ଥ ଅଛନ୍ତି । ଖୁବଶୀଘ୍ର ତାଙ୍କୁ ମାଲକାନଗିରି ଅଣାଯିବ । ଏଥିଲାଗି ପ୍ରକ୍ରିୟା ଆରମ୍ଭ ହୋଇଛି । ମାଲକାନଗିରିରେ ପହଞ୍ଚିବା ପରେ ତାଙ୍କ ନିଖୋଜ ଘଟଣାର ପର୍ଦ୍ଦାଫାସ ହୋଇପାରିବ ବୋଲି ଏସପି ନୀତେଶ ୱାଧୱାନି କହିଛନ୍ତି ।
ସୂଚନାଥାଉକି, କାଲିମେଳା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ କାର୍ଯ୍ୟରତ ଡାକ୍ତର ଅମ୍ଳାନ ଗତ ୧ ତାରିଖ ମଧ୍ୟରାତ୍ରରୁ ନିଜ ରୁମ୍ରୁ ହଠାତ୍ ନିଖୋଜ ହୋଇଯାଇଥିଲେ । ତାଙ୍କ କ୍ୱାର୍ଟରରେ ମାଓବାଦୀଙ୍କ ନାଁରେ ଏକ ହାତଲେଖା ପୋଷ୍ଟର ପଡ଼ିଥିବାରୁ ମାଓବାଦୀମାନେ ତାଙ୍କୁ ଅପହରଣ କରିନେଇଥିବା ସନ୍ଦେହ କରାଯାଇଥିଲା । ହସ୍ପିଟାଲ ପକ୍ଷରୁ କାଲିମେଳା ଥାନାରେ ଲିଖିତ ଅଭିଯୋଗ ହୋଇଥିଲା । ଏହି ଘଟଣା ଜିଲ୍ଲା ସହ ସମଗ୍ର ରାଜ୍ୟରେ ଆଲୋଡ଼ନ ସୃଷ୍ଟି କରିଥିଲା । ହସ୍ପିଟାଲ କର୍ମଚାରୀ ଓ ଡାକ୍ତରଙ୍କ ମଧ୍ୟରେ ଆତଙ୍କ ଖେଳିଯାଇଥିଲା । ଅଭିଯୋଗ ପାଇବା ପରେ ପୁଲିସ ଏହାକୁ ଗୁରୁତ୍ୱ ସହ ନେଇଥିଲା । ଏସ୍ଡିପିଓ ସଚିନ ପଟେଲଙ୍କ ତତ୍ତ୍ୱାବଧାନରେ ତଦନ୍ତ ଆରମ୍ଭ ହୋଇଥିଲା । ଏସ୍ପି ଓ ଡିଆଇଜି କାଲିମେଳାରେ ପହଞ୍ଚି ଏହାର ତଦନ୍ତ କରିଥିଲେ । ଏସ୍ପି ଶ୍ରୀ ୱାଧୱାନୀ ପାରିପାଶ୍ୱର୍ିକ ସ୍ଥିତି ଅନୁଧ୍ୟାନ କରି ଏହା ମାଓ ଅପହରଣ ଘଟଣା ନୁହେଁ ବୋଲି ସ୍ପଷ୍ଟ କରିଥିଲେ । ଡାକ୍ତର ନିଜ ଇଚ୍ଛାରେ କେଉଁଆଡେ ଯାଇଥାଇପାରନ୍ତି କିମ୍ବା ତାଙ୍କୁ କେହି ଦୁର୍ବୁତ୍ତ ଡାକି ନେଇଥାଇପାରେ ବୋଲି କହିଥିଲେ । ପରେ ଏସପିଙ୍କ ନିର୍ଦ୍ଦେଶରେ ଏକ ସ୍ୱତନ୍ତ୍ର ପୁଲିସ ଟିମ୍ ଗଠନ କରାଯାଇ ରାଜ୍ୟ ଓ ରାଜ୍ୟ ବାହାରେ ତଦନ୍ତ କରାଯାଇଥିଲା ।
ଡାକ୍ତରଙ୍କ ମୋବାଇଲ ଘରେ ଥିବାରୁ ତାକୁ ଯାଞ୍ଚ ପରେ ଆଇପିଏଲରେ ସେ ଲକ୍ଷାଧିକ ଟଙ୍କା ବାଜି ଲଗାଇ ହାରିଯାଇଥିବା ଏବଂ ତାଙ୍କ ସାଙ୍ଗସାଥୀଙ୍କ ପାଖରୁ ୨୦ଲକ୍ଷ ଟଙ୍କା ଧାର ଆଣିଥିବା ଜଣାପଡ଼ିଥିଲା । ଏତେ ଟଙ୍କା ହାରିବା ପରେ ସେ କିଛିଦିନ ହେଲା ନିରାଶରେ ଥିବା ଜଣାପଡ଼ିଥିଲା । ଏଭଳି ବିଭିନ୍ନ ଦିଗକୁ ନେଇ ପୁଲିସ ତର୍ଜମା କରିଥିଲା । ଶେଷରେ ଆଜି ନିଖୋଜ ଡାକ୍ତରଙ୍କ ସନ୍ଧାନ ମିଳିଥିଲା । ସେ କର୍ଣ୍ଣାଟକ ବେଙ୍ଗାଲୁରୁରେ ଥିବା ଜଣାପଡ଼ିବା ପରେ ସେଠାକୁ ସ୍ୱତନ୍ତ୍ର ପୁଲିସ ଟିମ ଯାଇ ଠାବ କରିବାରେ ସଫଳ ହୋଇଛି ।
