ରାଇକିଆ,୨୮/୩ : ଚଳିତ ସାଧାରଣ ନିର୍ବାଚନରେ ବିଜେଡି ଦଳ ପ୍ରଥମ ତାଲିକାରେ ଘୁ.ଉଦୟଗିରି ଆସନ ପାଇଁ ଦଳୀୟ ପ୍ରାର୍ଥୀ ଭାବେ ପୁଣି ଥରେ ସାଲୁଗା ପ୍ରଧାନଙ୍କ ନାଁରେ ମୋହର ମରିଛି। ଚତୁର୍ଥ ଥର ପାଇଁ ସାଲୁଗା ଟିକଟ ପାଇବା ପରେ ଦଳୀୟ କର୍ମୀଙ୍କ ମନରେ ବେଶ ଉତ୍ସାହ ଏବଂ ଖୁସି ଦେଖିବାକୁ ମିଳିଛି। ସ୍ଥାନୀୟ ବେରେଡାକିଆ ଛକ ଠାରୁ ଦଳୀୟ କର୍ମୀମାନେ ସାଲୁଗାଙ୍କୁ ଏକ ଶୋଭାଯାତ୍ରାରେ ଆଣି ରାଇକିଆ ବଜ଼ାର ଛକରେ ପହଞ୍ଚି ଥିଲେ। ବାଜା ବାଣ ସହ ତାଙ୍କ ପ୍ରାର୍ଥିତ୍ବକୁ ସ୍ବାଗତ କରିଥିଲେ ଦଳୀୟ କର୍ମୀ। ରାଇକିଆ ବ୍ଲକ ସଭାପତି ରାଜମୋହନ ଦିଗାଲଙ୍କ ନେତୃତ୍ୱରେ ନିର୍ବାଚିତ ଜନ ପ୍ରତିନିଧି ଓ କର୍ମୀ ମାନେ ଫୁଲତୋଡା, ଉପଢୌକନ ଦେଇ ଶୁଭେଚ୍ଛା ଜଣାଇଥିଲେ।
ସାଲୁଗା ବର୍ତ୍ତମାନ ଘୁ.ଉଦୟଗିରି ବିଧାୟକ ସହ ବିଧାନସଭାର ଉପବାଚସ୍ପତି ଅଛନ୍ତି। ପୁଣି ଥରେ ଦଳ ତାଙ୍କ ଉପରେ ଆସ୍ଥା ପ୍ରକଟ କରି ଟିକଟ ପ୍ରଦାନ କରିଛି। ଟିକଟ ପାଇବା ପରେ ସାଲୁଗା ପ୍ରଧାନ ନିଜ ପ୍ରତିକ୍ରିୟାରେ କହିଛନ୍ତି, ମୁଁ ବିଜେଡି ଦଳର ଜଣେ ଶୃଙ୍ଖଳିତ କର୍ମୀ ଓ ସବୁବେଳେ ଲୋକଙ୍କ ସହ ଅଛି। ମୁଖ୍ୟମନ୍ତ୍ରୀ ତଥା ବିଜେଡି ସଭାପତି ନବୀନ ପଟ୍ଟନାୟକ ମୋ ଉପରେ ଆସ୍ଥା ପ୍ରକଟ କରି ମୋତେ ପୁଣି ଥରେ ଚଳିତ ନିର୍ବାଚନରେ ଦଳୀୟ ଟିକଟ ପ୍ରଦାନ କରିଥିବା ଯୋଗୁଁ ମୁଁ କୃତଜ୍ଞତା ଜଣେଇବା ସହ ନିର୍ବାଚନ ମଣ୍ଡଳୀର ସମସ୍ତ ଭୋଟର, ଶୁଭେଛୁ ଓ ଦଳୀୟ କର୍ମୀଙ୍କୁ ଧନ୍ୟବାଦ ଜଣାଉଛି ବୋଲି କହିଛନ୍ତି ସାଲୁଗା।