ନୂଆଦିଲ୍ଲୀ,୨୯।୫: ଭାରତୀୟ ଜୀବନ ବୀମା କମ୍ପାନୀ ବା ଏଲଆଇସିର ସମ୍ପତ୍ତି ବଢିବାରେ ଲାଗିଛି। ଏଲଆଇସିର ପରିଚାଳନା ଅନ୍ତର୍ଗତ ମୋଟ ସମ୍ପତ୍ତି ତଥା AUM ଏବେ ୫୦ ଲକ୍ଷ କୋଟି ଟଙ୍କା ପାର କରିଛି। ଏହି ଅର୍ଥ ପଡୋଶୀ ଦେଶ ପାକିସ୍ତାନର ଜିଡିପିଠାରୁ ଦୁଇଗୁଣ ଅଧିକ। ମାର୍ଚ୍ଚ ଶେଷ ପର୍ଯ୍ୟନ୍ତ ଏଲଆଇସିର AUM ୧୬.୪୮ପ୍ରତିଶତ ବଢି ୫୧ ଲକ୍ଷ ୨୧ ହଜାର ୮୮୭ କୋଟି ଟଙ୍କା ହୋଇଯାଇଛି। ସେଭଳି ବର୍ଷକ ତଳେ ୨୦୨୩ ଶେଷ ବେଳକୁ ଏହା ୪୩ ଲକ୍ଷ ୯୭ ହଜାର ୨୦୫ କୋଟି ଟଙ୍କା ଥିଲା।
ଏଲଆଇସିର ସମ୍ପତ୍ତି ଏବେ ପାକିସ୍ତାନର ଜିଡିପିଠାରୁ ଦୁଇଗୁଣା ଅଧିକ। ଆନ୍ତର୍ଜାତୀୟ ମୁଦ୍ରା ପାଣ୍ଠି ବା IMFର ସୂଚନା ଅନୁସାରେ, ପାକିସ୍ତାନର ଜିଡିପି ହେଉଛି ମାତ୍ର ୩୩୮.୨୪ ବିଲିୟନ ଡଲାର। ଏ ଦୃଷ୍ଟିରୁ ଯଦି ଦେଖାଯାଏ ତେବେ ଏଲଆଇସିର AUM ପ୍ରାୟ ୬୧୬ ବିଲିୟନ ଡଲାର, ଯାହାକି ପାକିସ୍ତାନର ଅର୍ଥ ବ୍ୟବସ୍ଥାଠାରୁ ଦୁଇଗୁଣା ଅଧିକ। ଏପରିକି ଏଲଆଇସିର ସମ୍ପତ୍ତି ତିନି ପଡୋଶୀ ଦେଶ-ପାକିସ୍ତାନ,ନେପାଳ ଓ ଶ୍ରୀଲଙ୍କାର ମିଳିତ ଜିଡିପିଠାରୁ ମଧ୍ୟ ଅଧିକ। ନିକଟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସଂସଦରେ ଏଲଆଇସିର AUM ବୃଦ୍ଧିକୁ ଖୁବ୍ ପ୍ରଶଂସା କରିଥିଲେ।
କମ୍ପାନୀ ନିଜ କାରବାରକୁ ବଢାଇବା ଉପରେ ଫୋକସ୍ କରୁଛି ବୋଲି ନିକଟରେ ଏଲଆଇସିର ଚେୟାରମ୍ୟାନ୍ ସିର୍ଦ୍ଦାର୍ଥ ମହାନ୍ତି କହିଛନ୍ତି। ଆଗକୁ ହେଲଥ୍ ଇନସ୍ୟୁରାନ୍ସ ସେକ୍ଟରରେ କମ୍ପାନୀ ପ୍ରବେଶ କରିପାରେ ବୋଲି ସେ କହିଛନ୍ତି। କେବଳ ଜୀବନ ବୀମା ନୁହେଁ ଭବିଷ୍ୟତରେ ହେଲଥ୍ ଇନସ୍ୟୁରାନ୍ସ ପଲିସି ଆଣିବ ଏଲଆଇସି। ଖୁବ୍ ଶୀଘ୍ର ଏଲଆଇସି ଅନ୍ୟ ହେଲଥ୍ ଇନ୍ୟୁରାନ୍ସ କମ୍ପାନୀକୁ ଅଧିଗ୍ରହଣ କରିପାରେ।
ଅନ୍ୟପକ୍ଷେ ଯଦି ଭାରତର ଅର୍ଥନୀତି ନେଇ କଥା ହେବା ତେବେ ଏହା ଲଗାତାର ବଡ ଦେଶ ଗୁଡିକ ଭିତରେ ସବୁଠାରୁ ଦୃତ ଗତିରେ ବୃଦ୍ଧି ହେଉଛି। ଭାରତ ବର୍ତ୍ତମାନ ଦୁନିଆର ପଞ୍ଚମ ସବୁଠାରୁ ବଡ ଅର୍ଥନୀତି। ସେପଟେ ଋଣ ବୋଝ ତଳେ ଦବି ନିଜର ଆବଶ୍ୟକତାକୁ ପୂରଣ କରିବାକୁ ସଂଘର୍ଷ କରୁଛି ପାକିସ୍ତାନ । ଗତ ମାସ ଦେବାଳିଆ ହେବାଠାରୁ ଅଳ୍ପକେ ରକ୍ଷା ପାଇଥିଲା ପାକିସ୍ତାନ। ଆଇଏମ୍ଏଫ୍ ମଧ୍ୟ ପାକିସ୍ତାନ ଋଣ ପରିଶୋଧ କରିବାର କ୍ଷମତା ଉପରେ ପ୍ରଶ୍ନ ସୃଷ୍ଟି କରିଛି। ପାକିସ୍ତାନର ରାଜନୈତିକ ଅସ୍ଥିରତା ଓ ସାମାଜିକ ଚାପ ବଢିବା କାରଣରୁ ଏହାର ଆର୍ଥିକ ସ୍ଥିରତା ନୀତି ଉପରେ ଆଗକୁ ପ୍ରଭାବ ପକାଇବ। ଆଇଏମ୍ଏଫ୍ ଅନୁସାରେ, ପାକିସ୍ତାନକୁ ଆଗାମୀ ୫ ବର୍ଷରେ ୧୨୩ ବିଲିୟନ ଡଲାର ଆର୍ଥିକ ସହାୟତା ଦରକାର ପଡିବ।
