ମୁମ୍ବାଇ,୧୪।୯: ମାତ୍ର ଗୋଟିଏ ଦିନ... ଆଉ ତା ପରେ ମୁମ୍ବାଇର ସଡକରୁ ଗାଏବ ହୋଇଯିବ ଡବଲ ଡେକର ବସ୍। ଯେଉଁ ଡବଲ ଡେକର ବସ୍ ଯାହାକି ମୁମ୍ବାଇର ପରିଚୟ ପାଲଟିଛି। ଇଂରେଜ ସମୟରୁ ଚାଲିଛି, ଏବେ ତାହା ଆଉ ଚାଲିବନି। ମୁମ୍ବାଇରେ ୧୫ ସେପ୍ଟେମ୍ବରରୁ ଡିଜେଲରେ ଚାଲୁଥିବା ଏହି ଡବଲ ଡେକର ବସ୍ ସମ୍ପୂର୍ଣ୍ଣ ଭାବରେ ବନ୍ଦ କରିଦିଆ ଯିବ। ଏହି ବସ୍କୁ ଚଳାଇବାର କାମ ବୃହନ ମୁମ୍ବାଇ ଇଲେକ୍ଟ୍ରିକାଲ ସପ୍ଲାଇ ଆଣ୍ଡ ଟ୍ରାନ୍ସପୋର୍ଟ(ବିଇଏସ୍ଟି) ଦେଖାଶୁଣା କରିଥାଏ। ବିଇଏସ୍ଟିର ମୁଖପାତ୍ର ନ୍ୟୁଜ ଏଜେନ୍ସିକୁ କହିଛନ୍ତି, ଏବେ ମୁମ୍ବାଇରେ କେବଳ ୭ଟି ଡବଲ ଡେକର ବସ୍ ରହିଛି, ଯେଉଁଥିରୁ ତିନୋଟି ଓପନ୍ ଡେକ୍ ବସ୍ ରହିଛି। ସେ କହିଛନ୍ତି, ୧୫ ସେପ୍ଟେମ୍ବରରୁ ଡବଲ ଡେକର ଓ ୫ ଅକ୍ଟୋବରରୁ ଓପନ-ଡେକ୍ ବସ୍ ସଡକରୁ ହଟିଯିବ।
ଏହାକୁ କାହିଁକି ବନ୍ଦ କରାଯାଉଛି? ଏହି ବସ୍ ଡିଜେଲରେ ଚାଲିଥାଏ ଓ ଡିଜେଲ ଗାଡିର ଲାଇଫ୍ ୧୫ ବର୍ଷର ଥାଏ। ଏହି ୭ଟି ବସ୍ ୧୫ ବର୍ଷ ପୂରଣ ହୋଇସାରିଛି, ତେଣୁ ଏବେ ଏହାକୁ ହଟାଇ ଦିଆଯାଇଛି। ମୁମ୍ବାଇର ପରିଚୟ ପାଲଟିଥିବା ଡବଲ ଡେକର ବସ୍ ୮୬ ବର୍ଷ ଧରି ରାସ୍ତାରେ ଚାଲୁଥିଲା। ୧୯୩୭ରୁ ଇଂରେଜମାନେ ମୁମ୍ବାଇରେ ପ୍ରଥମ ଡବଲ ଡେକର ବସ୍ ଚଳାଇଥିଲେ। ସେବେଠାରୁ ଏହା ଟ୍ରାନ୍ସପୋର୍ଟର ଏକ ଗୁରୁତ୍ବପୂର୍ଣ୍ଣ ଜରିଆ ପାଲଟି ଯାଇଥିଲା।
ଡବଲ ଡେକର ବସ୍ ବ୍ୟତୀତ ଓପନ ଡେକ୍ ଡବଲ-ଡେକର ବସ୍ ମଧ୍ୟ ରହିଛି। ପୂର୍ବରୁ ଏଥିରେ ମଧ୍ୟ ଯାତ୍ରୀମାନେ ଯାତ୍ରା କରୁଥିଲେ, କିନ୍ତୁ ପରେ ଏହାକୁ ଟୁରିଷ୍ଟ ବସ୍ କରି ଦିଆଯାଇଥିଲା। ଓପନ ଡେକ୍ ଡବଲ ଡେକର ବସ ୫ ଅକ୍ଟୋବରରୁ ବନ୍ଦ ହୋଇଯିବ। ଲାଲ ରଙ୍ଗର ଡବଲ ଡେକବର ବସ୍ ମୁମ୍ବାଇର ପରିଚୟ ଥିଲା। ମୁମ୍ବାଇର ପବ୍ଲିକ ଟ୍ରାନ୍ସପୋର୍ଟରେ ଯାତ୍ରା କରୁଥିବା ଲୋକ ଏହି ଡବଲ ଡେକର ବସ୍କୁ ଖୁବ୍ ପସନ୍ଦ କରନ୍ତି। ଏହି କାରଣରୁ ମୁମ୍ବାଇର ଲୋକେ ବସ୍ ସଂରକ୍ଷିତ ରଖିବାକୁ କହିଛନ୍ତି। ବହୁ ଲୋକ ମୁଖ୍ୟମନ୍ତ୍ରୀ ଏକନାଥ ସିନ୍ଦେ, ପର୍ଯ୍ୟଟନ ମନ୍ତ୍ରୀ ଓ ବିଇଏସ୍ଟିକୁ ଅପିଲ କରିଛନ୍ତି, ଅତି କମ୍ରେ ଦୁଇଟି ବସ୍କୁ ଅନିକ୍ ଡିପୋ ସ୍ଥିତ ମ୍ୟୁଜିୟମରେ ରଖାଯାଉ। ଯାତ୍ରୀଙ୍କ କହିବା ଅନୁସାରେ, ନୂଆ ଇଲେକ୍ଟ୍ରିକ୍ ଡବଲ ଡେକର ବସ୍ ଆରାମଦାୟକ, କିନ୍ତୁ ଏଥିରେ ପୁରୁଣା ବସ୍ ଭଳି ମଜା ନାହିଁ।