ମୁମ୍ବାଇ ୨୮/୦୫: ମୁମ୍ବାଇର  ଛତ୍ରପତି ଶିବାଜୀ ଆନ୍ତର୍ଜାତିକ ବିମାନବନ୍ଦର  ଓ ତାଜ ହୋଟେଲକୁ ବୋମାରେ ଉଡାଇ  ଦିଆଯିବ ବୋଲି ଧମକ ଦିଆଯାଇଛି । ସୋମବାର ଅପରାହ୍ନରେ ମୁମ୍ବାଇ ପୁଲିସ କଣ୍ଟ୍ରୋଲ ରୁମ୍‌କୁ  ଫୋନ୍‌ ଯୋଗେ ଏହି ଧମକ ମିଳିଥିଲା । କଲ୍‌  କରିଥିବା ବ୍ୟକ୍ତି ଜଣକ ବିମାନବନ୍ଦର ଓ ତାଜ ହୋଟେଲରେ ବୋମା ରଖାଯାଇଥିବା କହିବା ପରେ ଫୋନ୍‌ କାଟି ଦେଇଥିଲେ । ପୁଲିସ  ଏହାକୁ ଗମ୍ଭୀରତାର ସହ ନେଇ ବୋମା ନିଷ୍କ୍ରିୟକାରୀ ଦଳ ଓ ଡଗ ସ୍କ୍ୱାଡ୍‌ ସହାୟତାରେ  ବିମାନବନ୍ଦର ଓ ତାଜ ହୋଟେଲରେ ଯାଞ୍ଚ  କରିଥିଲା । କିନ୍ତୁ କୌଣସି ସ୍ଥାନରୁ କିଛି ସନ୍ଦିଗ୍ଧ ସାମଗ୍ରୀ ମିଳି ନଥିଲା ।

 ତେବେ ତଦନ୍ତରୁ ଜଣାପଡିଛି କି ଉତ୍ତରପ୍ରଦେଶରୁ ଏହି ଫୋନ୍‌  କଲ୍‌ ଆସିଥିଲା । ଅଭିଯୁକ୍ତଙ୍କୁ ଧରିବା ଲାଗି ମୁମ୍ବାଇ ପୁଲିସ ପକ୍ଷରୁ ଉଦ୍ୟମ କରାଯାଉଛି । ଗତ ୨୩ ତାରିଖରେ ଦିଲ୍ଲୀର କେତେକ  କଲେଜକୁ ଉଡାଇ ଦିଆଯିବ ବୋଲି ଧମକ  ମଧ୍ୟ ଦିଆଯାଇଥିଲା । କିନ୍ତୁ ତଦନ୍ତ ପରେ  ତାହା ମିଥ୍ୟା କଲ ବୋଲି ଜଣାପଡିଥିଲା ।