ପାରାଦୀପ,୦୯/୦୯: ଏମ୍ଭି ବ୍ଲାକ୍ରୋଜ୍ ଜାହାଜ ବୁଡ଼ିକୁ ଆଜି ୧୫ ବର୍ଷ ପୂରିଛି । କିନ୍ତୁ ଏଯାଏ ତାହା ଉପରୁ ପରଦା ହଟି ପାରିନି । ବର୍ତ୍ତମାନ ସମୁଦ୍ରରୁ ବ୍ଲାକ୍ରୋଜ୍ ଅଦୃଶ୍ୟ ହୋଇଗଲାଣି । ୨୦୦୯ ମସିହା ସେପ୍ଟେମ୍ବର ୯ ତାରିଖରେ ମଙ୍ଗୋଲିଆର ଏକ ଏମ୍ଭି ବ୍ଲାକ୍ରୋଜ୍ ଜାହାଜରେ ୨୩.୮୪୭ ମେଟ୍ରିକ୍ ଟନ୍ ଲୁହାପଥର ବୋଝେଇ ହୋଇଥିଲା । ଜାହାଜରେ ୯୭୫ ମେଟ୍ରିକ୍ ଟନ୍ ଇନ୍ଧନ ଥିଲା । ପାରାଦୀପ ବନ୍ଦରର ଆଙ୍କରେଜ୍ ଅଞ୍ଚଳରୁ ବାହାରି ୩ ନଟିକାଲ୍ ଦୂରରେ ବୁଡ଼ି ଯାଇଥିଲା । ସେଥିରୁ ୯୭୫ ମେଟ୍ରିକ ଟନ୍ ଇନ୍ଧନ ବାହାର କରାଯାଇଥିଲା । ଉକ୍ତ ଜାହାଜରେ ୨୭ ଜଣ କର୍ମଚାରୀ ଥିଲେ । ୨୬ ଜଣଙ୍କୁ ଉଦ୍ଧାର କରାଯାଇ ଥିଲା ବେଳେ ଜାହାଜର ମୁଖ୍ୟଯନ୍ତ୍ରୀଙ୍କ ମୃତ୍ୟୁ ଘଟିଥିଲା ।
ପୂର୍ବରୁ ବୁଡ଼ି ଯାଇଥିବା ଜାହାଜର ଉପର ଅଂଶ ଦୃଶ୍ୟମାନ ହେଉଥିଲା, କିନ୍ତୁ ବହୁ ବର୍ଷ ଅତିବାହିତ ହେବା କାରଣରୁ ଏହି ବ୍ଲାକ୍ରୋଜ୍ ଜାହାଜ ସମୁଦ୍ରରେ ଅଦୃଶ୍ୟ ହୋଇଗଲାଣି । ଯାହାକୁ ବନ୍ଦରରୁ ଉକ୍ତ ଜାହାଜକୁ ହଟାଇବା ପାଇଁ ଉଚ୍ଚ ନ୍ୟାୟାଳୟ ନିର୍ଦ୍ଦେଶ ଦେଇଛନ୍ତି । ଏନେଇ କେନ୍ଦ୍ର ଓ ରାଜ୍ୟ ସରକାର ମଧ୍ୟରେ ବହୁବାର ଆଲୋଚନା କରାଯାଇଛି । କିନ୍ତୁ କୌଣସି ନିଷ୍କର୍ଷ ବାହାରି ପାରି ନାହିଁ । ଏହା ଭିତରେ ରାଜ୍ୟ ସରକାର ପରିବର୍ତ୍ତନ ଘଟିଛି । ଏହା ଉପରୁ କେବେ ପରଦା ହଟିବ ବୋଲି ସାଧାରଣରେ ଆଲୋଚନା ହେଉଛି । ଏପର୍ଯ୍ୟନ୍ତ ଜାହାଜ ବୁଡ଼ି ରହସ୍ୟ ଉପରୁ ପରଦା ହଟିନି । ଜାହାଜଟି ବୁଡ଼ି ରହିଥିବାରୁ ମତ୍ସ୍ୟଜୀବୀମାନେ ମାଛ ମାରିବାକୁ ଯିବା ବେଳେ ସେମାନଙ୍କ ମନରେ ଦୁର୍ଘଟଣାର ଭୟ ରହୁଛି । ଏହାକୁ ଦୂର କରିବା ପାଇଁ ପାରାଦୀପ ବନ୍ଦର ପ୍ରାଧିକରଣ ପକ୍ଷରୁ ସେହି ଅଞ୍ଚଳରେ ବଏ ଚିହ୍ନଟ କରାଯାଇଥିବା ସୂଚନା ମିଳିଛି । ଯଦିଓ ଜାହାଜକୁ ଉଠାଇବା ପାଇଁ ସାଢ଼େ ୧୭ କୋଟି ଟଙ୍କା ଖର୍ଚ୍ଚ ହେବ ତେବେ ଏତେ ଟଙ୍କା କିଏ ଖର୍ଚ୍ଚ କରିବ ତାହା ଏବେ ପ୍ରଶ୍ନବାଚୀ ସୃଷ୍ଟି କରିଛି ।
