ବାରଙ୍ଗ ୦୨/୦୯: ନନ୍ଦନକାନନ ପ୍ରାଣୀଉଦ୍ୟାନ  ଓ କଲିକତା ଆଲିପୁର ଚିଡ଼ିଆଖାନା ମଧ୍ୟରେ ଜନ୍ତୁ ଅଦଳବଦଳ ପ୍ରକ୍ରିୟା ଆରମ୍ଭ ହୋଇଥିଲା । ତୃତୀୟ ପର୍ଯ୍ୟାୟରେ କଲିକତା ଅଲିପୁର ଚିଡ଼ିଆଖାନରୁ  ହଳେ (ଅଣ୍ଡିରା, ମାଈ) ଜିରାଫ ରବିବାର ବିଳମ୍ବିତ  ରାତିରେ ପ୍ରାଣୀ ଉଦ୍ୟାନରେ ପହଞ୍ଚିଛନ୍ତି । ପହଞ୍ଚିବା  ପରେ ସେମାନଙ୍କୁ ପ୍ରାଣୀ ଚିକିତ୍ସକଙ୍କ ଦ୍ୱାରା ସ୍ୱାସ୍ଥ୍ୟ  ପରୀକ୍ଷା କରାଯାଇ ଖୁଆଡ଼ରେ ଛଡ଼ାଯାଇଛି । କର୍ମଚାରୀମାନେ ଦୁଇ ଜିରାଫ ଉପରେ ନଜର ରଖିଛନ୍ତି । ପର୍ଯ୍ୟଟକଙ୍କ ଆଢ଼ୁଆଳରେ ଦୁଇ  ଜିରାଫ ଏକ ମାସ ରହିବା ପରେ ସମ୍ମୁଖ ଖୁଆଡ଼କୁ ଆସିବେ । ପ୍ରାଣୀ ଉଦ୍ୟାନର ୧୦୦  ନମ୍ବର ଖୁଆଡ଼ରେ ମାଈ ଜିରାଫ ‘ଖୁସି’ ଏକାକୀ  ଜୀବନ ବିତାଉଛି । ଏବେ ପାଟନା ଜିରାଫ ଖୁସିକୁ ଦୁଇ କଲିକତି ସାଥୀ ମିଳିବେ । ଜିରାଫ ‘ଖୁସି’  ଆସିଥିବା ଦୁଇ ଜିରାଫଙ୍କ ସହିତ ଖୁସିରେ  ରହିବ ବୋଲି କର୍ତ୍ତୃପକ୍ଷ ଆଶା ପ୍ରକାଶ କରିଛନ୍ତି । 

ଜନ୍ତୁ ଅଦଳ ବଦଳ ପ୍ରଥମ ପର୍ଯ୍ୟାୟରେ  ଗତ ଅଗଷ୍ଟ ୨୬ ବିଳମ୍ବିତ ରାତିରେ ଅଲିପୁର  ଚିଡ଼ିଆଖାନାରୁ ହଳେ ଚାମୁଚ ଥଣ୍ଟିଆ ବଗ, ହଳେ ମାଛରଙ୍କା ବିରାଡି, ୬ଟି ପାଣି ଗୋଧି, ୪ହଳ  ଆମେରିକା ଏଣ୍ଡୁଅ ଥିଲେ । ଏହାର ପରଦିନ  ଅର୍ଥାତ ୨୭ ତାରିଖରେ ଦ୍ୱତୀୟ ପର୍ଯ୍ୟାୟରେ ପ୍ରାଣୀ  ଉଦ୍ୟାନରୁ କଲିକତା ଆଲିପୁର ଚିଡ଼ିଆଖାନାକୁ  ହଳେ ଏସୀୟ ସିଂହ, ଗୋଟିଏ ସାଧାରଣ ନାଲି  ରଙ୍ଗର ବାଘୁଣୀ, ଦୁଇଟି ମାଈ ହିମାଳୟ କଳାଭାଲୁ  ଥିଲେ । ଚତୁର୍ଥ ପର୍ଯ୍ୟାୟରେ ପ୍ରାଣୀ ଉଦ୍ୟାନରୁ ୨ଟି  ଜଳହସ୍ତୀ , ୪ଟି ଗୁରାଣ୍ଡି ,ଦୁଇଟି ବାରସିଙ୍ଘା ଓ  ୫ଟି କୁଜି ହରିଣ ପଠାଯିବ । ଏହି ଅଦଳ ବଦଳ  ପ୍ରକ୍ରିୟା କରାଯିବା ଦ୍ୱାରା ଜୀବଜନ୍ତୁ ମାନଙ୍କର ରକ୍ତ  ସମ୍ପର୍କ ବଦଳିବା ସହିତ ରୋଗୀଣା ହେବା ସମସ୍ୟା ଦୂର ହୋଇପାରିବ । ନନ୍ଦନକାନନ ପ୍ରାଣୀଉଦ୍ୟାନକୁ  ୨୦୦୮ ମସିହାରେ କଲିକତା ଅଲିପୁର  ଚିଡ଼ିଆଖାନା ସହିତ ଅଦଳ ବଦଳ ପ୍ରକ୍ରିୟାରେ  ପ୍ରଥମେ ଗୋଟିଏ ଅଣ୍ଡିରା ଜିରାଫ ପ୍ରାଣୀ  ଉଦ୍ୟାନକୁ ଆସୁଥିଲା । ମାତ୍ର ବାଟରେ ବିଦ୍ୟୁତ  ତାର ସଂସ୍ଫସରେ ଆସି ଆଲିପୁର ଚିଡିଆଖାନାରେ  ଚିକିତ୍ସାଧନ ଅବସ୍ଥାରେ ତା’ର ମୃତ୍ୟୁ ହୋଇଥିଲା ।  

ଦ୍ୱିତୀୟ ଥର ପାଇଁ ୨୦୧୨ ମସିହାରେ ପୁଣି ଜିରାଫ  ଆଣିବା ପାଇଁ ପାଟନା ଚିଡ଼ିଆଖାନା ସହିତ ଅଦଳ  ବଦଳ ପ୍ରକ୍ରିୟା କରାଯାଇଥିଲା । ପ୍ରାଣୀ ଉଦ୍ୟାନରୁ  ହଳେ ସିମ୍ପାଞ୍ଜି କାର୍ତ୍ତିକ ଓ ସୁଭଦ୍ରା ବଦଳର  ୧୦ବର୍ଷର ମାଈ ଜିରାଫ୍‌ ‘ଖୁସି’କୁ ଅଣାଯାଇଥିଲା ।  ପୁଣି ତୃତୀୟ ଥରରେ ଅଉ ଗୋଟେ ଅଣ୍ଡିରା  ଜିରାଫ ଆଣିବା ପାଇଁ ପ୍ରସ୍ଥୁତି କରାଗଲା । ୨୦୧୬  ମସିହାରେ ଆଲିପୁର ସହିତ କଥା ବାର୍ତ୍ତା ହୋଇ  ୪ଟି ବାଘ ବଦଳରେ ୬ବର୍ଷର ଅଣ୍ଡିରା ଜିରାଫ୍‌  ‘ଜୟ’କୁ ଅଣାଯାଇଥିଲା । ଜୟ ଆସିବାର ମାତ୍ର ୪ଦିନ ରହିବା ପରେ ଅସୁସ୍ଥ ହୋଇ  ମୃତ୍ୟୁ ହୋଇଥିଲା । ସେବେ ଠାରୁ ଜିରାଫ୍‌ ଖୁସି  ଏକାକୀ ୧୦୦ ନଂ ଖୁଆଡ଼ରେ ଜୀବନ ବିତାଉଛି ।